El Joker @eljokermusic
أهلا بيك فى عالم سمسم
RSS Answers
ممكن تقولي انا كواحد من المعجبين عايز يسمع فن ويستمتع بيه هستفيد ايه لما تناقش مواضيع فى سطور انا مفهمهاش !
بالمعنى اللى يبين إنى مسيبتش حاجة مقولتهاش
دى التكملة
أما إجابة سؤالك
فـ متقلقش هتلاقى لنفس السطور دى معنى مناسب ليك :)
758 people like this
ليه بتقول باب اﻻيمان قصير مبيدخلوش متكبر وانت بتتكلم عن نفسك كتير؟
مهو مش أى حد يتكلم عن نفسه يبقى متكبر
طبيعة الكﻻم اللى الواحد بيتكلمه والنبرة اللى بيتكلم بيها والهدف من ورا كﻻمه -وربما أعتبارات تانية- هما اللى بيحددوا الشخص اللى بيتكلم ده متكبر وﻻ ﻷ
يعنى الخضر لما قال لسيدنا موسى إنك لن تستطيع معى صبرا مكانش بيتكبر عليه ، رغم إنه بالبلدى بيقوله إنت مش هتفهم أنا بعمل إيه
ممكن اللى بيتكلم يكون كبير بالفعل ، مش متكبر وﻻ حاجة
والفرق بين الكبير والمتكبر واضح مش محتاج شرح
تسألنى طب الكبير ده هيدخل من باب اﻹيمان القصير إزاى ؟
أقولك هيوطى عادى
والموضوع ممكن يبانلك مضحك بس هو منطقى وحقيقى جدا
الشخص الكبير -مش كبير حجما طبعا إنت فاهم كبير معناها إيه- هييجى عند نوعيات معينة من اﻷسئلة -كمثال- وهيتجنبها ، حتى لو مفيش أى منطق يخليه يتجنبها إﻻ منطق دينى ما ، أو حتى المنطق الدينى العام اللى بينصحنا نبعد عن الحاجات اللى دينيا تعتبر هدر للوقت والمجهود و و الخ
ده مش شخص كبير و وطى ؟
بس خلى بالك ، هو هنا لما وطى شأنه أرتفع ، ﻹنه وطى لربنا ، وربنا مش هيصمم باب اﻹيمان بيه مؤذى ليك
بالعكس إنت بتوطى كنوع من الحكمة ، وده بيفتح عينك على حاجات مهمة جدا
أما المتكبر عمره ما هيوطى
1449 people like this
ليه قلت بصت فلسطينى ﻻسرائيلى ناهب محصول طينه مع ان اﻻسرائيلين واخدين اﻷرض نفسها مش محصولها؟؟؟
مين اللى قال إن اﻹسرائيليين خدوا أرض فلسطين ؟
إنت المفروض مؤمن إن اﻷرض دى راجعة للفلسطينيين مهما طال الزمن
لذلك فاﻹسرائيليين بينتفعوا من اﻷرض دى إنتفاع مؤقت مسيره هينتهى برجوع اﻷرض ﻷصحابها ، ومش شرط طبعا يكونوا اﻹسرائيليين واخدين اﻷرض يزرعوا فيها ، المقصود من "محصول طينه" هو الفايدة -سواء حقيقية أو ﻷ- اللى بتعود عليهم من اﻷرض
حتى لو بنوا عليها كبارية مزرعوش وﻻ حاجة ، اﻷرض مش كل اللى بيتزرع فيها حﻻل ومفيد
فى مواضيع بناقشها فى سطور إنت متفهمهاش
بالمعنى اللى يبين إنى مسبتش حاجة مقلتهاش
طبعا الجملة دى أصلا من أسهل الجمل اللى فى اﻷغنية ، بس أنا جاوبت على السؤال ده علشان أعلن إنى هرجع أرد على اﻷسك لو الناس إرتقت باﻷسئلة شوية
1313 people like this
https://www.facebook.com/3moeljoo/posts/10206698493087417 مش فاهما حاجا ملبوست؟؟ مين السلالة دى؟؟؟
الفرق بين بعض الأشخاص والبعض الآخر طفرة
مُحتكر إحساس إن السلالة دى لازم تُقفلك
واضح إنى بتكلم عن الفرق بين الأذكياء والأغبياء اللى يكاد يكون طفرة
فهل السلالة دى قصدى بيها الأغبياء ، وفى الحالة دى هيبقى معنى الجملة التانية إنهم لازم يقفوا للأذكياء إحتراما
وممكن يقفوا فى وشهم "بمعنى يعطلوهم" بس ده معنى ضعيف
ولا السلالة دى قصدى بيها الأذكياء ، وفى الحالة دى هيكون معنى نفس الجملة إن الأذكياء لازم يقفوا للأغبياء كمساعدة ليهم ، زى لما تقول لفلان
"متخافش أنا هقفلك فى الموضوع ده" مثلا
وممكن يقفولهم بمعنى يقفوا فى وشهم ، وده يمشى
المعنى ده ماشى والمعنى ده ماشى لإنى محددتش مين السلالة دى ، ولفظ "تقفلك" يمشى على السلالة دى بمعانى وعلى السلالة التانية بمعانى تانية
بس أعتقد الأغنية هتوضح أنا قصدى إيه
غير طبعا إن الجملتين لوحدهم من غير باقى الأغنية ممكن يكون معناهم أشمل من كده
مثلا إن السلالة الصالحة لازم تقف للسلالة الفاسدة ، يقولولهم إن اللى بيعملوه غلط
وبنفس الإسلوب شوف معنى الجملة على السلالة الفاسدة ، وهل المحتكر هيبقى أنا ولا حد تانى
عموما أنا كل ده بساعدك على التفكير لكن قصدى من الجملتين هيبانلك فى الأغنية
وإنت ودماغك بقى ;)
1872 people like this
تراك مناسك الالم ايه علاقة الحديث اللى بيتقال فى الاول بالتراك
"مش "بجرى ومش هلحق لقب
أنا النظام جابنى هنا :)
أما لو "مش بجرى ، ومش هلحق لقب" الموضوع هيختلف :)
وفى تلات حاجات هسيبهم لذكاء المستمع على المدى الطويل
بفتحلك بس أفق بمثال
2173 people like this
ازاى بتقول اللى مات فى البير اخر امل فى انك تنضفى وسيدنا يوسف ممتش فى اليير اصلا ؟؟؟
تفتكر فى كام يوسف كانوا وهيكونوا فى كام بير بس هيموتوا فيه مش هيطلعوا منه زى ما سيدنا يوسف طلع علشان ربنا كان مقدرله يبقى سيدنا يوسف ؟؟
وعلى فكرة مش لازم اللى فى البير لما يخرج يبقى رسول أو نبى
ومش لازم البير يبقى بير
المهم إن اللى هيخرج يبقى هينقذ موقف معين ، أو ناس معينة
وأنا نور عنيا مش هيرجع علشان مفيش حاجة من ريحة اللى مات فى البير هتوصلنى
1881 people like this
بما ان ان في قطاع من اللي بيسمعوك في ثانوي عام وانا واحد من القطاع دا تحب تنصحنا بايه في الفتره دي زي افضل طرق للمذاكره ممكن يجمع بيها قدر كبير من اللي بيذاكره خصوصا ان الامتحانات قربت يعني ^_^
أنا شخصيا كنت بمسك باب فيزياء مثلا وأبدأ أشرحه لنفسى ، وأسألنى أنا فهمت ولا لأ بعد كل نقطة ، لو فهمتها أعديها ، لو مفهمتهاش بشرحهالى تانى
:D
وكنت بحل على كل باب بخلصه
ولما بخلص المنهج كله بحل كتاب النماذج كله ، والإمتحانات من 95 لحد السنة اللى أنا فيها
