مساحة بودي ( 🤓 ) 🖤

مُصـطفى عـَلـاء | Soofy Alaa ♥
سنة 1914 " فرانس فيرديناند " ارشيدوق مملكة المجر والنمسا چان بيوم من الايام يفتر بمدينة بالمجر، طلعوا عليه مجموعة من الصربيين شمروا قنبلة يدوية، القنبلة انفجرت بالسيارة الي وراه وهو طلع سليم، لهنا هو محظوظ جداً، فگال للسايق ارجع اريد اشوف الضباط الي انصابوا، السايق غصباً عنه رجع بشارع ثاني غير الي المفروض يمشي بي، فبالصدفة طلع واحد من الصرب الي حاولوا يغتالوه موجود بهالشارع فضرب فيرديناند طلقة براسه ويموت الارشيدوق. كل هذا صار، لان السايق خربط بالشارع
-
وبسبب هالشي مملكه المجر والنمسا تعلن الحرب على صربيا، وانظم الهم حلفائهم المانيا، ودولة الخلافة العثمانية وبلغاريا ، وبالجهة الثانية صربيا وفرنسا وبريطانيا وروسيا، وبعدين انظمت امريكا واليونان واليابان وايطاليا، وصارت الحرب العالمية الاولى اللي مات بيهة 17 مليون شخص استمرت 4 سنين، وبسبب جثث الحرب طلع وباء اسمه " الفلاونزا الاسبانية " ، قتل 3‎%‎ من سكان العالم بوقتها و بسنه وحده مات بهالمرض اكثر من الي ماتوا بالطاعون ب 100 سنه
-
الى ان انتهت الحرب بتوقيع معاهده " ڤيرساي " الي وگعت كل الوم براس المانيا، وصارت هي ام المصيبه ودفعت تعويضات كلش قوية، وانذلت بصريح العبارة هالشي شنو سَبب؟ سَبب انو تتولد مشاعر غضب وحقد وادى الى ظهور " الحزب النازي " الي رأسه هتلر، وصارت الحرب العالميه الثانية الي مات بيهة 65 مليون انسان...، انت بس لاحظلي تسلسل الاحداث، واحد يفتر بسيارة تنشمر عليه قنبله تنفجر بالسيارة الي وراه فالسايق يدخل بطريق غلط فيموت، وبسببه تصير حرب عالمية اولى، وتنشر وباء قاتل، وبسبب هالحرب يتولد احساس بالظلم يساعد ان تشعل حرب عالمية ثانية..،
-
رباط السالفة، لتخلون السايق مالكم يدخلكم بطريق غلط لتصيرلكم مشاكل.