+

السلام عليكم و رحمة الله و بركاته
مساء الخير
هذا جواب سؤالج ، الأشياء هذي غالباً أنا أسويها لفطوري للجامعة
@Dwll_2018
@WithBooks
أفكار فطور و غداء ناخذه للمدرسة، الجامعة أو الشغل/ الدوام:
فطور: الوجبة الأولى: غرانولا مصنوعة منزلياً أفضل (أغلب اللي نشتريها بالسوق خرابيط فيها زيوت ماعرف كيف و سكر مهول) + روب يوناني + فواكه حسب الرغبة/ مكسرات/بذور الشيا توضع كطبقات في مرطبان و بالنسبة لي هذي الوجبة تشبع و مغذية جداً أو ممكن مثل الفكرة بالضبط يعني غرانولا و روب يوناني مع صوص فواكه(بلوبيري، مصنوع في البيت عشان نتحكم بكمية السكر).
الوجبة الثانية: شوفان يطبخ مع ماي و نصف موزة مهروسة و ممكن شوية حليب نباتي يعزز النكهة يطبخ مع بعض و ما نحتاج نضيف له سكر لأن الموز سكري، نضيف له قرفة حسب الرغبة و مكعب شوكولاتة غامقة بدون سكر على الوجه/ فواكه:كيوي/خوخ/توت/موز غالباً هذي الأشياء اللي أحطها يا شوكولاتة أو فواكه / زبدة مكسرات .. و إذا تحتاجون سكر ممكن نضيف سكر جوز الهند.
الوجبة الثالثة: سموذي أخضر : سبانخ/ جرجير (حفنتين)، نصف موزة مجمدة/مانجا/توتيات، فراولة، خيارة/خوخ، حليب أرز/شوفان، ماء جوز الهند، بذور الشيا/بودرة المورينجا/كولاجن/بذور الكتان الخ.. هذي تنفع قبل ما نطلع من البيت نشربها أو نعبيها في زجاجة الماي و ناخذها معانا .الوجبة الرابعة: توست بالألياف او الحبوب محمص ، نهرس عليه أفوكادو ، حفنة ورقيات مشكلة نبهرها برشة ملح و أي توابل تحبونها، و بيض عيون فوقه ممكن نحط بذور اليقطين/ سمسم/بذور الكتان، هذي جداً تشبع و من الأشياء المفضلة عندي يوم كنت ما أعرف أني أتحسس من البيض.. يوم صرت أتحسس من البيض أسويها نفسها بدون بيض و بدال البيض ممكن أسوي توستة ثانية أو مثلاً اشرب الصبح قبل ما اطلع السموذي الأخضر و بعدين ع الساعة تسع تقريباً أحس بالجوع ف أكون أوريدي مسوية هالتوستة بدون بيض و آكلها.
الوجبة الخامسة هاي ما تنفع تنخذ للدوام لكنها جداً جداً لذيذة ووايد أحبها : موزة مجمدة كاملة، أحب أحط معاها توتيات أو فراولة على حسب الموجود ، شوي حليب نباتي أو ماي نتفة و نخلطها ف الخلاط تصير كأنها آيسكريم و فوق ف الإضافات يمدي نتفلسف و هني نحط أشياء مغذية مثلاً بذور اليقطين / بذور الشيا، أرز منفوخ/ كينوا منفوخة .. و مرات أسويها باليقطين أكون شاويتنه من قبل و بعدين أجمده لوقت الحاجة هذا صدق صدق لذيذ لدرجة ما تتوقعوها كانكم تاخذون حلا لكن حق فطور و في نفس الوقت جداً صحي ، أحط معاه تمر و قرفة و فلسفة أشياء كل واحد و ذوقه بس يطلع شي لذيذ.
الوجبة السادسة: نحضر مرطبان و نخلط فيه شوفان مع حليب نباتي أي شي تفضلونه مع بذور الشيا و ممكن زبدة مكسرات و ممكن لا يعني أنتوا تتحكموا فيها تقدروا كل مرة تسووه بس بطعم غير.. أنا أغلب شي ما أحط زبدة مكسرات ، اكتفي باللي قلته و أخليه طول الليل ، الصباح بس أخلطه و بعدين أضيف الفواكه اللي أحبها مشمش ، دراق، موز ، كيوي ،مانجا، الخ أي شي أنتوا تحبوه ، سويتها كذا مرة ،الفكرة حلوة و ما تاخذ وقت و لا جهد خصوصاً للناس اللي نمط حياتها سريع.
ما مدا أحط الإجابة كاملة هنا ف بعد بحط له تكملة
هذا الجزء الأول ..

View more