-
-يوم البعث- ، يمكن مستخفّين فيه احنا نوعا ما ! يعني اغلب تفكيرنا دينيا يكون عباره عن جنه او نار ، لكن خل نركّز في نقطه قيام الساعه ، هول هذا اليوم ، كمية الفجيعة التي لا يمكن ان يستوعبها عقل بشر ، الشعور اللي اقوى من ان الخلق جميعم يستوعبونه لدرجة ان الله من هول هذا اليوم قال -وترى الناس سكارى وماهم بسكارى- ، -وتضع كل ذات حمل حملها- ، الحامل ! اللي بالقوه عشان تولّد في الدنيا اللي بعد مليون تنهيده وصرخه بس عشان ينزل الجنين ، ومن هول هذا اليوم -وضعته- بكل اريحيه بدون عسر بدون الم حتى !! مستوعبين شدّه الهول والفزغ اللي يوصل الى هذا الحد ! فكّرو معي في اللحظه اللي صدق ما ينفع فيها ندم ، تذكّرت كل فعل شين سويته بحياتك ، ندمت ع صلاتك اللي كانت مجرد اعفاء لضميرك من التأنيب ، كل ذنوبك وكل شريط حياتك مر قدامك كأنّها كانت ساعه ، امك وابوك واخوانك وصاحبك ما ينفعونك ولا بذرّة واحده ، حتى انهم في هذا اليوم م يدرون عنك اصلا كلهم حتى الانبياء مبدأهم الوحيد هو-نفسي نفسي- اذا ان الانبياء المعصومين المنزهين اللذين اصطفاهم الله من فزعهم يقولون نفسي نفسي ، نحن البشر العاصين المذنبين اللي عارفين لولا رحمة الله بنهلك جميعنا ايش تتوقعون بتكون رده فعلنا في يوم كهذا ! ، الشمس فوق رأسك ، الشمس اللي م تتحملها لمدة دقايق انت في -الدنيا- اللي بعيده عنك مئات الأميال ، تشوف ناس مستظلين ناس ساجدين ، ناس ماتو بحسن خاتمة لان اعمالهم الدنيويه كانت حسنة ، لكن انت م سويت شي ف دنيتك ، ينفع الندم الحين ؟ -ويوم يعض الظالم على يديه يقول ياليتني قدمت لحياتي- ما بينفعك ، هذي الحياه متاع الغرور التافهة البسيطه الابتلاء اغرتك واخذتك في دهاليزها خلتك تخسر المقام الابدي ! الجنّه ، ركز على كلمة -ابدي- مافي رجوع ، مافي ندم ، مافي عذر ، عذاب ابدي او نعيم ابدي ، من هول هذا اليوم وشده الانتظار الناس يتمنون انهم يدخلون نار جهنم خلاص لان ملّو سئموا ، الانتظار اللي لو نص ساعه في الدنيا ممكن نرتكب جريمه من الطفش ، ما بالك انتظار من طوله يتمنى الناس انهم يدخلون جهنم خلاص ؟ ومابالك بانتظار طويل عريض مليء بالندم والحسره ، تتذكر كل شي سيء سويته ، تتمنى لو انك سويت حسنه وحده بس تقيك من شر هذا اليوم ، تتتمنى لو ان صلاتك شفعتلك او صدقتك اظلتك ، تتمنى لو انك ترجع بس يوم واحد تتمه كله بطوله وعرضه ساجد ، لكن كلها اماني ، مافي رجوع ولا في خلاص من هذا الكرب ، فكّر في كل شي تسويه ، هو يستاهل انّك في يوم من الايام تبكي دم في جهنم عشانه ؟ او تعض اصابعك ندم عليه ؟ .
