Ask @AbdallahAli966:

انا عرفت اعمل بعض الدواير SMD منزليا ولله الحمد بس كانت مقتصرة على مقاومات وترانزستورات فقط هل ينفع اعملها فالبيت بchips بردوا وهل دا مش هعرف اعمله في حالة الchips اللي بتحتوي على عدد اطراف كبيرة؟؟

abdelrahman magdy
بالتأكيد - تقريباً كل الـ IC الي ليها smd package عدد اطرافها أقل من 48 ينفع تتلحم يدوياً والـ footprint الخاصة بيها على الـ PCB بتكون كبيرة نسبياً فسهل تتعمل في البيت (ما عدا الـ BGA package)
دا مثال بسيط على عمل بوردة اردوينو نانو
http://hackaday.com/2017/02/22/from-zero-to-nano/
وyoutube عليها مئات الفيديوهات الي بتشرح الـ SMD soldering للايسيهات المختلفة

View more

لو حد سالك عن بنت عايز يتقدم لها وانت تعرف عنها معلومات سيئه ..هتختار مبدء الستر ومن ستر مسلما ؟؟ولا من يكتم الشهاده فهو اثم قلبه وتقوله الحقيقه 👇❕؟؟

لست أهل للرأي الفقهي في ذلك اﻷمر - الا ان حد علمي أن الستر أولى في حالة ان البنت دي تابت عن كل ما فعلت ولم تعد له
والرسول (وكذلك من بعد بعض الخلفاء الراشدين) كانو كلما أتاهم شخص قد اتهم (او اعترف) بالزنا وهو أشد الفاحشة أمروه بالستر على نفسة ولا عقوبة له في حالة التوبة وتقع العقوبة في حالة تكرار اﻷمر
- اقرأ قصة "ماعز بن مالك"
- قصة المرأة الغامدية

View more

السلام عليكم ورحمة الله عندي سؤالين اولا كتاب الإلكترونيات ببساطة لعلك تتذكره نشرته في أحد دور النشر ليس الهدف الربح المادي فحسب ولكن لأنني لا أعلم طريقة للنشر وعرضته علي بعض المواقع مثل هنداوي ولكن تم رفضه بسبب قلة المصادر فيه ... أريده مفتوح المصدر ... هل من مواقع اخري أو طرق للنشر

وعليكم السلام ورحمة الله وبركاته
بالنسبة لجعل الكتاب مفتوح المصدر فهذا أمر بسيط كل ما عليك فعله هو إضافة نص رخصة المشاع الإبداعي creative common في أول صفحة بعد الغلاف مع رفع الملفات المصدرية للكتاب مثل word file
بالنسبة للنشر فهذا أمر يسير.. العديد من المواقع تتيح نشر الكتب مجاناً أو بمقابل مادي مثلاً موقعwww.scribd.com/ يقدم كل خيارات النشر أيضا هناك موقع lulu.com ويقدم خدمة الطباعة أيضا
واخيرا يمكنك نشر الكتاب على احد المواقع المهتمة بتخصص الالكترونيات مثل kutub.com أو simplyarduino.com او eletorial أو يمكنك عمل مدونة مجانية خاصة بالنشر ورفع الملفات عليها
اسأل الله لك كل التوفيق :))

View more

RealTime Operating Systems ممكن تفهمني ببساطه يعني ايه المصطلح دا ؟ وشكرا

بالفعل كتبت شرح مفصل للمفهوم وطرق تطبيقة في كتاب Simply AVR
هتلاقية في الفصل رقم 11 من أول المفهوم لحد البرمجة بأكتر من طريقة مع تطبيق عملي على نظام FreeRTOS
http://simplyarduino.com/%d9%83%d8%aa%d8%a7%d8%a8-simply-avr/
وأسف جداً على التأخير في الرد :))

View more

رأى حضرتك فأن لازم يكون ف mentor لأى حد أو حتى سؤال أكتر من شخص و مقولة "من كان شيخه كتابه كثر خطئه عن صوابه"

المرشد (Mentor) من أهم ما يجب البحث عنه
الموضوع مش متعلق بالعلم او الكتب والمعرفة وانما "خبرة المواقف" وجود Mentor في حياتك هيغنيك عن خوض بعض أسوء التجارب أو هيعرفك ازاي حتى تواجه المشاكل الكبيرة في المجال

