حمد العتيبي @Hamad11Alotaibi
حمد العتيبي @Hamad11Alotaibi
الكويت
قال رسول الله صلى الله عليه وسلم : (( كلمتان خفيفتان على اللسان، ثقيلتان في الميزان، حبيبتان إلى الرحمن، سبحان الله وبحمده سبحان الله العظيم )). * * * قال رسول الله صلى الله عليه وسلم : (( طوبى لمن وجد في صحيفته إستغفارا كثيرا )).
*
RSS answers
أعتذر أن بدر مني أي خطأ!؟
ليش تعتذرين !! أنتي ما غلطتي عشان تعتذرين، أعتذارج غير مقبول أرجعي أخذيه يله
15 people like this
من زمآن ما ـــــــــــــــ ☺؟  ›̵ jooly '♡
ما أكلت كوكيز سبواي، الحين رايح لسبواي الجامعة وأخذ كم قطعة
15 people like this
انتقدوني ... لمن يرغب !!  فهأإوهه♡♡
ما أدري ليه لما أقرأ صفحتج.....دائما أحس أن فيج خشونه شوي وجراءه وتضحكين دائما....مع إنج تقولين أنج هادية وخجولة ! في شيء خطأ
15 people like this
تمت المتابعه وشكراااا وايد على اسئله  alixya keys
العفو وحياج الله
12 people like this
سؤؤال للشباب بكل صراحهه عادي تتزوج وحده ماتعرف تطبخ؟!  فهأإوهه♡♡
الصراحة لا ما هو عادي، أنا أحب أن زوجتي إن شاء الله تكون طباخه ماهره، لكن بنفس الوقت ما هو عامل أساسي لكنه مهم بالنسبة لي.
13 people like this
سيارتك شفر صح؟؟
ما شاء الله عليج ما أدري على أساس أنج شايفتني من قبل، لا ما عندي شفر ولا أحب السيارات الأمريكية أكرها.
12 people like this
أذا كبرتوا وعجزتوا شنو بتسولفون لأحفادكم عن تراثكمم!! يعني لا غوص ولا صيد شنو بتقولون لهم أتحــــفوني!؟  ›̵ jooly '♡
ما أدري الصراحة، قهاوي و دواوين هههههههههه إذا جاء هذا الوقت يصير خير يمكن ما نلحق عليه
14 people like this
يُقال: وراء كْل رجْل عظيمْ امْرأهْ.. هْل فتيات، جيل تويتر و آسك، سيخرج منهْن رجلاً عظيمْ ؟َ  انفاال الشمري
والله هذا يعتمد عليهم مو على ردي، لكن بناءاً على اللي أشوفه في حياتي وأسمعه، للأمانة ما أتوقع، لكن نقول إن شاء الله.
11 people like this
فولويـــني! مدري ليه آحسج..............؟ يلا آجلطوني :)  ›̵ jooly '♡
زعولة حيل وتبجين بسرعة وواجد.
10 people like this
انا للحين مصدقه سالفة الطماط ^ _ ^  فهأإوهه♡♡
هههههه طيب ليش مصدقه، قلنا أنه كلام فاضي، أكيد أستفدتي مني تعلمتيها مني صح، زين الحمدلله فدت أحد بحياتي
8 people like this
مســــآحه :-  ›̵ jooly '♡
جرائم الأثيوبيات في إستمرار، لا حول لا قوة إلا بالله، شعبنا ما يعرف شلون يتعامل مع الخدم، والخدم نصهم مجرمين وخصوصا اللي يجون من أثيوبيا، الحكومة المفترض توقف العمالة من هذي الدولة بشكل قطعي الموضوع جدي.
9 people like this
ﺟﺎﻱ ﻋﻠﻰ ﺑﺎﻟﻲ................ ....؟  ›̵ jooly '♡
أسافر الأسبوع القادم، عندي 9 أيام عطلة :)
11 people like this
كذبه كلنا صدقناها ............؟  ›̵ jooly '♡
ما أدري الصراحة ما في شيء في بالي، بس كانوا يقولون لي الطماط يزيد الدم....! أكلت منه لين قلت بس ما زاد ولا بطيخ ما أدري أنتم مصدقينها قبل وإلا ما مرت عليكم !
9 people like this
فولويني : بخصوص الملل الجماعي ... قولو شي عن طفولتكم .؟  فهأإوهه♡♡
أبي أتكلم عن كذبة قلتها وأنا بالمتوسط، بغت تضيعني...!!!