على النظام ده صدقنى هتقدر تلم مادتين كل شهر -ده بحد أقصى لو إنت مش ذكى أصلا- ، يعنى مش محتاج إلا 75 يوم قبل بداية الإمتحانات -لو عندك خمس مواد زى على أيامى- ، وخلى ترتيب المذاكرة إن أول مادة هتمتحنها هى آخر مادة تذاكرها ، وآخر ماده هتمتحنها هى اللى هتذاكرها قبل آخر مادة هتذاكرها ، واللى قبلها فى الإمتحانات تكون قبل اللى قبل الأخيرة فى المذاكرة ، لحد ما تبقى أول مادة إنت هتذاكرها ، هى تانى مادة فى جدول الإمتحانات ، ومش هتحتاج أكتر من يومين مراجعة على كل مادة قبل إمتحانها كحد أقصى
وتدخل الإمتحان بأعصاب باردة
2242 people like this
تراك جديد يا جوكر
موضوع التراكات ده
أنا إن شاء الله همشى بالنظالم الآتى
تراك فاصلة نزل يوم 10
كل شهر يوم 10 إستنوا منى تراك جديد
ويوم 25 هنزل أول فيديو للحفلة "البرومو"، ده طبعا إن شاء الله :D
وكل شهر يوم 25 إستنوا منى فيديو جديد
أنا هحاول مخرجش عن النظام ده لو لقيت الناس متابعانى كويس اليومين دول من كل شهر
2257 people like this
طب اشمعنى فى (أصبح صعب يفضل ؛ جحا ملوش فى البيت مسمار) إستخدمت الفاصلة المنقوطه اللى هى تحتيها نقطه ؟؟؟
علشان الفاصلة المنقوطة بتُستخدم فى كذا حالة منهم لما يكون ما بعدها سببا لما قبلها ، ودى الحالة اللى فى السطر اللى أنا كاتبه
ووقفت عندها ، علشان الوقوف من قواعد إستخدامها
1345 people like this
انت قولت انك بتعتز باللغة العربية و انك بتفضلها و بعدين تقوم حاطت جملة iam a fuckin addict و دي جملة انجليزية فا المفروض انك ما تقولهاش لأن المسألة مسألة مبدأ دا غير انك بتقول انك بتغني راب احسن من أي حد في العالم زي امنيم مثلا و بعدين تقوم مستخدم اللغة بتاعتوا في اغنية و هوا ما بيجيبش كلام عربي؟
أولا: أنا أول مرة أعرف إن اللغة الإنجليزية دى بتاعت إيمينم
كنت فاكرها موجودة من زمان
شكرا على المعلومة :D
ثانيا: إيمينم ميعرفش يقول جملة عربى ، مش مبيقولش جُمل عربى بمزاجة
وحتى لو يعرف يتكلم عربى ، أغلب جمهورة مش عرب ، فهيبقى غباء إنه يخاطبهم بالعربى
أما هنا فى مصر فـ مفيش حد مُتعلم مبيعرفش يتكلم إنجليزى حتى لو بسيط جدا
ثالثا: أنا مغيرتش مبدأى وعملت أغنية كاملة بلإنجليزى ، الموضوع كله كان جُملة أنا شايف إنها أفضل جملة يقولها مُدمن -بالصفات اللى أنا وصفته بيها فى الأغنية- فى الموقف ده
فكر معايا كده فى جملة عربى ممكن تعبر عن كل اللى الجملة دى عبرت عنه مش هتلاقى
رابعا: فى ناس كتير سألتنى عن "بلا بلا" فـ أنا هجاوب عنه هنا بالمرة
موضوع الإدمان ده إتهرس فى مليون فيلم وأغنية قبل كده ، بلا بلا بتعبر عن كل الهرى اللى كل الفنانين اللى تناولوا الموضوع ده فى أعمالهم الفنية هروه ، واللى أنا أكيد مكنتش ههريه
الحاجات اللى أنا حكيتها بقى هى الحاجات اللى محدش قالها قبل كده ، والحاجات دى هى اللى خلت الأغنية تلمس أغلب المدمنين اللى من جيلى اللى مفيش ولا عمل فنى إتعمل عن الإدمان قبل كده لمسهم
على سبيل المثال معظم الأعمال الفنية طلعت المدمن فقير وبيسرق أمه وأصحاب الضرب بيتخلوا عنه لما فلوسه تخلص ، أما أنا طلعته معندوش أى مشاكل مادية وبالتالى بيوت أصحابه كلها إتفتحتله والهيروين إتحط قدامه
معظم الأعمال الفنية خلت نهاية المدمن الموت بجرعة زيادة أو السجن ، وأنا علشان عارف إن ده مش واقع أغلب المدمنين طلعته عاش لحد 100 سنة عادى
معظم الأعمال الفنية طلعت المدمن بيخسر وظيفته وبيخسر كل حاجة بسبب الإدمان ، وأنا برضه علشان عارف إن ده مش واقع أغلب المدمنين طلعته مخسرش من الحاجات اللى المدمنين بيخسروها فى الأفلام والأغانى إلا الجواز ، لإن ده اللى أغلب المدمنين فعلا بيخسروه لأسباب كتير جدا
ده فضلا طبعا عن كونه خسر الحقيقة اللى عاش هربان منها
وشكرا للجميع <3
2160 people like this
يا جوكر انتا زودتها اوى فى التراك الجديد مناسك الالم فى العمق لدرجت ان الناس فعلا مش فاهما حاجا ليه بتعمل كدا؟؟؟
أولا مفيش حاجة إسمها الناس مش فاهمة ، إسمها فى ناس كتير مش فاهمة ، أو حتى معظم الناس مش فاهمة ، لكن طبعا فى ناس فاهمة على الأقل جزء كبير من الأغنية
فضلا عن كون فى تلات أشخاص -وأحيانا أكتر- بقولهم كلمات كل أغنية جديدة أخلصها ، وممكن أشرحهالهم ، أو أشرحلهم منها أجزاء ، أو ألاقيهم فاهمين معنى فـ أشرحلهم معنى تانى يهمنى ، كل أغنية وظروفها بقى
ومابنزلش الأغنية إلا أما الأشخاص دى تكون مُجمعة إن الأغنية دى أحسن من اللى قبلها ، أو على الأقل فيها إضافة مُهمة مش موجودة فى كل الأغانى اللى قبلها
وطبعا الأشخاص دول أنا بثق فى رأيهم جدا لإنهم متربيين على إيدى "فى الكتابة على الأقل" وطلعوا معايا السلم خطوة خطوة فـ فاهمين كتاباتى أكتر من أى حد تانى
ثانيا
لو رجعت عندى على الصفحة أو على الوول لحد البوست بتاع أغنية "الحب فى عنق زجاجة" أو "موناليزا تانية" أو أو الخ
هتلاقى معظم الناس بتقول إنها مش فاهمة حاجة ، وإنى بقع ، وبيطلبوا منى إنى أرجع للأغانى الواضحة بتاعتى زى "فى إختلافنا رحمة" و "إنفصام حاد" وهكذا
نفس الناس دول هما اللى هتلاقيهم سايبين تعليقات على أغنية "مناسك الألم" بيقولولى فيها إنهم مش فاهمين حاجة ، وإنى بقع ، وبيطلبوا منى أرجع للأغانى الواضحة القوية بتاعتى زى "الحب فى عنق زجاجة" و "موناليزا تانية" وهكذا
ده معناه إيه ؟
ده معناه إنى بنمى الناس دى "أو على الأقل بقربهم من اللى أنا بقدمه" تدريجيا وهما نفسهم مش فاهمين ده