View more

ايه رايك فى الصداقه بين الولد والبنت

خلينا اﻷول نعرف معنى الصداقة بصورة سريعة:
- علاقة ود وتقارب + مشاركة للاحداث والكلام والتفاعل وكذلك الاهتمامات ودا يشمل انشطة زي المقابلات والتحدث والخروج بغرض النزهة أو مجرد اللقاء. أيضاً الصداقة تشمل تقديم المساعده والنصح سواء على الجانب الجسدي أو النفسي
طبيعة اﻹختلاف النوعي من الذكر واﻷنثى تحتم ان علاقة "الصداقة" علشان تحقق فعلاً بين جنسين مختلفين فالصورة اﻷقرب ليها هي "الزواج" - حتى المسمى الغربي لكلمة boy-friend (بالنسببة للبنت) أو Girl-friend بالنسبة للولد غالباً يحمل الطابع المشابه للزواج (من الجانب الجسدي والنفسي)
لو طبقنا كل ما سبق هنلاقي ان الصداقة بين البنت والولد مجرد وهم الناس بتحاول تقنع بعض انو موجود. الراجل صداقته الحقيقة تكون مع راجل يقدر يتكلم براحته وكذلك نفس اﻷمر مع البنت، أما اذا تبادل الرجل والفتاة نفس العلاقة دي يبقى لازم تكون في اطار الزواج فقط
طبعاً، الحكم الشرعي للموضوع دا واضح تماماً وأترك ليك موقع islamweb للبحث عن الفتاوى الشرعية الخاصة باﻷمر

View more

بالنسبة للمنح لدراسة الماستر في الخارج هل ممكن حد تقديره التراكمي مقبول او جيد تجيله منحة ؟ وعامة بيتكون ايه الشروط

أغلب (وليس كل) المنح "المجانية"والشاملة كل المصاريف وكمان مُرتب شهري بتتطلب ان التقدير يكون أعلى من "جيد" أو ما يوازية بـ GPA
دا مقال فيه تجميعه محترمة للمنح + شرح البيانات المطلوبة
https://www.facebook.com/photo.php?fbid=587879951375740&set=a.109800902516983.20110.100004612205258&type=3&theater
- بعض المعلومات المطلوبة من المقال:
المعاهد القوية في الشرق الاوسط للعلوم و التكنولوجيا
بيوفر المعهد كل مصاريف الدراسة
بيوفر المعهد كل الكتب المحتاجه الطالب للدراسة
لاب توب
المعهد هيرجع مصاريف امتحان التوفل و ال GRE الي صرفها الطالب
هيوفر المعهد منزل للطالب
هيوفر مصروف شهري ، و تذاكر سنوية للسفر
المطلوب من طلاب الماستر:
يكون حاصل علي شهادة البكالريوس في العلوم او الهندسة أو IT من جامعة معترف بيها.
معدله الدراسي يكون 0.3 في CGPA
يكون حاصل علي شهادة GRE بدرجة ١٥٥
شهادة توفل (ibt) بمعدل ٩١ أو شهادة ايلتس ب ٦.٥
٣ خطابات توصية
خطاب تحفيز و خطة بحث
المطلوب لطلاب الدكتوراة:
يكون حاصل علي شهادة الماستر في العلوم او الهندسة أو IT من جامعة معترف بيها
معدله الدراسي يكون 0.3 في CGPA
يكون حاصل علي شهادة GRE بدرجة ١٥٥
شهادة توفل (ibt) بمعدل ٩١ أو شهادة ايلتس ب ٦.٥
٣ خطابات توصية
خطاب تحفيز
نقطة بحثية
طريقة التقديم
كل الملفات المطلوبه تكون بصيغة PDF
ملف التقديم
https://masdar-institute-ascend.symplicity.com/applicant/login
سجل و املاء الملف
و آخر معاد للتقديم هو ٣١ مايو ٢٠١٦
معهد مصدر وشرح لطريقة التقديم
https://www.masdar.ac.ae/admissions/how-to-apply
------------------------------------------------
منحة الحكومة الكورية الجنوبة لدراسة الماستر أو الدكتوراة في كوريا
أكتر من 815 منحة في جميع التخصصات في جميع جامعات كوريا الجنوبية
هنا هتقدر تشوف التخصص و الجامعات الي ممكن تقدملها
http://www.studyinkorea.go.kr/en/cop/bbs/JobBoard/selectBoardArticle.do
طبعاً لكثرة المنح ، الشروط مختلفة ، و انا مقدرشي احصرهم في بوست واحد
المطلوب هو شهادة لغة انجليزية+ تقدير عالي في الدراسة العلمية
المميزات : راتب شهري + تأمين صحي+ سكن+ تذاكر سفر + كورسات لغة + حوافز + جائزة مالية بعد الانتهاء و العودة للوطن. ( الراتب بيختلف من شخص لشخص بنسبة لا تقل عن 900.000 وون)
المميزات كتيره و تعتبر من افضل المنح
هتملئ ملف التقديم و تسلمة لسفارة كوريا الجنوبية في بلدك مع الورق
الاوراق المطلوبة للماستر:
-شهادة الثانوية العامة بالعلامات
- شهادة البكالريوس
- بيان الدرجات
- صورة من الباسبور
-شهادات تطوع أو عمل أو امتحانات خاصة
خاطبين توصيه من دكاترة البكالريوس
-خطاب تحفيز
الاوراق المطلوبة للدكتوراة:
-شهادة الثانوية العامة بالعلامات
– شهادة البكالريوس
- بيان الدرجات
-صورة من الباسبور
– شهادات تطوع أو عمل أو امتحانات خاصة
خاطبين توصيه من دكاترة الماستر
-خطاب التحفيز
- خطة بحث
http://www.studyinkorea.go.kr/cmm/fms/FileDown.do?atchFileId=FILE_000000000045593&fileSn=6
يفضل انك تزور السفارة الكورية الجنوبية و تسأل عن آخر موعد للتقديم
منحة الحكومة التركية لطلاب البكالريوس و الماستر و الدكتوراة و ما بعد الدكتوراة ( الأبحاث)
أكتر من 1000 منحة في جميع التخصصات في جميع جامعات تركيا
ممكن تشوف الجامعات و التخصصات من اللينك ده
http://www.turkiyeburslari.gov.tr/index.php/en/turkiye-burslari/turkiye-burs

