كلام مش مفهوم أبدًا، بس كلنا بنعيشه وبنحس فيه بغض النظر متّى، بس أنا واثق بإنه كُلّ شخص رح يقرأ رح يحس حاله هو يلي كاتب هالحكي.
مثلًا شعور إنه تكون وحيد، الوحِدة يلي بنحس فيها مش عدم وجود شخص بحياتنا، بالعكس كلنا موجود معنا أشخاص ما بتعوضوا، بس الوحِدة يلي بنشعر فيها هي "وحِدة الروح"، بتحس روحك وحيدة، ضايعة بعالمها الخاصّ، ما بتحس بأنه هالروح في لإلها زميل أو صديق بنفس مواصفات روحك.
أو شعور إنه تبكي، نحنا ما بزعجنا إنه نبكي، أو نصرخ، أو مثلًا تنام وإنت دموعك على خدك، نحنا مشكلتنا بإنه ليش بنبكي؟، أوقات بتضيع بالأسباب غير المعروفة، خلص إنت بدك تبكي، ليش؟، أقسم بالله ما بتعرف ليش؟ولو كان في سبب رح تستغرب من مدى بساطة هالسبب يلي بخليك تبكي، ونحنا وجعنا مش الدموع، نحنا وجعنا بإنه بنبكي بحرقة قلب، بتحس قلبك بتفتت، عمرك سمعت صوت قلبك وهو بصرخ؟، هالصرخة هي شهقتك بس تبكي بحرقة ووجع.
تفكيرك البعيد بمستقبلك، أو باحلامك، أو بالأشياء يلي بتتمناها، كان شخص أو فكرة أو مشروع، إنت ما بزعلك إنهم ما كانوا الك، وجعك وتعبك بإنه ليش ما كانوا إلي وأنا قدمت كل اشي مُناسب لحتّى يكونوا الي وملكي، هسا يمكن تكون قراراتك غلط بأنه اخترت هيك شخص أو هيك حلم أو هيك مشروع، بس إنت بالنهاية رح تحاول قدر المُستطاع تاخذهم من عيون القدر.
شعور بس تسمع أُغنية مُعينة، يمكن تذكرك بمكان، تذكرك بشخص، يمكن تذكرك بموقف أنت تعبت لنسيته، بس فعليًا لو نسيته ما كان تذكرته بمجرد سمعت هالأُغنية، وما كان هسا تذكرته أصلًا، نحنا جواتنا طاقة عاطفية عظيمة، ما بنقدر ننكرها، بنحاول نحكي "أنا نسيت"، وإنت فيك كُلّ الذكرى.
بس نتعلّق بشخص، صديق كان أو حبيب، ما بنزعل بس يروح، نحنا بنزعل على كل اشي قدمناه مشان يضلوا، بنبكي أوقات مش لأنه هو الفريد من نوعه، بس لأنه نحنا قدمنا شغلات كبيرة وعظيمة لالكم وكانت النتيجة غيابكم.
ضياع بين الكلمات والمعاني والأفكار، إنت متخيل القوّة يلي فيك وإنت شايل بقلبك كُلّ هالحكي، هسا هون المطلوب منك إنه لو فعلّا كنت حاسس بواحد من هذول، تحكي إنت كيف مُمكن تتخطى موقفك أو شعورك.
تأكد بأنه كُلّ هالحكي بعيشه كل شخص بتشوفه عينك، لهيك ما تفكر بإنه وجعك لحالك، هاذ وجع الكون كله، وجع مجتمع كامل، لهيك نحنا ما بنلاقي مين يسمعنا ومين يواسينا؛ لأنه بكلّ بساطة كل شخص بواسيك في شخص بواسيه.