الموّضوع مالوش عِلاقة بالقسوة ، لكن بييجي علينا وقت وطاقتنا بتقل ، مَفيش طاقة نبرر ولا نشرح ولا حتى نتحمّل، فلما نلاقي حد واخد كلامنا وتصرُّفاتنا بسوء نيّة هنعمله إيه يعني؟ نفهمه إزاي إننا مش حِمل أي ضغط من أي نوع، ولما نقرر نسكت وما ندخُلش معاهُم في جِدال بيتقال إننا اتغيّرنا! لأ إحنا ما اتغيّرناش إنتو اللي مش عايزين تفهمو إن ما بقاش عندنا مجهود نضيّعه على جِدالات خايبة، وبلاها أي مجهود هنبذله في سبيل تحسين صورتنا قُدامكو.. اللي عايز يشوفنا كويّسين هيشوفنا واللي مش عايز الله الغني عنه.
أحياناً بيبقا من النضج إنك ترضي بالإستسلام. أكتر حاجة وجعتني ف مرحلة النضج لحد دلوقتي هيا إستيعابي لفكرة إن الحياة م عادلة ، فكرة إنك ساعات ممكن تاخد علي دماغك و تكمل عادي و متستناش حد ياخدلك حقك لإنه م هيرجعلك ، إنك ممكن تضحي كتير بمجهود و نوم و فلوس و مشاعر وكل حاجه تقدر عليها وميرجعلكش مقابل أو حتي تقدير بسيط ، فكرة إنك تحوش الأمل جواك و تيجي لحظة واحدة تكسرك و تفكرك إن م كل الأماني بتتحقق حتي لو إنت إنسان كويس و حتي لو إجتهدت عشان تحقق الأمنية دي.
سيبك من اللي حواليك وركز ف نفسك ، يعني متخليش حاجه تاخد مساحه ف حياتك غير نفسك ومستقبلك ، متحاولش تعدل من شخصية حد او تلوم شخص على فعل او تاخد على خاطرك من قلة اهتمام فلان ، سيب اللي مهتم يهتم واللي ناسي ناسي واللي فاكر فاكر والزعلان يفضل زعلان واللي يبعد ويتغير على راحته عادي ، سيب كل واحد على راحته وعيش انت كمان على راحتك واشتري دماغك.
مينفعش في وقت الزعل تمنع الأشياء اللي علاقتكوا مبنيه عليها ، مينفعش تتعامل مع الطرف التاني عكس طريقتك معاه في لحظات الصفا ، اظهر زعلك بس متظهرش قسوتك ، مينفعش تتعامل بطريقة العقاب لأن ف اغلب الوقت كل طرف فيكوا هيكون شايف انه مش غلطان ف بكده العقاب مش هيبقى غير وسيله مؤذيه ، انتوا بتبقوا محتاجين حلول .. الزعل فتره وبيروح بس الطرف التاني هيفضل خايف منك، عشان مش هينسى انه في فترة الزعل انت سلبت منه الأمان.
كل واحد مننا بيمر بفترة في حياته بتبقي نقطة تحول ممكن تحصل انت وكبير او انت وصغير مش هتفرق الفترة دي بتتغير فيها جداً ويمكن تتغير لشخص تاني الفترة دي بتكون بعد ما ممريت بتجارب كتير عرفتك حاجات كتير في حياتك الفترة دي بتكون بتستوعب فيها كل تصرفات الناس اللي حواليك وتصرفاتك انت شخصياً الفترة دي بتبقي صعبة علي كل واحد فينا ممكن تحولو للأسوء او للأحسن بس للأسف انا اتحولت للأسوء.