View more

لو سمحت يا باشمهندي انا كت عاوز اعرف هل المواتير الدي سي والسيرفو والمواتير اللي بتبقي متاحه علي مواقع رام والحجات دي استخدامها في اني اعمل العاب اطفال بس والا يا تري ليها استخدامات تانيه ؟ عاوز اعرف اتخدامات مواتير السيرفو والدي سي هل مهم وبيتحط في خطوط انتاج والا ايه ؟ :)

كل ما سبق ذكره بيستخدم في المنتجات الي بنستعملها في حياتنا يومياً
على سبيل المثال، جرب تفك "طابعة" Printer وتشوف المكونات الداخلية بتاعتها وحاول تشتري واحدة خردة من نوع inkjet وواحدة من نوع laser (سعرها هيكون ما بين 20 إلى 30 جنية) في اسواق الخردة.
جرب تفك "ماسح ضوئي" Scanner وشوف المكونات الميكانيكية وازاي بتشتغل
(تعرف ان الـ scanners بتشتغل بـ DC motors صغيرة زي بتاعت ألعاب اﻷطفال كدا :D ) ومعاها شوية Encoders علشان تحسب المسافة بدقة
بالنسبة للـ Servo والـ Stepper motos فدول أشهر تطبيقات ليهم هي الطابعات ثلاثية اﻷبعاد والـ CNC machines بشكل عام
أهم حاجة افتكر ان أفضل حاجة تتعلم منها انك تفك الحاجات الي حواليك وتتعلم منها، الهندسة العكسية دي أجمل شيء ممكن تتعلم منه في حياتك :D !!!

View more

لو اتعرض عليك مرتب مضاعف في شغل روتيني بس كويس مقابل انك هتخاطر و تبدأ في حلمك و شركتك هتختار ايه مع العلم انك بمجرد ما تدخل الشغل الروتيني هيتطلب منك تنميه مهارات معينه و احتمال تنسي اساسيات حلمك

معنديش مانع أقبل في البداية ...
شخصياً مقتنع ان البداية في عالم اﻷعمال بدون خبرة في شركة قائمة هو أمر غير "صحي" للشركات الناشئة،
صحيح ان الشركات غالباً بتديلك وظيفة روتينيه الا انك بتكتسب بعض مهارات التعامل مع الموظفين والشغل داخل فريق وكمان بتتعرف على بعض اساليب الادارة سواء بصورة مباشرة أو غير مباشرة من التعامل مع العملاء والزملاء
ممكن الواحد يبدأ حياته لحد لما يكتسب بعض الخبرات (والفلوس بردو ) ولما يلاقي نفسه وصل لمرحلة "التشبع" ساعتها يقدر يبني شركته أو يغير عمله