صدقنى أنا عارف أنا بعمل أيه كويس أوى ، وعارف قيمة اللى بقدمه كويس أوى
وعارف برضة كل موضوع بتكلم فيه أنهى عقلية اللى بتقدره ، فـ بحاول على قد مـ أقدر أناقش كل موضوع باللهجة اللى العقلية اللى هتقدره تقدر تفهمها
وكالعادة علشان مسيبش الكارهين يشموا نفسهم
أوعدكوا إن الأغنية الجاية هتكون واضحة جدا وفى نفس الوقت قوية جدا
حاجة كده زى "أزمة مُجتمع" -فى الوضوح- مثلا
الأغانى اللى كل الناس بتسمعها فبتعمل نص مليون مُشاهدة فى شهر ونص أو شهرين دى
رغم إن ده مش نوعى المُفضل من الأغانى
بس برضه هراعى إن الأغنية رغم وضوحها الشديد ووحدة موضوعها وكون رسالتها مباشرة ، تبقى من أول سطر فيها لآخر سطر فيها إسقاطات على موضوع غير الموضوع اللى يبان لأى حد إنى بتكلم فيه ، زى "الحب فى عنق زجاجة" -فى تعدد المعانى بشكل مُتكامل- مثلا ، مش بالظبط يعنى
وشكرا للجميع <3
2287 people like this
هسألك سؤال بعيد عن الراب بس محيرنى من ساعه ما المدرس شرحلى الموضوع داا / ازاى الهوا لما بيسخن وزنه بيقل؟؟؟ مش المفروض الكتله لا تفنى ولا تستحدث من العدم؟؟؟ إزاى حرارة الهوا بتتحكم فى كتلته؟؟؟
هى حرارة الهواء مبتتحكمش فى كتلته ولا حاجة
كل الموضوع إن الهواء ده زى مـ أنت عارف جزيئاته بينها روابط ضعيفة "بالنسبة للسوائل والمواد الصلبة" والجزيئات دى بتهتز فى مكانها وطاقتها الحركية نص الكتلة فى مربع السرعة والكلام ده
فطبعا انت لما بترفع حرارة الغاز أو الهواء بتزود طاقته الداخلية ، وبالتالى بتزود طاقته الحركية ، اللى هى نص الكتلة فى مربع السرعة ، والكتلة ثابتة ، فمربع السرعة هو اللى بيزيد ، والسرعة مسافة على زمن ، يعنى من الآخر المسافة اللى بيقطعها كل جزئ هواء فى الثانية الواحدة هى اللى بتزيد لما بترفع أنت درجة حرارة الهواء
لما تيجى تفكر فيها ، هتلاقى إن -مثلا- المتر المكعب الواحد كان فيه مليون جزيئ هواء كل جزئ فيهم بيهتز فى كذا ، فلما كذا دى تضاعف -مثلا- نتيجة رفع الحرارة اللى بيؤدى زى ما قلنا لزيادة المسافات اللى بيقطعها كل جزئ فى الثانية الواحدة ، هتلاقى إن نفس المتر المكعب بقى فيه نصف عدد الجزيئات ، وده يُطلق عليه إنخفاض فى الكثافة ، نتيجة ثبات الكتلة وتغيُر الحجم ، مش تغير الكتلة زى ما أنت بتقول
وبكده الهواء الساخن بيبقى أخف فبيرتفع لأعلى ، والهواء البارد بيبقى أتقل "كثافته أكبر لإن المسافات البينية بين جزيئاته صغيرة لإنها بتهتز فى حجم قليل بالنسبة للهواء الأسخن" فبينزل لتحت
أنت بقى علشان موضوع أخف وأتقل ده أفتكرت إن الحرارة بتؤثر على الكتلة ، بس لأ ، هى بتؤثر على الكثافة اللى هى كتلة على حجم وبتكون الكتلة ثابتة والحجم هو اللى بيتغير نتيجة تغير سرعة الجزيئات زى ما وضحتلك
شكلك فى ثانوية عامة
ربنا معاك أنت وكل اللى زيك ^_^
2708 people like this
معقوله صدفه انها بالمعنيين دول بالذات؟ يا تبقى باقى الجملة ياتبقى رد على السؤال؟ هى ايه دى بقى انا مش فاهما خالص؟؟؟
كلمة "أجرى" اللى بختم بيها الجملتين اللى قبل دول هى اللى بتكلم عنها فى الجملتين دول
لإنى المفروض إنى بكلم الأنا العليا "الروح" فى الجملتين اللى قبل دول ، فـ بقولها
إنطقى بدل مانتى ساكتة ليه بعجز بدرى ؟
بشيل ضرب اللى جريوا ليه ؟ ما تسيبينى أجرى
أنا فى الجملتين دول بعاتب الأنا العليا اللى هى بمثابة الفطرة من مبادئ وخلقيات و و الخ على إنها بتخلينى أقف أدافع عن الحاجات اللى كل الناس هربت ومدافعتش عنها ، وده طبعا اللى بيخلينى أشعر بالعجز المبكر ، فبطلب منها إنها تسيبنى أجرى زيهم
وممكن برضة تعتبرنى بكلم الأنا العليا ، وهى بترد عليا بكلمة "أجرى" بس المرة دى مش هتبقى "أجرى" بمعنى أهرب زى ما كان معناها وأنا بختم بيها كلامى للأنا العليا
المرادى معنى "أجرى" هيكون ثوابى ، الأجر اللى باخده لإنى واقف أدافع عن الحاجات اللى كل الناس هربت ومدافعتش عنها
يعنى من الأخر هبقى أنا بقول للأنا العليا: إنطقى بدل مانتى ساكتة ليه بعجز بدرى ؟
بشيل ضرب اللى جريوا ليه ؟ ما تسيبينى
بقولها لحد "ما تسيبينى" بس ، اللى هو سيبينى فى حالى متمسكنيش
وهى بترد عليا تقولى "أجرى" اللى هو لأ مش هسيبك علشان أنا بخليك تكسب أجر "ثواب" على وقفتك ودفاعك عن الحاجات اللى بتدافع عنها دى كلها
طبعا أنا وأنا بكتب الجملتين دول ، مكانش فى بالى إن كلمة "أجرى" تمشى بالمعنيين دول ، لكن لما كتبتهم وبصيتلهم وأكتشفت المعنى التانى ليها "اللى هو على لسان الأنا بمعنى ثوابى" سألت نفسى
معقولة صدفة إنها بالمعنيين دول بالذات ؟
يا تبقى باقى الجملة ؟ يا تبقى رد على السؤال
والموضوع ده عامل بالظبط زى "فهمت من الخيميائى حاجات باولو كويلو مش فاهمها" علشان كده قلت ردا على التساؤل اللى فى الجملتين اللى فاتوا دول "الفضل لعقلى مش لعقلك ياللى كتبت الكلمة ، فهمت من الخيميائى حاجات باولو كويلو مش فاهمها" وكده يعنى
وشكرا للجميع <3
2376 people like this
انتا قولت ان الى بتقدمو أقيم من أعلى رواية بس اليونيفورم ترنج .... طبعا الراب هو الترنج / بس انتا دايما بتقول انك مش رابر ؟؟؟ ازاى بقا ؟؟؟ مش امفروض انك مش لابس الترنج دا ؟؟؟
لما تقول "أقيم من أعلى رواية بس اليونيفورم ترنج" من غير ما تقول فى سرك بعدها على طول "عمرى ما لبست المريلة ، لكن كنت كل سنة ،، بطلع الأول ، وده أول شيئ زرع جوايا الأنا" متبقاش جوكريان أبدا
أنا مش لابس الترنج ، وأغنية "كام كلمة" بتأكد ده
