كاتِب الديـوان

-

---

- طيّب بوست بقي في وسط الجو اللي انا غرقان فيه ده ، و الحَر اللي مبهدّل الناس .. يا ريت الناس كُلها تقرأ الكلام ده كويس و تحاول تفهم معناه ..

---

- كُل الناس اللي لسه قلوبها نضيفة و ضمايرها صاحية , بيحاولوا يجاهدوا نفسهم يبعدوا عن الذنوب و المعاصي اللي بيعملوها في حق ربنا ، و اللي بتضيّع علاقتهم بيه :)

---

- لكن متحُطّش نفسك في موقع شُبهات ، و شهوات و تقول انا هجاهد نفسي في المواقف دي عشان اثبت لـ نفسي إنّي قوي و هقدر أبطّل الذنب ده ، أو المعصية دي ,

---

- حضرتَك إنت نفسك ضعيفة أصلاً ، و إلّا مكُنتش عملت الذنب ، أو المعصية من الأساس ..

---

- متعملش زي راجل كويس جداً من جواه و من بره كمان باين عليه و هو فعلاً كويس و عارف ربنا ، و متديّن و بيأمر بـ المعروف و ينهي عن المُنكر ،

---

- كان فيه كباريه الناس كُلها بتتكلّم عنه ، و عن اللي بيحصل جواه و عن البنات و الفُجر و الفجور و الخَمر و كُل ما حرّم الله اللي جوا الكباريه ده ,

---

- فَـ الراجل ده قال انا لازم ادخُل الكباريه ده أدعي الناس اللي فيه تبطّل الحرام اللي بتعمله ده و يتوبوا لـ ربنا و يرجعوا له لعلّ و عسي إنّي اقدر اقنعهم ,

---

- فَـ لمّا دخَل شاف مناظر لـ أوّل مرة يشوفها ، و حجات أول مرّة يشوفها , يمكن كان بيسمع عنها من الناس اللي بتحكيله بس مخطرش علي باله إنه ممكن يكون بـ المنظر ده ..

---

- فَـ قال لـ واحد ، و التاني ، و التالت توبوا عن اللي بتعملوه ده و ارجعوا لـ ربنا علشان متخشوش النار في الآخرة و ربنا يتوب عليكم و يدخّلكم الجنة ،

---

- فَـ كل اللي يقوله كده يفضل يضحك عليه و يقوله خد بس اشرب الكاس ده و انت هتروق و هتعرف احنا بنعمل كده ليه و بنيجي هنا ليه ،

---

- فَـ الراجل استغرب جداً و قال طب ما أجرّب و مش هخسر حاجة ده انا نيّتي خير و اكيد ربنا هيغفرلي , بس اشوف الخمرة ممكن تعمل في الناس كده فعلاً و لا في سبب تاني ,

---

- فَـ شرب كاس ، و التاني ، و التالت لحد مبقاش شايف قدامه , فَـ الناس شافوه كده فـ زقوا عليه واحدة من اللي في الكباريه علشان يزني بها و العياذ بـ الله ,

---

- طبعاً هو مش شايف قدامه ، و خدته علي الأوضه ، و وقع في الزنا و العياذُ بـ الله فَـ ملكَ الموت نزل قبض روحه و هو علي الحالة دي ..

---

- المقصود من ده كله إنّك تدوّر علي مكان بتكون فيه طاعة ربنا موجودة و رحمة ربنا مالية المكان , علشان تقدر تجاهد نفسك و تبطّل الذنب اللي بتعمله ،

---

- امشي مع صُحبة صالحة تشجّعك علي الخير و انك تبطّل ، و لمّا نفسك تبقي قوية و تبقوا أقوية مع بعض فكّروا ساعتها إنّكوا تدعوا الناس إنّها تبطّل ,

---

- لكن إياك تمشي لوحدك في طريق الدعوة علشان أكيد الشيطان هيغلبك و هيحلّلك الحرام و يزيّنه في عينك من جديد و هترجع يمكن أسوأ من الأول ..

---

- الرسول صلي الله عليه و سلّم بيقول " عليكم بـ الجماعة و إياكم و الفُرقة , فَـ إن الشيطان مع الواحد و هو من الاثنين أبعد " , صدقت يا حبيبي يا رسول الله ..

---

- معني الحديث بـ اختصار إن طول ما انت وسط صُحبة صالحة و جماعة خير , الشيطان هيبقي صعب إنه يغلبك لإنه هيلاقي حد بيمنعه من الجهة التانية و هما اصحابك دول ..

---

- محدّش ينسي يدعي ربنا يرزقه الصُحبة الصالحة اللي تعينه و تساعده علي فعل الخير ، و تقدر تمنعه و تنهاه عن أي غلط و معصية مُمكن يفكّر إنه يعملها ..