View more

الاختلاط .. ازاي اقنع خطبتي انها متشتغلش في مكان فيه اختلاط للعلم هي مقتنعة انه مش حرام في اطار العلمي هل انا علي حق ؟ و ايه الاجواء اللي ينفع تشتغل فيها و ايه لأ

أولاً (انا لست بأهل فتوى) لكن بشكل عام فالرأي الفقهي ﻷغلب العلماء انو لا يجوز الاختلاط شرعاً حتى وان كان بدعوى العمل (ممكن تراجع الفتاوى على موقع اسلام ويب) ودا رأي الشيخ "بن عثيمين" رحمة الله
http://ar.islamway.net/fatwa/3907/%D8%AD%D9%83%D9%85-%D8%A7%D9%84%D8%B9%D9%84%D8%A7%D9%82%D8%A9-%D8%A8%D9%8A%D9%86-%D8%A7%D9%84%D8%B1%D8%AC%D9%84-%D9%88%D8%A7%D9%84%D9%85%D8%B1%D8%A3%D8%A9-%D9%81%D9%8A-%D8%AD%D8%A7%D9%84-%D8%A7%D9%84%D8%B9%D9%85%D9%84
ودا رأي الشيخ صالح بن منجد
https://islamqa.info/ar/121684
وأخيراً موقع Youtube فيه عشرات الفيديوهات لمختلف الفقهاء من مختلف الدول الاسلامية واغلبهم متفق على حرمانية الاختلاط
(ملاحظة أخيرة عن الجانب الفقهي من باب اﻷمانة - دار الافتاء المصرية ليها رأي مخالف، لكن بصراحة انا لا أعمل بيه ﻷنها أصلاً مخالفة أراء معظم الفقهاء في أمور كثيرة خاصة اﻷمور المالية والتعاملات .. الخ)
ثانياً: اعرض ليها كل ما سبق من الجوانب الفقهية للموضوع بالدلائل والفتاوى وناقشها
ثالثاً: ممكن تبدأ تتكلم معاها عن طبيعة الشغل وتحاول تقنعها انها بدل ما تسيب الفكرة فاﻷفضل تدور على بديل مناسب، زي مكان يكون مخصص للنساء أو أغلب العاملين فيه من النساء
مثلاً في المجال التعليمي: المدارس الخاصة بالاطفال والحضانات
- بعض مراكز التدريب بيكون فيها مدربات للبنات فقط وكذلك للرجال
ربنا يوفقك ويهديكم إلى أرشد أمركم :)))

View more

ايه الأماكن ال ممكن اعملها رحلة علمية ف الجامعة ؟

لو تقصد انك تنظم رحلة من الجامعة لبعض اﻷماكن فأعتقد ان الجهات دي هتكون مناسبة (مع العلم ان التركيز على مجال الميكانيكا والحاسبات والاتصالات)
- مصنع بنها للالكترونيات (التابع للانتاج الحربي): دا نفس المنصع الي كان مسؤول عن تصنيع تابلت Inar محليا في مصر
- مصنع صقر للصناعات المتطورة
- مركز TIEC لريادة اﻷعمال في القرية الذكية: مركز بيقدم خدمات رائعة لاستضافة الشركات التقنية وتدريبات + حاضنات مجانية (يعني مكان استضافة + تمويل + تدريب على ادارة الاعمال) وساعات كتير بيعمل Events للطلبة لتدريبهم على ريادة اﻷعمال وتأسيس الشركات.

