هششش .. كله يسكت ! محمد احگ 💚🎙️⁩

آٓيَة ⚡
بالوقت يلي بتحس حالك بتحب شخص، بتكون أضعف إنسان تحت سماء ربنا، ليش! صراحةً ما بعرف، بحسّ إنه مفهومنا للحُبّ إنه لازم تكون ضعيف ولازم تكون الشخص يلي دائماً مكسور بسببه.
حتى بالعلاقات القديمة، وقت تشوف شخص كان حبيبك أو صاحبك أو أي اشي ثاني، رح تضلك ضعيف قُدامه، إنت بتنسى تماماً إنه هو مُمكن يكون تخلّى عنك، وبتنسى كيف قدر يروح ويخليك هيك، وبتركز بس على مشاعرك بهذيك اللحظة، وبتضعف.
ما بعرف ليش بحس إنه 80% من قراراتنا بتكون عاطفية وبعيدة كُلّ البُعد عن المنطق والحكمة، الحُبّ بعمره ما كان ضُعف، على العكس تماماً القوّة كلها لو تبحث عنها رح تلاقيها بالحُبّ، إنه تكون مشتاق للشخص يلي بتحبه والك فترة كثير طويلة ما شفته، هاي قوّة، وقت تحب شخص وتكون كل الظروف ضدكم، وتضلك متمسك فيه، هاي قوّة.
المفروض نحنا نكون قويين بعلاقاتنا، حتى قُدام يلي تركنا، المفروض نكون أقوى من إنه نضعف قدامه؛ لأنه اشتقناله مثلاً أو تذكرنا موقف أو أو، لو نفكر بالشخص يلي بنحبه بعقلنا رح نلاقي اختلاف عظيم لو نفكر فيه بقلبنا.
أوقات بشوف أشخاص من الحُبّ بصيبهم اكتئاب، تعاسة، تعب نفسي مُرهق، وما بنكر إنه كُنت منهم، بس استنى شوي!، أنا ليش لأكون ضعيف قدام شخص قدر يروح؟، ليش لأكون ضعيف قُدام شخص ما قدرني!، بكُلّ بساطة بحوّل كُلّ ضعفي لقوّة قدامه، وبدون أي مُكابرة.
الحُبّ بغض النظر كان بعلاقة عاطفية أو صُحبة أو أي مُسمى ثاني، المفروض يخلق مني رجل، الحُبّ اشي عظيم جداً، الحُبّ بخلي قلبك أقوّى من الصخر، وبنفس الوقت بخليه أنعم من الحرير، الحُبّ بخليك تعيش تفاصيلك كُلها.
ما تضلك ضعيف قُدام الأشخاص يلي بتحبهم، حبهم وتعلّق فيهم وتمسّك فيهم قد ما تقدر، بس وقت تحس حالك مُهمش، انسحب بكُلّ طاقة إيجابية عظيمة، وإثبت للشخص يلي قدامك إنه أنا أنولدت من قساوة الحُبّ وكبرت على إيد اساسها حُبّ.
لا تضعف، واجه، وكون الشخص المثالي لنفسك، كون إنت قدوتك ⁦❤️⁩