بس للأسف شكلى قدام الناس "اللى مش جوكريانز" لابس الترنج
مـ انت لما تسأل واحد ميعرفنيش -معرفة حقيقية- مين الجوكر ؟
هيقولك ده مغنى راب
زى لما قولت "بلعن التسلية من خلال عمل ترفيهى" هو أنا مبقدملكش عمل ترفيهى
بس للأسف تصنيفه فى المجتمع -للى مش عارفنى- عمل ترفيهى
بس كده :)
2265 people like this
انتا قولت ان ربنا خلق كل حاجه وقدر المقدرات الى مع اختيارات كل شخص هتخلى كل حاجه تمشى زى ما ربنا عايز / طب تفتكر هل حد قادر يوصل بذكائو لحاجات تهدد النظام الى ربنا عايز الكون يمشى بيه؟
بص
أنا لما فكرت فى الفكرة دى قبل كده رجحت فى البداية إحتمال إن ربنا خلى تفكيرنا يبقى فى الحدود اللى متهددش النظام
بمعنى إننا مستحيل نوصل لحاجات مينفعش نوصلها ، علشان لو وصلنالها هنبقى خطر على النظام
بعدين حسيت إن الإحتمال التانى مش مرفوض تماما برضه
بس زى مـ أنت عندك على الحاسوب الخاص بيك برنامج أنتى فيروس بيحمى الجهاز من أى فيروس بيهدد سلامة جهازك ، أعتقد لو الإحتمال ده هو الأصح يبقى أكيد النظام عنده أنتى ناس بقوا خطر على النظام
والأنتى فيروس ده ممكن يكون "موت مفاجئ" ، أو فقدان ذاكرة ، أو ممكن يكون الجنون
ويمكن الجنون ده أكتر فكرة أتسحلت فيها
قلت إن ممكن يكون النظام مُصمَم بحيث إن أى شخص يوصل لمرحلة إنه بقى خطر على النظام ، بيفقد القدرة على التواصل مع البشر بشكل طبيعى -بيتجنن- ، وبالتالى بيفقد القدرة على نقل أفكاره للى حواليه ، وبكده ميبقاش خطر على النظام ولا حاجة ، وفى نفس الوقت يبقى مماتش ولا حاجة ، وطبعا مش لازم تكون كل حالات الجنون كده ، ومش لازم تكون الفكرة دى صح أصلا ، انا بكلمك عن اللى أنا فكرت فيه
وكمثال على الأفكار المؤذية ، أنا فى رواية النحات ذكرت فكرة من وحى خيالى كده مفيش مشكلة فى إنى أحرقها ، إن شالله ما حد حوش xD
تفتكر لو الكوكب ده كله سخر كل قدراته لصنع قنبلة قادرة على تدمير الكوكب نفسه ، تفتكر مش هنقدر نصنعها فى خلال كام سنة ؟ أو قرن حتى ؟
بدون أدنى شك هنقدر نصنعها ، ونلاقى الطريقة المناسبة لتفجير الكوكب بيها
طب تفتكر لو كل الناس ، أو أهم الناس على الكوكب -اللى صنعوا القنبلة دى- أقتنعوا إنهم عندهم إستعداد كامل إنهم يضحوا بحياتهم وحياة كل الناس وكل المخلوقات فى مقابل متعة فكرة إن هما بوظوا كل حاجة
تفتكر ساعتها هيحصل ايه بعد ما نفجر الكوكب ؟
خلاص مش هيبقى فى يوم قيامة ؟ مش هيبقى فى مهدى ولا دجال ولا شروق شمس من مغربها ولا كل ده ؟
هنبقى فعلا بوظنا كل حاجة ؟
هل النظام فعلا مش مزود بأنتى فيروس للحالات المماثلة ؟
وبصراحة أنا فى الفقرة السابقة رفضت فكرة إن حتى لو كل ده حصل ، فـ كل ده كان مُقدر ، وربنا هيخلق حياة تانية فى مكان تانى ، أو هيعيد نفس الحياة ونفس الكوكب ، والحياة دى هى اللى هيبقى فيها القيامة بعلاماتها المعروفة
علشان بصراحة الفكرة دى ضعيفة أوى لأسباب كتير مفيش داعى أشرحها بالتفصيل ، أى حد يفكر مع نفسه شوية هيعرف بنفسه إنها فكرة ضعيفة جدا
وطبعا كل ده جانب بيدور حول التمرد
فى جانب تانى اللى هو الوصول لحقائق بتهدد النظام بمجرد معرفتها
وده مش عايز أدخل فى تفاصيله ، رغم إنه مناسب أكتر لفرض إن البشر اللى بيهددوا النظام هما أذكى ناس وأكتر ناس فكروا فى حقيقة كل حاجة
بس الجانب ده بيتعارض مع حاجات مينفعش أتغاضى عنها ،
وهنا بقى نرجع بقى للبداية خالص
هو فى افكار ممكن تكون خطر على النظام أصلا -بجد- ، وتكون صح فى نفس الوقت ؟
هل الدين بيتعارض مع العقل ؟
طب لما الدين مبيتعارضش مع العقل يبقى إزاى العقل لما قدراته تزيد يبقى ضد الدين ؟
هو المفروض لما ذكائك يزيد تكتشف إنك المفروض تعمل اللى ربنا قال عليه ، ولا تعمل عكسه -مهو عكسه بس اللى هيبوظ النظام-؟
يبقى كده الناس دول فعلا فيروسات
والجانب التانى مرفوض ، والحقائق فى حالته ناقصة
عموما أنا هوضح الموضوع ده أوى فى الرواية
فـ ياريت محدش يفهمنى غلط ، أنا مجرد بفكر مش أكتر ، وبعد ما بفكر بحكم على اللى وصلتله ، هل هو صح ولا غلط ، نافع ولا مُضر ...الخ
أنا بس لقيت السؤال مهم جدا -للناس اللى بتفكر- فقلت أجاوب عليه ، علشان أفتحلكوا أفق جديدة للتفكير ، لحد مـ أتكلم عن الموضوع ده بالتفصيل فى الرواية
1726 people like this
معنى جميل فى تقاطع حياتك مع حياة المهمل قشرة الموزة و تقاطع حياتك مع المتبرجة النظرة و لو انتة كنت غضيت بصرك كنت متزحلقتش، انتة لخصت ازاى القدر والاختيار مع بعض بيشكلو حياة الانسان بمثال بسيط وجميل وعميق فنفس الوقت ، ورغم كده شايف ناس بتتلككلك على تفهات غير الرابرز الى محدش يعرفهم الى انتقدوك امبارح
أنت واحد حابب تستفيد ، فـ بغض النظر عن السؤال وإجابته ، قدرت تلاقى فى الكلام اللى أنا كاتبه حاجة تفيدك ، فهمت على الأقل إن "إختيار غيرك هو قدرك اللى مع اختيارك بيشكل مصيرك"
غيرك حاسس بـ النقص ، فـ حابب يحس إنه جامد أوى ، فـ يجيب كلمتين من على جوجل هو مش فاهم معناهم بس حاسس إن ليهم علاقة بـ الموضوع ، ويدخل يقولى أنت غلط ويسيب الكلمتين اللى عنده ، اللى ممكن يكونوا بيثبتوا صحة كلامى أصلا ، أو ولا بيثبتوا ولا بينفوا ولا ليهم علاقة بـ اللى بقوله أصلا
ودول برد عليهم لحد مـ أتأكد إنهم فعلا من النوع ده علشان أبقى رضيت ضميرى ، وبعدين بتجاهلهم أو أمسح تعليقاتهم أو أعملهم بلوك ، على حسب بقى
أما الرابرز اللى بتتكلم عنهم فـ دول بصراحة معذورين
أنا لو كنت حد غير الجوكر وكنت برضه بغنى راب -وده عمره ما كان هيحصل- ، كنت كرهت الجوكر وكرهت نفسى وكرهت الحياة كلها xD
