١٢:٥٣ م مرحبًا يا أصدقاء كيف حالكم اليوم ؟ اه من زمان عنكم بس مو من زمان مرة يعني شوي ياويلي انا موجودة على الدنيا بس جسد حرفيًا بدون اي تفاعل إعداداتي طافية ولا انا بخير ما فيني شيء بس مخي نايم و مافيني حيل اسوي شيء ! الوضع مزري انا انسانة ما اطلع ابدًا من البيت مع انو فيه وقت نقدر نطلع فيه بس برضو ما اطلع و بكرة كمان بنرجع للحياة الطبيعية بس للحين مخي مو مقتنع احسه شيء صعب و برضو بجلس في البيت لأن الصدق اقول في نفسي كيف اطلع و احنا نخاف من بعض و متباعدين و مدري ايش والله انا مشتاقة للحياة قبل للناس اللي برا اللي اصقعهم بالغلط و عادي ما اكون خايفة و الوضع يطمن هفف احس من زمان ما تأففت ؟ المهم بس هذا اللي عندي ، ايه صح مفكرة اشوف مسلسل اجنبي بس انا مو حقت مسلسلات ابدًا بس حقت افلام لأن انا عبارة عن افلام 💔 هههههههههههههه احس اني سخيفة بس خلاص بسكت يا حلوكم ❤️ .
١٢:٤٧ ص هلا والله ... بسولف لكم بما اني اليوم رايقة عن قصة لي زمان . المهم تعرفون الخاتم اللي على شكل ألماسه اللي دايم يجي في الأفلام و يتضاربون علشانه هم يتضاربون على الألماسه نفسها ، انا كان نفسي فييييه بموت عليه بس كنت دايم حاطه في بالي ان ما يشتريه إلا الناس الأغنياء على قولتنا الهاي هاي 😂😂 ليه هالكلمة مدري ! لأن انا ماخذة هالفكرة من الأفلام كلهم يتضاربون عليه الشرطة و الحكومة و المواطنين يبون يسرقونه 😂 و انا صدق مدري على نياتي قلتلكم " شفّاف قلبي و هذي اجمل عيوبي " المهم يوم من الأيام رحت سوق الذهب مع امي و شفته يا بنات ااااه قلبي 😩❤️ ما توقعت ولا واحد بالمئة انهم يبيعونه خاتم على شكل الألماسه ذي و فعلًا شريته و كنت مرة مرة مبسوطة ما اذكر الصراحة اذا هايطت فيه او لا ، اكيد انو الحين عادي وجوده لأن وقتها كنت صغيرة ، و هذا الخاتم الحين عندي له ثلاث سنوات او اربع طبًعا راح أشاركم صورته .
١٢:١٥ م ايه عاد خاطري اسولف لكم ؛ جالسة افكر اليوم كيف احنا نشوف حياة الناس بنظرتنا و كيف اصلًا حياتهم في الواقع ! بتقولون لي شلون ؟ انا اعلمكم مرة قلت لوحده من صديقاتي يوه يا حظك انتِ عاد امك موظفة و ابوك موظف اذا رحتي لأمك عطتك فلوس و اذا رحتي لأبوك برضو عطاك فلوس ، انا ما فيه إلا ابوي بما إن امي ربة منزل ، قالت من قالك ؟ بالعكس انتوا اللي يا حظكم انا اذا رحت لابوي ابي شيء قال روحي لأمك و اذا رحت لأمي قالت روحي لأبوك و في الأخير محد عطاني وجه . وقتها انصدمت كيف ان الظاهر يغريك يوهمك بشيء هو مو موجود اصلًا و المضحك انه نصدقه ، و عشان كذا لا تحكمون على الناس من الظاهر لأن فعلًا ما تدري وش صاير لهم بالحقيقة .
١١:٥٧ م مساء الخير شلونكم اليوم ؟ ترا ما استخدم كلمة شلونك بس اليوم حبيت استخدمها . انا عن نفسي بخير و احس اني شوي رايقة ، اليوم تغديت لحم و اكل شعبي جتني "تخمه" اسمها هي كذا ؟ اللي بعد الأكل الثقيل و تبي تنام انتوا افهموها ، بعد الأكل كأني غفيت ساعة بس الغفوة اللي كأنك صاحي ، المهم اني الحين اتقهوى و سويت حلى مرة حلو بس مستعجلة خليته يبرد ساعة المفروض اكل بس مالي خلق انتظر بشاركم صورته ، جالسة اسمع اغنية لعباس ابراهيم " ذي ريحة الورد ولا انفاس محبوبي " عباس ابراهيم في قلبي ساكن و عقلي الباطني فيه مقطع في الأغنية اشوفه يمثلني " شفّاف قلبي و هذي اجمل عيوبي ، و انا بقلبي اشيل المر و الحاليّ .
١٠:١٣ م هلا والله شخباركم ؟ اتمنى تكونوا بخير . الصراحة انا موجودة بس ما كان لي خلق اكتب و كان بس فيني خمول و تعب من ضرسي بعد انا جدًا جدًا فاقده للصبر ، صرت بسرعة اعصب مو قادرة امسك اعصابي يعع الموضوع ، ايه صح بعد سماعاتي خربت وحده تشتغل و الثانية لا و هذا اكثر شيء يزعل 💔 المهم تدرون من الفضاوة وش سويت ؟ رحت لحسابات بعض الأشخاص اللي انا متابعتهم من زمان علمًا اني ما ألغيت متابعة احد من الناس القديمين و صرت اقرأ لهم ياخي اكتشفت ان فيه ناس كانت تكتب بشكل رائع و مخ يعني عقليتهم واو كلهم حساباتهم قديمة يعني اخر جواب لهم من سنة و فوق مره حزنت ، لأن احب الناس اللي كذا و حاليًا انا مو جالسة اشوف احد كذا فأحس ان الأسك فقد جوهره فقط هذا ما لديّ اليوم .