View more

هو وضع شغل الامبيدد في مصر بقي سئ ليه وقليل جدا عن الاول ؟؟؟

بشكل عام سوق الـ Embedded في مصر منغلق على بعض الشركات الكبيرة ومفيش تواجد حقيقي للشركات الصغيرة او المتوسطة
لكن معتقدش انو بقى سيء، فعلى حد علمي (من بعض اﻷشخاص في شركات زي Valeo) الاقبال على الوظائف بيزيد والشركات بتضيف ليها موظفين جدد بصورة كبيرة.
ممكن حصل بعض الاكتفاء لفترة صغيرة بسبب اغلاق شركة Intel وتسريح كم كبير من أفضل المهندسين (ودا خلى في تهافت بين الشركات الكبيرة على ضم اكبر عدد ممكن ليها من العباقرة دول) لكن سوق الـ Embedded في مصر مالزال بيستقبل ناس جديدة كل يوم
المهم انك تطور من نفسك علشان تصبح على قدر المنافسة
وكمان اﻷفضل لو ملقتش وظيفة انك تبدأ تفكر في شركتك الخاصة، مش بس هتعمل حاجة انت بتحبها وبتتحكم فيها وانما كمان هتزود فرص عمل لناس تانية غيرك :))

View more

هو اللى بيدرس فيزياء او رياضيات و يتطور فيهم بيبقى بعد كده شغل نظرى بس ولا بيشتغل عملى و فيه تطبيقات بيشتغل عليها و كده؟

أغلب المجالات دي ينفع تلاقي فيها وظائف "تطبيقية" لكنها منحصرة "غالباً" في الجامعات وبالتحديد العمل في أحد المختبرات كباحث، مثلاً معهد MIT بيصرف ميزانية تقارب 900 مليون دولار (بحسب احصائيات ميزانية سنة 2014) على اﻷبحاث والي غالباً بيتم تمويلها من الشركات الكبيرة.
على سبيل المثال، هتلاقي شركة زي Intel و IBM بتمول أبحاث تطوير أشباه الموصلات Sillicon ودا بيشغل مئات الباحثين سنوياً في مجال الفيزياء في الجامعات التي تتولى اﻷبحاث دي.
بالنسبة للرياضيات البحته فدي مجال عملها ضيق أكتر بكتير من الفيزياء وغالباً إما بيكون في شغل التحليل الرياضي للمجالات التانية، دا موقع لطيف بيجيب الوظائف المطلوبة "لخبراء الرياضيات" في شركات بمجالات مختلفة
https://www.mathjobs.org/jobs

View more

رجاء ابق صفحتك الشخصية للتحدث عن التكنولوجيا و الدين و الاخلاق و قلل من السياسة شوية لاننا بنهرب من هذا الواقع ... يعني شوية و شوية بس بلاش ايام كامله تبقي سياسة و سؤال باشمهندسات قسم باور كفاية عليه و جاوب باقي الاسئلة ...

بحاول بكل ما أقدر عليه أقلل بالفعل من السياسة لكن يأبى القلب أن يرى الظلم ويسكت + ان السكوت هو نوع من التسليم والخضوع للواقع وأعوذ بالله ان الواحد يوصل للمرحلة دي. فأضعف الايمان ان الانسان يتكلم على اﻷقل علشان تفتكر ومتنساش عسى انها تتغير أو تغير في الواقع البائس دا.
بالنسبة لسؤال البشمهندسات فهو كان آخر سؤال جاوبته وغالباً بنتظر اسبوع لتجميع اﻷسئلة قبل ما أبدأ اجاوبها علشان كدا هتلاقيه بقاله فترة :))

View more

ايه رأي حضرتك فى قسم باور للبشمهندسات ... و خاصتا بالنسبه للشغل ؟؟ و ارجو تكتبلنا كلمات تحفيز بتساعد نفسك بيها لما بتكسل او تحس بالاحباط ... وجزاك الله كل الخير

