Space🌸""!

ياٌرا خالدد.
تااني
لما بتبعد فترة عن الناس و تاخد جنب بتعرف أد إيه إختياراتك كانت غلط و القليل فيها كان الصح، القريب حطيته ف خانه الغريب و الغريب قربته منك ف أذاك ،هتعرف إن التخلى عن أشياء كتير ممتع و سهل و عادى جدا، ممكن تتخلى عن عادة كنت بتعملها كل يوم، هتبقى كوباية القهوة الصبح أهم من ناس كتير أوى، يعنى أنا مش مرتاح أو مش مبسوط ف علاقتنا ف مش هكمل، هتقوم من وسط خروجه كنت مستنيها، بتوصل انك ممكن تسيب شغلك أو شركتك عشان بس مش مرتاح، الراحة بتتناسب طرديا مع ادراكك لقيمة نفسك، حبك لنفسك بيزيد كل ما تبعد عن الناس و كل ما تقدر تستغنى أكتر فتحب نفسك أكتر و اكتر و تبذل طاقة لحب ناس تانية تستحق الحب ده.
هتلاقى العند فى الغلط قمه الجهل و العبث، وإننا مش ملايكه بس مش مُطالب تفضل تلتمس لغيرك العُذر لحد ما تغير حاجة حلوة فيك .
هتعرف إن الحب موجود و المودة و الرحمة هما الحب الحقيقي كل ده هتوصله في مرحلة نضج ملهاش سن معين بتبطل تعاتب و لا تلوم ، راحتك بتكون ف البعد عن ناس كتير ، المتعة بتبقى ف مساحتك الشخصية و ال Comfort zone بتاعتك بتكون سلاحك ،هتعرف ان في معظم الوقت أكتر واحد حواليه ناس كتير هو أكتر واحد حاسس بالوحدة و مش مبسوط ،هتعرف ان الحياه و العلاقات محتاجة طاقة ومجهود و فرهده و بهدله كمان عشان تنجح و تكمل ، هتلاقى المواجهه أقوى من الهروب، هتعرف ان اللي عايز يوصل لحاجة هيوصلها بس هو اللي مكسّل،
هتعرف إن الناس هتتكلم مهما تعمل ، هتعرف إن من أول أسباب الفشل سماعك لكلام الناس ، هتعرف إن الحاجة اللى مبتجيش ف وقتها أحسن إنها متجيش، هتعرف إن اللى هتفضل مستنية و مجاش، بيجى أول ما تبطل تستناه ،
هتعرف إن العلاقات طول ما هى بعيدة مريحه أوى، الوقت بينسى،و النسيان دايما نعمه ، والمتعة ف القرار الصعب والسهل دة بلاش منه و الاختيارات بقت دايماً صعبة ،هتلاقى إن مهما كان حواليك ناس كتير محدش لسه عارفك، هتعرف إن السوشال ميديا الزيف فيه أكتر من حقيقته؛عالم مزيف جدا ،هتعرف إن من أحلى مراحل الحياة لما تحس إنك بقيت ناضج كل يوم عن الأول، لما تلاقى نفسك مبقتش تنبهر بالحاحة زى الأول و كُل ما تزعل بتضحك أول بأول .. هتعرف إن البُعد عن ناس معينه مش وحش حرفيا وإنه غنيمه ومكسب ليك بدل ما تخسر نفسك ...