كان واحد من ربعنا بالصف ذاك اليوم الأقشر مسروق كتابه، فسألني شفت (أحمد) يسرق كتابي....!! أنا عاد من خبالي الزايد وجذبي الساحق، قلت له : أيه !!!!! كلمة أيه بغت تضيعني.
أنا ما حسبتها صح...!!! فراح الطالب للمدرس وتفاهموا مع ( أحمد) وجابني المدرس أشهد قدامهم أنه سرق فعلا الكتاب ( هني كنت أبي الأرض تشق وتبلعني ) وقلت له نعم سرقه، هزائه المدرس وأخذ كتابه وعطاه للولد الثاني ( مع أنه بريئ والله ) أنا المجرم ههههههههه، فالولد من كثر ما بكى و عصب توعدني بشكل مخيف، المشكله أن كتفه كبر رأسي !! قلت شكلي ميت !! بس والله وقت الهده ما سوى لي شيء مدري وين راح...!! الورطه أنه بشارعنا ولا قرب صوبي غريب أمره...!!! الحين كل ما أمر جنب بيته وأشوف الرجال، أنقد على نفسي ودي أروح أكلمه وأعتذر بس أخاف يمردغني :/
8 people like this
مســآحهه :-  ›̵ jooly '♡
من أكثر الأشياء اللي ترفع ضغطي، لما أدخل على مجموعة من البشر، وأقول : السلام عليكم، ومحد يرد...! أحس هني إني داش على مجموعة كفار !!
11 people like this
مسآحــه........؟!  ›̵ jooly '♡
في شيء شد إنتباهي من فترة طويلة وحاب إني أبدي رأيي فيه لانه يرفع الضغط.....!!
كثير من الناس في مواقع التواصل الإجتماعي، تقول عن نفسها :( أنا إنسان صريح جدا وما أجامل ) ( أنا اللي في قلبي على لساني ) ( أنا صريح وما أجامل واللي يزعل يزعل ) شنو هالكلام....؟!!
أنا ما أدري النوعية هذي شلون تفكر، وشلون يستخدمون صراحتهم، كل واحد فينا فيه عيوب وسلبيات ما يحب أحد يذكرها، ولا أحد يقول لي أنا ما أزعل لا الكل يزعل لكن البعض ما يبين.
معظم اللي يقول أنا صريح بشكل بحت، ما يتكلم عن نفسه بصراحة لو تسأله، لكنه شاطر يتكلم عن الناس بصراحه، يعني معقول الناس هذي مستعدة أنها تخسر أشخاص عزيزة عشان صراحتهم الزايدة معقول، بعضهم يعتقد إذا كان صريح يعني صادق، الصدق غير والصراحة غير ...!!!!
الناس اللي نواجهها ونعيش معاها مختلفة شخصياتهم وتقبلهم للكلام، يعني لو أمي وأبوي فيهم عيوب وأخطاء أروح أصارحهم وأقول : ( يما أنتي كذا وكذا أسمحي لي ) وين راح الإحترام والأدب والبر، وإلا صاحبي فيه سلبية لكنها ما تضر أروح أفجرها أقول : ( فلان أنت كذا وكذا ) ، وين العقل..!!!
بالطريقة هذي راح تكون لك عداوة حتى من أقرب الناس لك، وصدقني ما أستفدت شيء من هذي الصراحة لا علم و لا منفعة لكنك خسرت من هم أفضل وأجدر منك.
الصراحة تكون بحدود الإحترام والأدب وما تكون في كل شيء ، في أمور ما تتكلم فيها، ممكن أنك تكون صريح بشكل بحت وواضح إذا وقع عليك ضرر، يعني لو أحد فيه عيب أو سلبية مأثره عليك أو على غيرك نعم هني صارح بحدود الأدب، لا تخلق عداوة من صراحتك اللي مالها داعي، الكل راح ينفر منك وما يبي قربك صدقني في ناس جذي عايشة محد يحب كلامها.
15 people like this
›̵ ♯` - اسم شخص مايغيب عن بالك ؟ مجرد فضول '(~o)
صراحة ما في شخص على طول على بالي، في أشخاص كثير من الأوقات يكونون على بالي، لكن سالفة إنه ما يغيب عن بالي لا طبعا، شنو ما عندي شغل !
10 people like this
# أيهم أجمل بنظركـ '[ الماضىٓ الذي عشتہَ وودعتہَ وآنتهىٓ ] ' أم ' [ المستقبل المجهول الذي آنت بإنتظارهہَ ]  RŸÔÔM
الماضي ما أقدر أقول جميل ولا قبيح هو بين الإثنين....أفضل المستقبل لاني متفائل خير بالأمور اللي أبيها أسويها واللي راح أطبقها إن شاء الله.