بهزر طبعا ، أنا لو مكنتش نوح عـ الأقل كنت هركب
المهم يعنى
حط نفسك مكان ناس بتغنى راب بقالها سنين ، وأنا قلت لواحدة "كل سنة وأنتى طيبة" بقت أشهر منهم كلهم
ده على سبيل الترويش ، قصدى المثال يعنى
xD
لو انت مكانهم مش هتعيش باقى عمرك بتسب وتعلن فيا ؟
xD
يلا ربنا يسامحهم
وعموما ده مش معناه إن الشهرة مقياس لأى حاجة ، بس فى حالتى أنا وهما مقياس ، علشان إحنا فى نفس الوسط وبدأنا بنفس الإمكانيات ، بس الفرق بين اللى بقدمه واللى بيقدموه عمل الفرق اللى انت شايفه ده
أما واحد بدأ وهو نجم أصلا ، أو أتصرف عليه من أول ما ظهر وأتفرض على الناس ، ده ميقارنش بينا ، ده بيتعرض على 10 مليون ، -المنتج المنسوب ليه- بيبهر ألف ، أنا بتعرض على مليون ببهر المليون ، فـ الفرق هنا فى الفرص بس
فضلا عن كون المنتج اللى هو بيخرجه مصروف عليه فلوس ومجهود فريق كامل ، أنا المنتج اللى بخرجه متصرفش عليه غير تفكيرى
بس أنا مؤمن تماما إنه موضوع وقت مش أكتر ، الحمد لله على اللى أنا وصلتله فى سنتين ، رغم كونه لا يوازى اللى أنا بقدمه أبدا ، بس دى ضريبة لازم اللى زيى يدفعها عـ الكوكب ده وفى البلد دى تحديدا ، وعموما بيننا الزمان هو اللى بيمحى ويخلد :)
1868 people like this
انا شوفت سؤال على جروب للملحدين سواء جابتو بأيوه أو لأ هيبقى ربنا مش حقيقى ** السؤال بيقول هل ربنا يقدر يخلق صخره محدش يقدر يشيلها حتى هو نفسو ميقدرش يشيلها ؟ ياريت تفيدنى فى الموضوع ده لو تقدر
مفيش حاجة إسمها سواء جاوبته بـ آه أو لأ هتثبت إن ربنا مش حقيقى
هما بس بيخدعوك كالآتى
بيقولولك لو قلت لأ ربنا ميقدرش يخلقها ، يبقى فى حاجة أهو ربنا ميقدرش يعملها ، وده بينفى كونه إله كامل
وطبعا بيرفضوا فكرة إن مفيش حاجة إسمها صخرة ربنا ميقدرش يشيلها ، لإن ده بيتنافى مع فكرة الخلق
ولو قلت آه ربنا يقدر يخلق صخرة محدش يقدر يشيلها ، ولا هو نفسه يقدر يشيلها
هيقولولك إن بعد ما ربنا يخلق الصخرة دى ، هيبقى فى حاجة ربنا ميقدرش يعملها ، وهو إنه يشيل الصخرة اللى خلقها ، وده برضه ينفى كونه إله
بس هنا بقى الخدعة كلها
بص
الإجابة الصحيحة إن ربنا يقدر يخلق صخرة محدش يقدر يشيلها ، ولا هو نفسه يقدر يشيلها
وتكملة الإجابة كالآتى
وربنا كمان قادر يخلق الملاك "أو المخلوق أيا كان" اللى وظيفته -أو وظيفة من وظائفه- إنه يشيل الصخرة دى
وربنا كمان زى ما خلقها من العدم قادر يرجعها عدم
المشكلة كلها إن السؤال ده تافة جدا ، بس فعلا بعض الملحدين بيستخدموا الخدع دى مع بعض الموحدين ، وللأسف بتخيل على بعضهم
السؤال ده كان هيبقى بسيط أوى بالنسبالك لو كنت فكرت فى ربنا نفسه ، مش فى السؤال
ربنا "خالق" ودى نقطة أنا هركز عليها فى الرواية
وطبعا ربنا مش "خالق" بس ، هو كمان "مُعلم" لإنه علم آدم الأسماء كلها
المهم
خلينا فى نقطة إن ربنا خالق دى
ربنا خلق الإنسان ، وخلق الأرض اللى الإنسان هيعيش عليها بكل ثرواتها المُسخرة ليه ، وخلق كمان الملكين اللى بيدونوا أعمال الإنسان ، وخلق الملاك اللى هيقبض روح الإنسان ، والنار والجنة اللى هيحاسبه فيهم بعد ما يُبعث و و و الخ بقى من حاجات إحنا نعرفها وحاجات إحنا منعرفهاش
وربنا قدّر المقدرات اللى مع إختيارات كل فرد "اللى هو عنده علم مُسبق بيها" هتخلى كل حاجة تمشى فى الإتجاة اللى ربنا عايزه ، وكل حاجة تنتهى النهاية اللى هو عايزها
فربنا "فعال" لما يريد ، مش "فاعل" لما يريد
الفاعل بيقوم بالفعل بنفسه ، لكن ربنا مبيعملش كل حاجة بنفسه
ربنا لما بيكتبلك إن رجلك تتكسر ، بيكون خالق الشخص المُهمِل اللى ممكن تكون نقطة التقاطع الوحيدة بين حياته وحياتك إنه رمى قشرة الموزة اللى أنت أتزحلقت فيها وأنت بتبص على البنت المُتبرجة اللى ممكن تكون نقطة التقاطع الوحيدة بين حياتها وحياتك البصة دى ، وطبعا ربنا كان عارف إنك هتختار تبص مش تغض بصرك ، وده ميمنعش طبعا كون ده إختيارك اللى هتتحاسب عليه
لكن ربنا مرماش قشرة الموزة
وربنا ميقدرش ياكل موزة أصلا ، هو خلقها علشان الإنسان ياكلها ، لكن هو مبياكلش
ونقطة فعال لما يريد دى أصلا فكرة فى سطرين من سطور الرواية اللى شكلها مش هتخلص :D
يارب تكون فهمت حاجة
وأخيرا بعد ما تجاوب على السؤال ده فى جروب الملحدين اللى بتقول عليه ، قولهم إن ربنا مبيخلقش حاجة عبثا ، كل حاجة ربنا خلقها لسبب معين ، وأنا بصراحة مش شايف سبب لإن ربنا يخلق صخرة هو ميقدرش يشيلها ، هو أصلا كده كده ربنا مبيشيلش صخور ، وربنا معندوش إيدين زينا ، أنا مش فاهم الناس دى بتحاول تتخيل ربنا إزاى
والسؤال ممكن يكون خطفك ، لكن على فكرة السؤال زيه زى "هل ربنا قادر يخلق تفاحة ميقدرش ياكلها؟" ، آه ربنا بالفعل خلق التفاحة ، والتفاحة ربنا ميقدرش ياكلها زى الصخرة اللى ميقدرش يشيلها بالظبط ، وده مينفيش عنه كونه إله ولا حاجة ، مين اللى قال إن الآلهة بتاكل تفاح وتشيل صخور ؟
تصدق ندمت بعد ما جاوبت السؤال علشان فعلا تافه
xD
2504 people like this
بتحب صاحبتك؟ وهل هيا جوكريان؟ ولو هيا جوكريان فهل هيا جوكريان من الأول ولا بعد ما اتصاحبتو؟ وهل ممكن تصاحب واحده من جمهورك بعد كده؟
الأسئلة اللى فى المنطقة دى بقت بتتكرر على الأسك ، ودى مش حاجة حلوة ، علشان أنتوا المفروض عارفين إن مش دى نوعية الأسئلة اللى بجاوبها أبدا ، ولو مش عارفين ، أدينى بجاوب السؤال ده علشان تعرفوا
مكنش بوست كتبته على الفيسبوك
