في المؤتمر العميد قال الرسائل اللي خلصت الطلبة اللى كانت اتوزعت معاهم هيتوزعوا ع الرسائل اللي الدكاترة هيقدموا عليها لسه السنة الجاية وهتبقى فرصة كويسة تشتغلوا في الرسالة من الأول .. تابع بقى معاهم هتبقى فرصة كويسة جدا ان شاء الله ما تضيعهاش
هو الواحد لو عايز يتخلص من صفة معينة مؤخرا بقت فيه يعمل ايه زى الكبر ؟ مع العلم انى مش عارف اسيطر على الصفة دي جوايا و الموضوع ده مضايقنى جدا
كويس انك معترف ان عندك الصفة وعايز تتخلص منها .. شوف أسباب الكبر اللى عندك وحاول تلغيها .. يعنى لو عشان غنى فيه أغنى منك وممكن فلوسك تروح فى ثوانى .. لو عشان شاطر فيه اشطر منك وممكن اى ظروف تغيرك .. لو عشان جميل نفس الكلام .. المهم تكسر الأسباب اللى مخلياك تحس بالكبر كرر الدعاء للتخلص من الصفة دى لحد ما تثبت ف دماغك ف كل موقف .. قول اللهم اجعلنى فى عينى صغيرا وفى أعين الناس كبيرا وشوف الحديث ده بالمرة http://fatwa.islamweb.net/fatwa/index.php?page=showfatwa&Option=FatwaId&Id=31591
شايف ال بيحصل ف سوريا هو احنا ممكن نعمل ايه تانى غير الدعاء :(
لما بحس بالاكتئاب من حالات الظلم والاجرام اللى زى دى بقنع نفسى ان الدنيا مش مكان للعدل أبدا .. الدنيا مليانة ظلم ومآسى على مستوى الأفراد فى كل الدول .. وعلى مستوى الجماعات فى الدول اللى عندها مصايب زى دى .. والكلام ده موجود فى كل الأزمان من يوم خلق الأرض ليوم القيامة وبقنع نفسى بأن ربنا هيحقق العدل فى الآخرة والظالم هياخد جزاءه والمظلوم هياخد ثوابه .. اللى يقدر على حاجة تانية غير الدعاء يعملها .. اللى يقدر يوصل تبرعات مادية للاجئين يعملها .. لا يكلف الله نفسا إلا وسعها
بالنسبه للبحث بتاع cancer انا لسه طالبه في ثانوي وداخله مسابقة بخث علمي اننا نختار مرض معين ونعمل بحث وحاجات كدا تانيه فبو حضرتك تعرف اي افلام وثائقيه عن الموضوع دا او اي ابحاث حاجات عن اليوتيوب اومقالات
ايوة قولى كده :D بصراحة مقدرش أرشح حاجة معينة عشان مدورتش فى الموضوع .. ادخلى على يوتيوب ودورى هتلاقى حاجات كتير تشوفى اللى يناسبك منهم .. وانا لو صادف انى لقيت حاجة كويسة هجيبها واجاوب السؤال تانى :)
ده أشهر موقع للأبحاث الطبية .. pubMed http://www.ncbi.nlm.nih.gov/pubmed عبارة عن search engine زى جوجل كده .. بتكتبى الحاجة اللى عايزة تدورى عليها ويطلعلك كل الأبحاث اللى اتنشرت فيها ولو عايزة مواقع تانية وضحى بس هتحتاجيهم فى ايه بالظبط وانا هحاول أسأل وأساعدك (Y)
رأيى ان الجواز عن حب أحسن .. لما يكون الحب ناضج وكامل مش مجرد تعلق واعجاب بصفات ظاهرية بس .. الجواز ده هيكون مريح وهيتجاوز مشاكل كتير هتقابله عشان جوازات اليومين دول كلها مشاكل والحياة مش وردية .. هنا المفروض هيكونو مختارين بعض عن اقتناع كامل بالقلب والعقل وفاهمين بعض ويقدرو يهونو على بعض متاعب الدنيا .. ويعيشو فى تبات ونبات ويخلفو صبيان وبنات .... الناحية التانية وعلى عكس ما كنت بفكر زمان .. جواز الصالونات ده مش حاجة كخة ابدا جواز الصالونات بيتقدم فيه راجل محترم داخل البيت من بابه أحسن من شباب كتير بيفضلو معلقين البنات بيهم وأول ما يحسو بالمسئولية والزنقة يبدأو يتهربو .. وممكن يكونو معذورين فعلا عشان الظروف أكبر منهم ولما الراجل المحترم ده يتقدم البنت لها الحق توافق او ترفض لما تقعد معاه مرة واتنين وتبدأ تتعرف على شخصيته ونشوف هيحصل توافق بين الطرفين ولا لأ .. وفيه فترة خطوبة بيتم فيها نفس الموضوع بتاع التوافق وفيه جوازات كتير بتتأسس بالشكل ده والحب بييجى بعد كده لما يحصل توافق بين الشخصين ورغبة انهم يكملو حياتهم مع بعض عن تعامل حقيقى ويعيشو فى تبات ونبات ويخلفو صبيان وبنات برضه مفيش مشاكل :D(بعكس حالات الحب من بعيد واللى معظمها بتكون مش كاملة ومن غير تعامل شخصى شامل لمواقف العيشة الاساسية وبيحصل فيها حالات انفصال كتير برضه لما الواحد يكتشف انه ملقاش اللى عايزه فى شريكه)طبعا اى حد بيفضل النوع الأول لو كان متاح بالشكل الناضج والكامل اللى قلت عليه.. ده لو .. وفى كل الحالات انا شايف ان المفروض الراجل او البنت ميقررش ياخد خطوة الجواز غير لما يلاقى الشريك المناسب له فعلا واللى يهفو له قلبه ويقتنع بيه عقله عشان يعمل أسرة كويسة قايمة ع الحب او الاحترام تضيف للمجتمع وميكونش مجرد تكرار لعادات وأفكار معينة ونماذج بائسة كتير