---

- و هطلُب منكُم الدُعاء ليّا و لـ المُسلمين كلهم بـ تفريج الكَرب ، و زوال الهَم ، و الشفاء العاجل ، و السلام عليكُم و رحمة الله و بركاته :)

View more

-

---

و مــيـن فـيـنـا مـبـيـسـكُـتـش .. و مـش شـايـل كــلام جـــوّاه

---

و مـيـن فـيـنـا مـحبِّـش في يـوم حد .. و مش قادر كمان ينساه

---

و مــيــن فــيـنـا مـش مـجـروح .. و مـش شـايـف لـ قَـلبُـه دَواه

---

و مــيــن فـيـنـا حِـلـمـه مـتأخّـرش .. و مش عارف حتي يستنّاه

---

و مــيـن فـيـنـا مـتفائلش كتير .. و الـتفـاؤل وَهْــم و اسـتَـحـلاّه

---

و ميـن فينا مشافـش حـِلم كبير .. و صَعب عليه ده حتي يتمنّاه

---

و ميـن فيـنـا مشـافـش حد بجد .. و مـش شايـفُه حِـلو من برّاه

---

و مين فينا محبّش في مرة بجد .. و مش ممكن في يوم ينساه

---

و مـــيــن فــيــنــا مـتــعـشّــمش .. و اللي فـيه النَّـصيب يلقاه

---

و مــين فـيـنـا مـجـتـش لـحـظـة عـليه .. و بـاع أخـرتـه بـدنـيـاه

---

و مـين فيـنا مـمشـيش الـطريق لـ نهايته .. و سلم مـَشيتُـه لله

---

و مـين فينا محبش حلاوة روح .. و عاش طـول عمـره علي ذكراه

---

و مـــيـــن فـــيــنــا مــتــألّــمــش .. و اتـــنَــفــس بـ كـلمـة آااه

View more

-

---

- بسم الله الرحمن الرحيم ، و الصلاة و السلام علي أشرف المُرسلين ..

---

- فكرة لـ حفظ القُرآن الكريم إن شاء الله ، فـ اللي مش مهتم ميكمّلش قراءة ، أما اللي حابب يقرأ الكلمتين دول ..

---

- طبعاً مفيش مسلم منفسهوش انه يحفظ القُرآن الكريم ، أو حتي نصه أو ربعه ..

---

- كلنا عندنا الرغبة ، بس ناقصنا العزيمة ، أو الدافع اللي يخلينا نبدأ في الحفظ ، و اللي بدأ فعلاً بقي بيكسّل عشان بيحفظ لوحده ..

---

- إن شاء الله انا فكّرت نعمل نظام يومي نمشي عليه ( لـ اللي حابب يشارك بس ) عشان ربنا يكرمنا و نقدر نحفظ ، علي مدار 5 سنين ..

---

- واحد هيقولي مش كتير 5 سنين ، هقوله انت و مقدرتك بس علشان منكسّلش مش اكتر ..

---

- الفكرة مش فكرتي علشان الناس اللي بتحب الكلام الكتير .. الفكرة فكرة الدوكتور راغب السرجاني ربنا يحفظه اللي عرضها في محاضرة ( كيف نحفظ القرآن ) ..

---

- ان شاء الله مش مطلوب منك غير انك تحفظ رُبع واحد بس كل اسبوع ، و بالمعدل ده هتقدر تحفظ 6 اجزاء في 11 شهر تقريباً و الشهر الـ 12 تراجع عاللي حفظته و بكده هتحفظ القرآن كله بمشيئة الرحمن في 5 سنين ..

---

- هنتجمّع كل اسبوع ان شاء الله هنا ( لـ اللي هيشارك بس ) و كلنا نقول عملنا ايه يمكن ربنا يكرمنا و فرد واحد بس عالاقل يقدر يستمر و يحفظ ..

---

- و بـ النسبة لـ الناس اللي حافظة يا ريت يقولولنا ازاي قدروا يحفظوا و يستمروا في الحفظ و يقولولنا اي اقتراح يساعدنا ..

---

- اما الناس اللي بتحب تنتقد ، فـ ده مش مجال لـ النقد ، لو معجبكش الموضوع يبقي متردش احسن :))

---

- اللي حابب يشارك يقول و انا هسجّل الاسماء بـ اليوزرات بتاعتكم عشان نبقي عارفين مين اللي معانا ، و ان شاء الله بعد الـ 5 سنين نقدر نعمل حفلة تكريم لـ الناس :)

---

- بس مش طالب منكم حاجة شخصية بس غير الدعاء بالهداية و القدرة علي اتمام الموضوع ده ، و انه يكون خالص لـ وجه الله و بس و مفيش فيه رياء :)

---

- كلنا مقصرين في حق ربنا و في الدين و بالامانة لو حفظنا القرآن و اتعلمناه و عملنا بيه هيتصلح حالنا و حال الأمة كلها :)

---

- ربنا يكرمكم يا رب و يجعل ايامكم كلها سعادة و بعتذر عالاطالة ، و السلام عليكم و رحمة الله و بركاته 😊