أحلى مقطع من أغنية تحبها🖤🖤؟
١٢:٤٥ م يا مساء الخير والله الصراحة اني قلت ما بجاوب على اي سؤال راح اكتب كذا بدون اسئلة بس هالسؤال وصل لقلبي . المهم اغنية " انا موجود" لداليا مبارك ... " ناهيك عن اني حفظتك سر فيني من الوله بان وتعرى لاحظوك الناس فيني وكل من قام يتجرّا " .
١١:٣٢ م هذا اليوم غير جيّد فيني طاقة سلبية نفسي اصارخ اسب انتقد كل شيء مب زين ، احس اني تعبت ابغى اتحلطم ، الجانب السيئ اللي فيني ابغاه يتكلم ، ضرسي يوجعني ، اذانيّ تقفلت ، مو قادرة افتح فمي و ابلع ، رأسي مصدع ، وصلني خبر اليوم سيئ ، هذي الأيام فعلًا اتمنى تنتهي ، عرفت ان كل شخص هنا اسلوبه مب زين و بس يتحلطم إنه ما يلام . انا اعلم يا أصدقاء ان هذي رسالة سلبية .
١١:٤٠ ص صباح الخير يا أصدقاء ... جالسة افطر و أكتب لكم ، ان شاء الله يكون هذا اليوم جيّد عاد اليوم ضرسي ملتهب و شبه مؤلم اول مرة بحياتي ضرسي يلتهب ! شكله ضرس العقل بيطلع لي مادري ! بوريكم فطوري و للمعلومية ؛ هذا المعمول انا صنعته فخورة بنفسي 😂 يالله اتمنى لكم يوم دونَ ملل❤️ .
٣:٠٣ م اليوم صحيت الساعة ١١ ص طبعًا اشوف نفسي صاحية متأخر ، لأن بالعادة اصحى ٦ اذا مره طولت ٨ الصدق إني ما حبيت احس راح الصباح بسرعة و الوقت يمشي بسرعة . عاد أفكر انو بس اسولف معكم في الليّل بس انا في الليل ما أطول احس النوم يداهمني بسرعة لأن اشوف الاغاني احسن وقت بالليل اشاركم فيها تدخل جو معها اكثر ، برضو انا حزينة عشان ما عاد ألتزمت بالرياضة انا توني مبتدئة ، بس الوضع يطفش مافيه عندي اداوت كثير غير كذا ودي امشي برا بس برضو ما يمديني يعني الحماس احس كل ماله يقل يالله عوافي تعدي هالمرحلة على خير ان شاء الله 🌱 .
٥:١٦ م مساء الخير يا أصدقاء احب الكلمة ذي أصدقاء ، بقولكم شيء يوم الجمعة عندي و هذي اخذتها من عادة عائلية ان يوم الجمعة يصير مرتبط بالعودة و ثوب و شماغ للعيال و البنات الأغلب جلابيات هو اصلًا الأغلب عندنا كذا في " السعودية "بس ابوي زمان كان يضيف عليها اذا رجع من المسجد و سلمنا عليه معه كيس ايسكريمات و يوزع علينا كانت عادة في ابوي مره تجنن ، بس طبعًا الحين ما صار يسويها مدري ليه ! طيب حتى لو كبرنا عادي ! المهم اني فقدت هالأعادة الحلوة ، بشاركم صورة من اليوم .
١٠:٤٢ م النّوم داهمني ، شكرًا لأنك قرأت لي . اذا جاء في بالك سؤال : توّك تشربين قهوة !؟ انا اجاوبك و اقولك من كثر ما اشربها ما صارت تأثر فيني وقت النوم تصبحون على خير ❤️ .
١٠:٢٩ م " الله على ذا الليّل لو كان ما جابك " هالأغنية دويتو عمر و ريّانه جميلة جميلة فيها كلمات كثير راح توصل مشاعركم ، مو مشكلة نتبادل الأغاني تعرفون اللي يقول لو خلّص الكلام بادلنّي الأغاني ؟ ان شاء الله انها كذا صح ! بوريكم بعد صورة كتبت عليها مقطع من الأغنية .
١٠:٠٩ م المفروض هالوقت اكون نايمة ، بما إني انام بدري و اصحى برضو بدري بس طبعًا اقاوم شوي لأن بيدي قهوة "عربي" كأني اسولف للبحر ! شعور حلو لأني اتخيلني قدام البحر سبحان من أعطانا القدرة على الخيال ، شيء على مزاجك و ينسيك الواقع شوي بعد يونسك ، الحمدلله .
الساعة : ٩:٥٧ م اسمع لرابح صقر "الصّمت" هالأغنية البيت الأول فيها وصل لأعماقي " كانك تحب الصمّت و انا اكره الصمتْ" امم بخاطري اسولف ؛ جاء بخاطري ارجع للكتابة و الخواطر ! الغريب اني تركت هالشّيء من زمان زمان مرة بس على الوضع اللي حنّا فيه طبيعي ترجع للماضي شوي.