كان ممكن تعتبروه هزار ، أو إن قصدى صاحبتى زى أختى ، أى حاجة يعنى
عموما علشان نقفل الموضوع ده
أنا مش مصاحب ، ومش بصاحب أصلا
وحدودى فى التعامل مع جمهورى واحدة ، معنديش ولد ولا بنت ولا كبير ولا صغير
يمكن عندى ذكى وغبى مش أكتر
2992 people like this
انت فين م الى بيحصل دلوقتى؟؟؟
فى البيت
2835 people like this
https://www.facebook.com/3moeljoo/posts/10205152642642122 يعنى ايه وانتوا اغنى ناس بالفقر؟؟؟
الفقر فقر القيمة ، وانتوا أغنى ناس بالفقر
انتوا أغنى ناس بـ الفقر ليها معنيين
الأول: إن هما أغنى ناس بفقر القيمة ، لإنى عرّفت الفقر فى المقطع الأول من الجملة على إنه فقر القيمة ، اللى هو كون المنتج الفنى اللى بيقدموه فقير وقيمته قليلة جدا ، فـ كونهم أغنى ناس بالفقر ، ده معناه إن هما بيقدموا أفقر منتج فنى ، اللى قيمته تكاد تكون لا شيئ ، لإنهم مش مجرد فقراء ، لأ دول أغنى ناس بالفقر
المعنى التانى: إن هما أغتنوا -عملوا فلوس كتير- بسبب المنتج الفنى الفقير اللى بيقدموه ده ، علشان زى مـ انت عارف صدر دينا بست أصفار ، وفى السوق تمن التراب ستة أصفار
كده يعنى
فـ هما بقوا اغنى ناس ، بالمنتج لفقير اللى بيقدموه ده
2420 people like this
كتبت عندك قبل كدا (مترجعش لوحدك ميل طول عمرنا عن حوا بعيد) مش المفروض ان جوكر هو الى بعيد عن البنات والحب لكن احمد بيحب؟
قبل مـ أجاوب بس عايز ألفت نظرك لحاجة
فى الشعر فى أخطاء بسيطة كده فى الضمائر وحاجات تانية يجوز للشاعر أن يرتكبها لغرض شعرى معين
أنا فى كتاباتى برفض ده تماما ، لكن فى أخطاء أنا برتكبها -عمدا- بغرض إنى أوصل فكرة معينة ، وخلى بالك من فكرة معينة دى ، علشان فى فرق كبير بين كون الغرض من الخطأ ضبط قافية أو ما شابه ، وكون الغرض من الخطأ ، إن الخطا ده نفسه فكرة
النوع الأول ده معروف فى الشعر من أيام الجاهلية ، النوع التانى اللى الخطأ فيه بيكون بغرض إضافة أو توضيح فكرة ، ده من إختراعى
زى مثلا لما قلت فى أغنية "فى اختلافنا رحمة" ( إبن آدم خطائون ) ، وطبعا إبن آدم مفرد ، فكان لازم أقول (إبن آدم خطاء) ، أو لو كنت متمسك بالقافية ، كان ممكن أقول (بنى آدم خطائون) ، وده يثبتلك إن الغلطة دى مش جاية علشان أظبط القافية وخلاص ، لأ القافية أهى كنت ممكن أحافظ عليها من غير ما أغلط (بنى آدم خطائون) ، طب أنا غلطت الغلطة دى ليه؟
علشان أؤكدلك فكرة إن كون (فلان) شيخ بدقن ، فده مش معناه إنه مينفعش يغلط فى الدين ، زى ما انت شايف بعينيك فى الجملة إن كون الجوكر "اللى انت عارفه فى الكتابة" ، مش معناه إن الجوكر مستحيل يرتكب أخطاء فى الكتابة
فـ انا عملت الغلطة دى عمدا علشان أؤكدلك الفكرة اللى أنا أصلا بتكلم عنها
نفس الكلام فى الجملة اللى انت بتسأل عنها
المفروض إن زى مـ انت بتقول ، الجوكر هو اللى بعيد عن حواء وعن الحب والكلام ده
لكن لازم تلاحظ إن الجوكر هو المسيطر على الكيان كله ، إذا فـ بُعد الجوكر عن حوا بيخلى أحمد -غصب عنه- بعيد عن حوا هو كمان
وعلشان كده قلت "طول عمرنا عن حوا -بعيد-" ، وهتلاحظ إن الضير اللى بعد كلمة (عمر) جمع ، بيعود على أحمد وجوكر يعنى ، لكن كلمة (بعيد) جت بتعبر عن المفرد ، بتعود على جوكر بس يعنى
مقولتش (بعيدين) ، أو بالعامية (بوعاد) ، وكاتبهالك كده علشان تعرف تقرأها xD
المهم يعنى إنى بدل ما أقول ، "طول عمرى عن حوا بعيد ، وانت يا أحمد علشان أنا مسيطر عليك فده خلاك انت كمان بعيد عن حوا غصب عنك" ، اختصرت كل ده بـ "طول عمرنا عن حوا -بعيد-" ، وجمهورى كده كده عارف مين أحمد ومين الجوكر ، فلما يسأل نفسه هو ليه غلط وقال "بعيد" تعود على مفرد وهو بيتكلم عن مُثنى ، هيعرف يجاوب على نفسه ، وهيفهم إن دى مش غلطة ، بالعكس دى فكرة
هتلاقى بقى فى بعض الأغانى بتاعتى حاجات كده تفكر فيها تلاقيها غلط ، تفكر فيها أكتر ، تلاقى إن الغلطة دى أصلا فكرة إضافية
2073 people like this
فى لقائك على اون تىفى قولت انك استفدت من القران فى كتابتك وقولت المثال بتاع الموضغه وقولت الجملتين اللى انت كاتبهم وبعدين المذيعه مسابتكش تكمل وتكلمت هيا ** ممكن تقول الموضوع ده كله علشان انا ابويا نفسو عايز يعرفو؟؟؟؟؟
القرآن لما شبة الجنين فى مرحلة من مراحل نموه بالمضغة ، مش بس كان فى وجة شبه بين الجنين فى المرحلة دى والمضغة ، لأ ده أحنا لما ندرس المشبة به "اللى هو المضغة" ،هنلاقى أوجة شبه كتير ، أو بمعنى آخر ، هنلاقى معلومات القرآن حب يوصلهالنا عن الجنين فى المرحلة دى
-الجنين فى المرحلة دى بيكون حجمه -تقريبا- قد حجم المضغة "قطعة اللحم اللى بنمضغها مثلا" ، ويبلغ طوله 1سم تقريبا
-الجنين فى المرحلة دى بتبدأ الفلقات تظهر فيه "ارتفاعات وإنخفاضات" ، وهى تشبه علامات طبع الأسنان على المضغة
-الجنين فى نهاية المرحلة دى بياخد شكل حرف (سى) ، وعلى فكرة أى حاجة بعد ما بنمضغها ، لما بنيجى نبلعها ، بتاخد شكل حرف (سى) علشان يسهل بلعها
من الآخر إحنا لما درسنا المشبة به "اللى هو المضغة" جمعنا معلومات كتير عن المشبه "اللى هو الجنين فى المرحلة دى" ، مش مجرد لقينا وجه شبه واحد
الجملتين بقى اللى أنا قلتهم فى الحلقة
خروجك من مدارى مكنش فقد إلكترون
كان فقد آخر كوكب كان عليه حياة فى الكون
لو بصينا مثلا على المجموعة الشمسية ، هنلاقى الشمس فى المركز ، وبيدور حواليها مجموعة كواكب
ولو بصينا على الذرة ، هنلاقيها نواة موجبة فى المركز ، وبيدور حولها مجموعة إلكترونات