12 people like this
فولويني : ليه ﺎلشخص إذا ععرف ﺎنك تحبه يصير حيوان ☻  فهأإوهه♡♡
شوفي هذا الكلام بوجهة نظري ما هو صحيح دائما، في ناس إذا عرفوا أن أحد يحبهم ما يصدقون ويتعلقون فيه خصوصا المراهقين، وفي ناس إذا عرفوا إن أحد يحبهم يستغلونه لرغباتهم، والنوع الثالث اللي أنتي ذكرتيه يتكبر ويرفع خشهم والجواب بعد أنتي ذكرتيه لانه حيو.... !
12 people like this
أشخاص بمسمى السّعادة { .............. }  ›̵ jooly '♡
أمي الله يسعد قلبها ويحفظها....تستاهل كل خير....أكاد أجزم أن لو كل واحد عنده شخص مثل أمي راح يعيش مرتاح....أمي لو تسمع هذا الكلام بتقعد تضحك وتقول مشكور .
في أشخاص بعد تحت هذا المسمى بس مالي خلق أذكرهم
15 people like this
علىَ سبيل الجماال اذكروااَ لنااَ اشيااء جميلهہْ ☹♥♥  ›̵ jooly '♡
تخيل أنك محافظ على الفروض الخمس وصلاة الجماعة، وتتبعها بالسنن الراتبة كلها، ولك ورد ثابت من القرآن، وتحافظ على الشفع والوتر وركعتي الضحى، وصدقة بما تيسر لك، والجميل إنك محافظ على كل هذي الأعمال يوميا، أنا أتوقع لو وصلت لهذي المرحلة لو حتى أحد شتمني أو ضربني راح أبتسم بوجهه
14 people like this
فولويني تكـــلمو شوي عني وعن صفحتي...............!؟  ›̵ jooly '♡
ياويلي يا البنات يحبون المديح بدرجة رهيبة...!!
لا تخافين يا بنت الحلال أنتي خوش بنت ( الله أعلم ) وصفحتج من أحسن الصفحات اللي تابعتها، تجمع بين أمور كثيرة وأفضلها النصائح والفوائد دينية.
12 people like this
لو بتخطب ۈفي النظره الشرعِيه ۈش أول شيء تشوفہ في البنت ؟!  فهأإوهه♡♡
أول شيء بتطيح عيني عليه هو عيونها، هذا شيء طبيعي، لكن هدفي بالنظرة الشرعية مو أشوف شلون صايره إذا جميلة أو غيره، لكن عشان أستجوبها هههههههههه راح أسألها بعض الأسئلة اللي ممكن تكشف لي عن بعض الجوانب فيها، مع إنه إحتمال ضعيف حيل.
9 people like this
وهو عزابي في البرد يقول أبي حضن أتدفى فيه وإذا تزوج يحط زوجتہ عند أهلها ويروح للبر "̯ - ليش كذا يا الاسباني ~o)
هو إذا كان هذا الحضن طيب المعشر، حسن الخلق، طيب اللسان، متفهم، كبير العقل، كان الزوج لازق بهذا الحضن وما يبي فرقاه......لكن لو كان الحضن سيء الخلق، عنيد، طويل اللسان، صغير العقل، فأكيد أن الزوج بودي هذا الحضن لأهله ويروح البر ^^ أنا كنت راح أسوي هذا الشيء !!
بس الحقيقة ورى هذا الموضوع أن معظم الأزواج يمرون بمرحلة الملل من بعض بحياتهم، فالبعد لفترة هو حل ممتاز عشان يكون بينهم شوق وبالتالي هذا الشيء خلق يزيد بينهم الموده والألفه،، طبعا هذا رأيي لكن مو شرط يكون صحيح.
10 people like this
كآن في ودي أقول لشخص أنت {.... }بس مآقدرت ؟  فهأإوهه♡♡
أنا دائما ما أقدر أعبر من هذي الناحية ! سواء بالأيجاب أو بالسلب يعني بالحب أو الكره، أنا مو من النوع اللي يكشف عن هذي الأمور بسهولة، أحس أنها خطوة ضخمة ولها عواقب، بالمختصر المفيد أنا غالبا تبين مشاعري إتجاه الشخص عن طريق أفعالي مو أقوالي، ما أحب أتكلم في أمور مثل هذي للشخص المعني فيها.
9 people like this