بالنسبة للشق اﻷول:
بشكل عام هندسة الطاقة (بكل مجالاتها الوظيفية زي Control - distribution) تعتبر من المجالات ذات طبيعة العمل القاسية نسبياً، ﻷن الشغل يا اما بيكون في مصانع أو محطات توليد الكهرباء أو في الشوارع والمدن لتجهيز اﻹمدادات .. الخ
فمعتقدش انو مجال مناسب للبنات بشكل عام بسبب طبيعة ظروف العمل،
أعتقد ان القسم اﻷقرب من نفس التخصص لكن بوظائف أكثر راحة ومناسبة للبنات هو "هندسة الحاسب" ثم هندسة "الاتصالات" ﻷن أغلب الوظائف بتكون ذات طبيعة "مكتبية" ومفهاش حركة كتير أو نزول للمصانع والتعامل مع بيئات قاسية.
-----------
بالنسبة للشق الثاني فأعتقد ان تلخيص كلمات التحفيز محتاج "كتب" ولا تكفي كلمات قليلة للتعبير عنها كلها :D
على أي حال دي أفضل العبارات والكتب إلى بحب أقرأها لما أحتاج "أشحن" الحماس جوايا،
العبارات:
---------------------
1- حديث رسول الله عن أول من يدخل الجنة وتحديداً وصف هؤلاء الناس ( الَّذِينَ تُسَدُّ بِهِمُ الثُّغُورُ ، وَتُتَّقَى بِهِمُ الْمَكَارِهُ ، وَيَمُوتُ أَحَدُهُمْ وَحَاجَتُهُ فِي صَدْرِهِ لا يَسْتَطِيعُ لَهَا قَضَاءً)...
2- "هناك إختياران مبدئيان في الحياة: إما أن تتقبل الوضع الحلي كما هو، أو تتقبل حمل مسؤولية تغييره" د.دينيس ويتلي
3- لو اعتقدت أنك قادر على فعل شئ ما، أو اعتقدت أنك غير قادر على فعل شيء ما، ففي كلتا الحالتين انت على صواب. هنري فورد.
4- الاسـلام بك او بدونك سينتصر اما انت فبدون الاسلام ستضيع وتخسر.. د. أحمد ديدات رحمه الله
5- نص رسالة اﻷم تيريزاMother Teresa :
People are often unreasonable, irrational, and self-centered. Forgive them anyway.
If you are kind, people may accuse you of selfish, ulterior motives. Be kind anyway.
If you are successful, you will win some unfaithful friends and some genuine enemies. Succeed anyway.
If you are honest and sincere people may deceive you. Be honest and sincere anyway.
What you spend years creating, others could destroy overnight. Create anyway.
If you find serenity and happiness, some may be jealous. Be happy anyway.
The good you do today, will often be forgotten. Do good anyway.
Give the best you have, and it will never be enough. Give your best anyway.
In the final analysis, it is between you and God. It was never between you and them anyway.
الكتب:
---------------------
25 قصة للنجاح - رؤوف شبايك
365 مقولة للنجاح - رؤوف شبايك

View more

تقدر تنصحنى ابدأ ازاى فى مجال باور يعنى اخد كورسات مثلا اون لاين و لا اخدهم فى مكان كويس علما انى لسه فى تانيه ؟؟

تخصص هندسة Elec-Power فيه مجالات عمل كتير، الحقيقة أنا معنديش خبرة في كل المجالات دي علشان كدا هركز على مجال الـ Control (التحكم الصناعي واﻵلي) ﻷني اشتغلت فيه شوية.
-------------------------
1- ادرس Classic control، من المهم جداً انك تتقن التحكم الكلاسيكي (طرق التحكم في اﻷحمال زي المحركات مثلا) وتشغيلها وايقافها باستخدام الـ contractors, relays, timers ...etc ودا تقدر تدرسة من كتب "معهد السيليزان" العربية، سعر الكتب من 15 إلى 25 جنية ومن تاليف وجيه جرجس (هتلاقيها في اﻷزبكية أو شارع الجمهورية). أو ممكن تحملها من على النت
2- ادرس الـ PLC واتعلم الـ ladder programming، أغلب المصانع بتستخدم وحدات الـ PLC خاصة المنتجة من شركات زي SEMINES - Schneider - Hyundai ويعتبر الشغل في أغلب المصانع هو مزيج بين استخدام الـ PLC والـ classic control ( في كورسات عربي على يوتيوب بتشرحه بالتفصيل)
3- اتعلم برنامج الـ LabVIEW، ودا يعتبر من أشهر البرامج في العالم في برمجة المتحكمات (سواء الصناعية أو التقليدية) ومن مميزاته انو معتمد على Graphical Design (يعني تقدر تبني أنظمة تحكم في مصنع كامل عن طريق مجموعة بوكسات جاهزة تضيفها للمشروع في دقائق)
4- (مستوى متقدم) ادرس Control Theory (من المواقع التعليمية اﻷونلاين زي Coursera و Edx) ودا هيخليك تفهم ازاي تصمم أي نظام تحكم صناعي من الصفر وبدون اﻷعتماد على أي حاجة جاهزة زي LabVIEW
كل ما سبق كما ذكرت هيأهلك للعمل في مجال التحكم اﻵلي والصناعي فقط، في مجالات مختلفة داخل باور زي "توزيع الطاقة" و"محطات الطاقة" لو حبيت تعرفها فأنصحك تسأل أساتذتك في الكلية أو المعيدين :)