View more

-

---

- من مشاهد يوم القيامة ، و بعد ما كُل انسان فينا هيستلم كتاب بـ اللي عمله في الدُنيا ،

---

- هتلاقي ناس كتير مسكت كتابها بـ ايدها الشمال ، و ناس تانية مسكته بـ ايديها اليمين و يا رب نكون منهم :))

---

- و بعد ما الكُل يعدّي الصراط ، و بعد ما ناس كتير برده هيقعوا من عليه و يا رب ما نكون منهم :))

---

- لمّا آخر واحد يدخُل الجنّة ، و المغضوب عليهم يدخلوا النار و كُل واحد يعرف مكانه ،

---

- أهل الجنّة بقي بعد ما يشوفوا النعيم اللي في الجنّة و النِعم اللي ربنا أصبغها عليهم هينادوا علي أهل النار و يقولوا ,

---

- يا أهل النار " قَدْ وَجَدْنَا مَا وَعَدَنَا رَبُّنَا حَقًّا فَهَلْ وَجَدتُّم مَّا وَعَدَ رَبُّكُمْ حَقًّا " ! هيرُد عليهم أهل النار و يقولولهم " نَعَمْ " ..

---

- يا اللي ربنا وعدنا بيه في الجنّة هنلاقيه ، و اللي وعَد بيه أهل النار في النار هيلاقوه بالظبط زي ما ربنا قال ,

---

- هتلاقي صوت من عند ربنا بيقول و يسمّع الكُل " لَّعْنَةُ اللَّهِ عَلَى الظَّالِمِينَ " , و المقصود هنا هُما أهل النار و العياذ بالله :)

---

- و ربنا سُبحانه و تعالي بيعرّفنا عليهم في الدُنيا و يقولنا همّا " الَّذِينَ يَصُدُّونَ عَن سَبِيلِ اللَّهِ وَيَبْغُونَهَا عِوَجًا وَهُم بِالْآخِرَةِ كَافِرُونَ " ..

---

- يعني بيصدّوا الناس عن سبيل الله الحق و الطريق المستقيم ، و يمشوا في طُرق الغلط و الحرام ، و اللي مش مصدّقين إن احنا هنُبعث يوم القيامة لـ الحساب ..

---

- هيكون في بينهم حاجز كده بس سُبحان الله بيسمَعوا بعض من ورا الحجز ده ، يعني موصّل الكلام و بس :))

---

- في منطقة بقي بين الجنّة و النار هيكون فيها الناس اللي همّا حسناتهم أد سيئاتهم بالظبط لا حسناتهم تدخّلهم الجنّة ، و لا سيئاتهم تدخّلهم النار " وَالْوَزْنُ يَوْمَئِذٍ الْحَقُّ" ، و مستنيين رحمة ربنا :)

---

- هينادوا علي أهل الجنّة و يقولولهم " سَلَامٌ عَلَيْكُمْ ۚ " .. و لما عينهم تروح كده علي أصحاب النار يقولوا " رَبَّنَا لَا تَجْعَلْنَا مَعَ الْقَوْمِ الظَّالِمِينَ " :))

---

- و بعدين أهل النار بقي هينادوا علي أهل الجنة يقولولهم " أَفِيضُوا عَلَيْنَا مِنَ الْمَاءِ أَوْ مِمَّا رَزَقَكُمُ اللَّهُ ۚ " يعني ابعتولنا أي حاجة من نعيم ربنا من عندكم ، بس هيردوا عليهم يقولولهم " إِنَّ اللَّهَ حَرَّمَهُمَا عَلَى الْكَافِرِينَ " ..

---

- مين دول بقي اللي اتحرّم عليهم الماء ، و رزق ربنا في الجنّة ؟ ربنا عرّفهُم برده و قالنا " الَّذِينَ اتَّخَذُوا دِينَهُمْ لَهْوًا وَلَعِبًا وَغَرَّتْهُمُ الْحَيَاةُ الدُّنْيَا ۚ " ..

---

- يعني اللي كانوا بيحرّموا الحلال و يحلّلوا الحرام علي مزاجهم و ماشيين بدماغهم ، و الناس اللي غرّتهم و أغرتهم مُتع الدُنيا و نعيم الدُنيا الزائل ..

---

- طب جزائهم إيه دول يا رب ! ربنا بيقولنا " الْيَوْمَ نَنسَاهُمْ كَمَا نَسُوا لِقَاءَ يَوْمِهِمْ هَٰذَا وَمَا كَانُوا بِآيَاتِنَا يَجْحَدُونَ " ..

---

- يعني ربنا هينسي الناس دي ! آه هينساهم ، و يبعدهم من رحمته سبحانه و تعالي ، و مش هيفتكرهم و هو بيرحم عباده الصالحين :)

---

- ادعوا ربنا كتير أوي و قولوا ربنا لا تجعلنا مع القومِ الظالمين :))

---

- و تدبّروا آيات القُرآن ، فـ إنّها تُنير العقول ، و تُطهّر القلوب ^_^

View more