فـ أنا رفضت تشبية خروجها من حياتى بخروج إلكترون من المدار اللى بيدور فيه ، وقلتلها إن خروجها من حياتى كان خروج آخر كوكب كان عليه حياة فى الكون كله
ولو درسنا بقى الفرق بين النموذج اللى أنا رفضته ، والنموذج اللى أنا اخترته ، هنجمع معلومات كتير كنت عايز أوصلهالها
-كنت عايز أقولها إنها مش حاجة سلبية فى حياتى ، فمن المعروف إن الإلكترون شحنته سالبة ، وقلتلها إنها كانت آخر كوكب كان عليه حياه فى الكون كله ، فخروجها من حياتى هيخلي حياتى نفسها مفيهاش حياة
-كنت عايز أقولها إن اللى بيننا مش صغير ، اللى بيننا كبير جدا
فكر كده بعقلك ، هل قوة التجاذب بين الإلكترون والنواة ، قد قوة التجاذب بين -مثلا- الشمس والأرض.؟؟
-وكنت عايز أقولها إن علاقتنا فريدة من نوعها ، مش حاجة عادية ، أو موجود منها عدد لا يحصى
فكر برضه بعقلك -بإعتبار الأرض آخر كوكب عليه حياة فى الكون- هل فى مجموعة فى الكون كله شبه المجموعة الشمسية ؟؟
-وكنت عايز أقولها إن مكانتها فى حياتى غير مكانة أى حد تانى ، أو ممكن تفسرها بمعنى إنى عمرى ما خنتها ، لإن المدارات اللى بتدور فيها الإلكترونات بيدور فيها أكتر من إلكترون ، أول مدار أصلا بيبقى فيه إلكترونين (عدا الهيدروجين ، فيه إلكترون واحد ، والوضع ده بيتغير لما بيدخل فى رابطة) ، أما المجموعة الشمسية -مثلا- فمستحيل تلاقى كوكبين فى مدار واحد ، كل كوكب ليه مدار خاص بيه ، زى ما هيا ليها مكانه خاصة فى حياتى ، مبيشاركهاش فيها مخلوق
-كنت عايز أقولها إنى مستحيل أحب وأرتبط بعدها ، وطبعا الذرة لما بتفقد إلكترون ممكن تكتسب غيره ، لكن -ولنفرض جدلا- إن الأرض خرجت من مدارها ، هل الشمس هتكتسب كوكب تانى مكان الأرض ؟؟
ولو هتكتسب ، هل هيبقى عليه حياة ؟
لأ طبعا ، مهى آخر كوكب عليه حياة فى الكون كله ، مش فى مجموعة معينة
يارب تكون وصلت
وطبعا أنا مبقولش إنى بتحدى القرآن ، بالعكس ، الفضل للى أنا فيه ده راجع لتعمقى فى الإعجازات القرآنيه
بحطم الأصنام اللى انتى عايشة بتعبديهم
علشان تتوبى ، مش تعمليلى واحد وتسجديله
2498 people like this
انت مش رفضت تظهر مع باسم علشان ميتقالش عليك جوكر الى طلع مع باسم؟ ليه دلوقتى هتطلع على الآون تى فى؟ وليه هتبقى من نجوم الشاشه؟؟ مش دول المعرصين؟؟هتطلع مع المعرصين؟؟
بص
قبل ما أجاوب على السؤال بس ، أنا عايز أوضح الظروف الخاصة للبرنامج ده
معدة البرنامج اللى أنا هطلع فيه ده تبقى أم لتلات بنات جوكريانز ، وهى نفسها جوكريان ، ويوم حفلتى الأخيرة جاتلى بعد الحفلة وطلبت منى إنى أطلع فى البرنامج ده ، فـ أنا محبتش أكسفها وأرفض
أما عن المبدأ نفسه
فـ أولا: أنا أشهر من البرنامج اللى أنا هطلع فيه ده ، فمستحيل يتقال بعد كده جوكر اللى طلع مع فلانة أو فى برنامج كذا ، ده انت بعدها لو حد سأل أى جوكريان "تعرف برنامج كذا؟" هيرد يقوله "مش ده اللى طلع فيه الجوكر؟" ، ياريت تلاحظ إنى دلوقتى أشهر بكتير مما كنت وقت ما باسم طلبنى فى حلقة من حلقاته ، والبرنامج اللى أنا طالع فيه نفسه شهرته متجيش عُشر شهرة برنامج باسم
ثانيا: أنت حرفت مفهوم "نجوم الشاشة" علشان تحسس نفسك إنى بعمل عكس ما بقول ، نجوم الشاشة دول ياباشا المقصود بيهم فقراء الموهبة والفن اللى بيتفرض عليك طول مـ انت قدام الشاشة تشوفهم ، لمجرد إن هما بيعرصوا للنظام ، أو لإنهم بيقدموا التفاهة اللى بتعشقها الميديا أو أو ....الخ
إنما أنا بظهورى فى البرنامج ده مش هتفرض على حد ، ولا هعرص لحد ، ولا فجأة هيصيبنى فقر موهبة وفن وتفكير
فـ ظهورى فى البرنامج ده مش هيخلينى "نجم شاشة" بالمعنى اللى أنا قصدته لما قلت "جوكر مش من نجوم الشاشة" أكيد
ثالثا: أنا مش طالع مع لميس الحديدى ، ولا طالع فى برنامج سياسى أصلا علشان تقول إنى هطلع مع المعرصين ، ده برنامج ليه إتجاة تانى خالص
رابعا: فى الفترة الأخيرة الناس كلها طلبت منى إنى أظهر فى أى برنامج علشان اقرب منهم وأعرفهم بنفسى وبـ اللى بقدمه أكتر ، يعنى ده مطلب جماهيرى قبل أى حاجة
غير كده الناس اللى بتعارضنى على اى حاجة "اللى أغلبهم -لو مكنش كلهم- رابرز" كانوا بيقولوا إنى أصلا معرفش أظهر على الشاشة ، مش مش حابب أظهر على الشاشة
فظهورى فى البرنامج ده هيرضى دول ، ويخرس دول
ورضا دول يهمنى ، وسكوت دول هيريحنى
والأهم من ده كله
أتفرج على الحلقة ، لو لقيت إن اللى انت شايفه قدامك ده مش الجوكر اللى انت تعرفه ، أبقى قول إن الجوكر باع دماغه
وعلى فكرة أنا مش واخد ولا مليم فى الحلقة دى
أما عن الناس اللى مستنيه الحلقة ، اللى هما كده كده هما اللى بيطلبوا منى ده من فترة ، فـ أنا بوعدهم بحاجة مُختلفة وقيمة كالعادة
وبوعدهم إنى هقربهم منى ومن اللى بقدمه أكتر ، وأخلى الصورة أوضح ، وهتكلم شوية عن الرواية ، وشوية أكتر عن اسلوب كتابتى نفسه ، وهغنى لايف طبعا
وهتتبسطوا إن شاء الله
وشكرا للجميع
<3
3911 people like this
انا هبقى طاير مالفرحه لو انتا رجعت تانى بس فى ناس كتير بيقولو انك هتسقط من نظرهم لو رجعت فقرارك ايه ردك عليهم؟؟؟؟
أنا ممكن أرد عليهم بجملة واحدة بس تقطم الموضوع ده كله "كل ما أقول هعتزل برجع فى القرار علشانك" ، يعنى الناس اللى بتقولك إنى هسقط من نظرهم لو رجعت فى قرار الإعتزال ، هما أصلا عارفين من "واحد أبريل" إنى ياما خدت القرار ده ورجعت فيه ، بس كل الفرق إن كل مرة ده كان بيحصل بينى وبين نفسى ، لكن المرادى أنا كتبت بوست إنى هعتزل لما جبت آخرى