View more

انا مش فى دماغه سؤال محدد اسالهولك ولو ان الاسئله كتيره اكيد الكون كله عباره عن فضاءات من الاسئلة :) لكن احب اقولك انى متابعك من زمان وبوستاتك كلها عموما قيمة وتستحق المشاهدة والمشاركه والتطبيق العملى جزاك الله خيرا ونفع بك ورزقك بقدر ما تحرص على مساعدة الناس واسعادهم ...اخوك محمد

Eng-mohammed Fatahalla
ربنا يكرمك يا محمد :))
وويوفقنا جميعاً لما يحبه ويرضاه :))

View more

اريد التقدم لفتاة ذات دين وخلق معي في نفس الفرقة ولكن علمت انها تكبرني ب 3 سنوات لانها مرت بمراحل تعليمية اخري ... فهل اتقدم ام اتراجع ؟

اظفر بذات الدين تربت يداك :)
موضوع فرق السن طالما مش كبير فلا اعتقد أنك ممكن تستخدمه كعامل للاختيار من الأساس،
في أمر واحد فقط واجب الانتباه ليه:
البنت عندها نضوج عاطفي وفكري أكبر نسبياً من الولد في نفس المرحلة العمرية ودا بسبب ان النساء بتتحمل المسؤلية في عمر أصغر بكتير من الولد والمقصود هنا مسؤولية "الأمومة" وإدارة شؤون المنزل
لذلك الكثير من البنات بتفضل من يكبرها سنا ببضع سنوات لضمان النضوجالنضوج النفسي و لقدرته على تحمل المسؤولية و احتوائها نفسياً
فإذا كنت قادر بإذن الله على تحمل مسؤوليات الخطوبة وتحضيرات الزواج فابدأ على بركة الله

View more

تنصحني اذاكر رياضيات ازاي في الكلية انا في هندسة فرقة اولي بدرس رياضيات 3 /4

1- دور دائماً على الجانب التطبيقي قبل ما تبدأ تذاكر أي جزء من المنهج،
من المم جداً انك تعرف أهيمة الي بتدرسه، ودا هيساعدك على فهم المعلومات وكمان تحفيزك جداً لدراستها... على سبيل المثال: نفترض انك بتذاكر Double Integration (التكامل المزدوج)، افتح Google أو youtube ودور على Real application for double applications أو practical usage for double integration
2- استعين بالموقع العظيم Khanacademy (أكاديمية خان) في فهم الدروس،، الموقع الرائع دا بيحتوي على فيديوهات كتيرة جداً في معظم علوم الرياضيات من أول مناهج ابتدائي انتهائاً بالعلوم المتقدمة في الاحصاء والتحليل الكمي، والجميل ان معظم الناس الي بتشرح بتوضح ليك أهمية المادة الي بتشرحها (النقطة اﻷولى) وهتلاقي أمثل عمليه كتير بتتشرح قدامك باسلوب سهل وبسيط
khanacademy.org
3- اقرأ من المراجع اﻷجنبية (دي مرحلة متقدمة شوية): بعد ما تنتهي من مذاكرة الجزء المطلوب حاول تقراه من مرجع أجنبي وهتستفيد جداً من المعلومات الاضافية (وساعات الشرح التاريخي ﻷصل الجزء العلمي دا)، دا هيخليك أقوى وأكثر استيعاباً للمنهج
لو تحب اشتري كتاب Advanced Engineering mathmatics - المؤلف اسمة "كرايزينج" (هتلاقية في سور الازبكية في العتبة بسعر من 50 إلى 80 جنية للطبعة اﻷصلية)
الكتاب دا رائع وفيه معظم مناهج الرياضيات التي تدرس لمختلف اﻷقسام الهندسية (وبالرغم ان اسمة Advanced الا ان شرحه مبسط ومدعم بصور كتير )
وأخيراً، ثق تماماً ان الرياضيات أهم علم ممكن تدرسة في كلية الهندسة (انا شخصياً لما كبرت كنت بندم اني مهتمش بالعلم دا من زمان ومحستش بقيمته الا لما بدأت أدرس حاجات متخصصة وبتحتاج فهم عميق للنظريات الرياضية) وحالياً بحاول أعيد دراسة معظم الي اتعلمه زمان بس بصورة افضل (وبنفس الخطوات الي كتبتها فوق)
بالتوفيق في رحلتك التعليمية :)))

View more

Next