وعموما ، أنا فى كل المرات اللى رجعت فيها ، رجعت -علشانك- وأظن ده واضح أوى يعنى ، مش محتاج إنى أوضحه
بس أنا بقى عايز أقول حاجة
الناس الأندرجراوند اللى بتقولك جوكر لو رجع هيسقط من نظرنا دول
أحب أوضحلهم إنهم لو كانوا أعتزلوا فلقوا ليهم جمهور عمل هاشتاج زى #كمل_يا_جوكر ، اللى أتقيم على تويتر كواحد من أكتر الهاشتاجات العربية النشطة
لو ليهم جمهور قالهم الكلام اللى جمهورى قالهولى علشان أرجع
لو بعض النجوم اللى هما يادوبك بيشوفوهم فى التلفزيون طلبوا منهم إنهم يكملوا ، وعبروا عن إيمانهم بالفن اللى هما بيقدموه
لو كان طلعلهم مذيع فى شهرة "أحمد يونس" على نجوم إف إم ، ومدح فى أعمالهم وفنهم وإسلوب كتابتهم ، وطلب منهم إنهم يكملوا لإنه شايف إنهم فعلا بيقدموا فن حقيقى بيفيد الناس
لو كان أتكتب فيهم أكتر من عشر قصائد علشان يرجعوا ، منهم أكتر من قصيدة كاتبينهم شعراء مشهورين وليهم دواوين طُرحت فى السوق
لو كان أتعمل فيهم أكتر من عشر أغانى علشان يرجعوا ، منهم راب ومنهم مش راب
الخ
دول مكانوش هيرجعوا بسبب إن كل ده هيهون عليهم الضغوط اللى كانت سبب إعتزالهم وهيحسسهم إنهم بيغيروا فعلا فى مجتمعهم وهيديهم أمل فى إن بكرة أحسن بس ، دول كانوا هيرجعوا ويجيبوا أبهاتهم وأمهاتهم يغنوا معاهم xD
بلاش نضحك على بعض
أسقط من نظر مين؟ ، دول كده كده ناس كانوا هيموتوا وأنا مظهرش اصلا علشان يعرفوا ياكلوا عيش ، فما صدقوا إنى قررت أعتزل
وعموما رغم كل ده ، أنا مايل الفترة دى لـإنى أرجع بعد كل اللى شوفته ده "حتى لحد ما أنزل الرواية" ، بس أنا لسة مأعلنتهاش صريحة ، علشان لسة عايز أتأكد من كذا حاجة
وبالمناسبة دى بقى ، أحب أشكر
-الفنان أحمد صلاح السعدنى "لو صح اللى شوفته"
-الطفلة العسولة منة عرفة
-المذيع أحمد يونس
-الشاعر محمد هشام رجب
-الشاعر عمرو حسن
-الجوكريان الأصيلة امنية محمد
-شاعر المستقبل أحمد رشدى
-وكل الجوكريانز اللى عملوا الأغانى اللى فى الفيديو التانى من الفيديوهات اللى عملتها صفحة "جوكريانز آند براود" كتقرير عن حملة #كمل_يا_جوكر
-الإنسانة اللى شايلة كيان "جوكريانز آند براود" فوق كتافها ، الجوكريان الأصيلة: منار توفيق
-وأشكر كل الجوكريانز اللى شاركوا فى #كمل_يا_جوكر
-وكل الجوكريانز اللى طلبوا منى إنى أرجع سواء فى بوست أو فى كومنت أو أيا كان ، وكل الجوكريانز اللى أتمنوا رجوعى
وأنا ولله مش بتقل عليكوا ، بس مش عايز آخد قرار وأرجع فيه تانى
أنا خلاص مايل للرجوع -حتى لحد ما أنزل الرواية- بسبب تمسككوا بيا اللى فعلا قتل يأس كان قرب يقتلنى
بس محتاج فترة أتأكد فيها إنى فعلا عايز أكمل مهما كانت الظروف ، علشان عارف طبعا إنى لما أرجع هرجع أتهاجم وأتشتم بشراسة أكتر من الأول ، فعايز أتأكد إنى مستعد لده ، وإنكوا مستعدين لده ، وإنى فعلا أثرت وهأثر فيكوا
معلش استحملونى ، وانتوا عارفين غلاوتكوا عندى ، أعتبرونى حابب أشوف غلاوتى عندكوا بوضوح
ودول الفيديوهين اللى بشكر صفحة جوكريانز آند براود على مجهودهم فيهم، وبشكر كل اللى شاركوا فى الفيديوهات دى بأى حاجة
وبشكر كل الجوكريانز عموما ^_^
<3
2794 people like this
لو انت فعلا عندك اجابه لكل حاجا جاوب كل الاسئله اللى عندك مش الى على مزاجك؟؟ وبعدين انت بتقول ان الست صفار دول اى حد بيفهم انهم المليون لكن قيمتهم الحقيقيه صفر ** طب ما على كده لما بتقول قلم نزار بعوشر السعر ممكن يبقى معناها ان قلم نزار برضه بصفر علشان الصفر عوشر الصفر؟؟؟؟؟ جاوب لو تقدر؟؟؟
جاوب لو تقدر :D
انت كده حد فشيخ يعنى :D
طيب بص ياعم الفشيخ ، أنا عندى أكتر من 60 ألف سؤال على الأسك
أجاوبهم أمتى دول بقى والنبى ؟؟
أنا بقال حوالى سنة على الأسك ، ومجاوب 510 سؤال ، بالسؤال بتاعك ده
أنا يا حبيبى مش هقضى عمرى كله بجاوب أسكات علشان أثبتلك إنى فشيخ زيك ، وعندى إجابة لكل سؤال أو انتقاد
ثانيا
أنا قلت إنى لما بقول "ستة أصفار" ببقى بتكلم عن حاجة بتتقدر فى السوق بملايين "سعرها ملايين" ، لكن قيمتها الحقيقية "صفر" ، زى ما تعبير "ست أصفار" كده لما أى حد بيسمعه بييجى فى باله المليون ، لكن الستة أصفار جنب بعض قيمتهم الحقيقية صفر
وهنا لازم تفرق كويس بين "القيمة" و "السعر" ، السعر ده اللى بيحدده طلب السوق للسلعة ، لكن القيمة مبيحددهاش إلا الشيئ نفسه ، هو يا شيئ أو عمل أو أو الخ قيم ، يا مش قيم ، ليه قيمة حقيقية يعنى ، أو ملوش قيمة ، مع أختلاف القيم طبعا ، أما السعر زى ما قلتلك موضوع عرض وطلب
فـ أنا لما أقول "قلم نزار بعُشر -السعر-" فـ أنا هنا حددت إنى بتكلم عن السعر ، اللى بيتوقف على طلب الجمهور للحاجة دى ، فمش معقول تقولى عُشر السعر ده صفر ، لأ ده عُشر القيمة هو اللى صفر ، أنا حددت إنى بتكلم عن السعر "اللى هو فى حالة صدر دينا مليون أو ملايين طبعا" ، والمقصود كان إننا لو هنحسبها نسبة وتناسب ، فـ قصاد كل عشرة عايزين صدر دينا ، فى واحد عايز قصيدة لنزار
ودينا ولا أفشخ رقاصة ، ولا نزار أفشخ قلم ، أنا كنت بضرب مثل بس
فهمت حاجة يا مسيو فشيخ ؟
لو انت فعلا عندك اجابه لكل حاجا جاوب كل الاسئله اللى عندك مش الى على مزاجك؟؟ وبعدين انت بتقول ان الست صفار دول اى حد بيفهم انهم المليون لكن قيمتهم الحقيقيه صفر ** طب ما على كده لما بتقول قلم نزار بعوشر السعر ممكن يبقى معناها ان قلم نزار برضه بصفر علشان الصفر عوشر الصفر؟؟؟؟؟ جاوب لو تقدر؟؟؟
2436 people like this