Ask @IslamSamyOmara:

قولي شئ يعيدلي ثقتي بنفسي ارجوك بقيت حاسه ان كل الناس واخده عني فكرة مش حلوه وانه مش مرغوب فيا واي نظرة بتشككني في نفسي بسبب كلام امي الله يهديها امي كرهتني ف كل الناس بجد

لو عندك انشطة مفيدة اسبوعية بتعمليها مش هتحسي بالانجاز ف حياتك ..
و ساعتها دماغك هيبقي فاضي لكلام الناس ونظرات الناس حتي لو ميقصدوش اي حاجة ..
اعتقد من الافضل انك تشغلي نفسك بحاجات مفيدة ..
تهتمي بمذاكرتك لو لسة بتدرسي ..
وبجانب الدراسة لااازم وحتما تعملي حاجات تانية ..
تنزلي جيم نسائي بانتظام مثلا ..
تشتركي في انشطة جمعية خيرية زي رسالة ..
تاخدي كورس مفيد في شغلك او ف حياتك الشخصية ..
اساعدي مامتك في توضيب الشقة ..
تتعلمي اي مهارة جديدة .. في الطبخ او التريكوه مثلا او الديكور والتزيين او التفصيل او حتي تتعملي لغة جديدة حتي لو اون لاين ..
تتعلمي علم شرعي مثلا عشان تفيدي نفسك واسرتك وبيتك واولادك باذن الله وتكوني سبب ف دخولك انت وهم الجنة باذن الله ...
تشتركي في اي نشاط اسري محترم ومفيد ف الكلية او اي نشاط مدرسي لو في المدرسة ..
فييه ميييت حاجة تتعمل وتحسي بيها بالانجاز ..
ساعتها ملام الناس ونظراتهم ليكي مش هتفرق معاكي كتير ..
بس ابداي ومتكسليش في حق نفسك عليكي ..

View more

بجمّع اراء حول وضع الفتاة لصورتها الشخصية علي مواقع التواصل المفتوحة زي ' فيس بوك، اسك، تويتر " ومحتاجة اراء حضراتكم فضلًا .. هل مع الفعل مطلقًا؟ ام معه مع وضع بعض القيود ؟ ام ضد مطلقًا؟ مع ذكر العلل. وهل هناك فرق بين وضع الشاب لصورته ووضع الفتاة لصورتها؟

هاجر جلال
انا رايي مفيش مانع طالما بالحجاب و الصورة هادية من غير حركات او ميك اب او صورة بتشد باي طريقة
بعني مجرد تعريف عن الشخص ان صاحب الاسم دا هو الشكل دا ..
واللي مش بيحط صورته يبقي افضل ..
طالما مفيش ضرورة
وفيه شوية اسالة ممكن الواحد يفكر فيها لما يفكر ف الموضوع دا :
هي لو بنت لبست بنطلون ضيق نسبيا وملابس مبينة ملامح قوام جسمها الخارجي العام
وراجل لبس بنطلون ضيق نسبيا وباين ملامح قوام جسده العام
فيه فرق ؟
مين اكثر فتنة
طب هل شكل البنت عند الولاد بيفرق زي شكل الولد عند البنات ؟ زي بعض ولا حد بيفرق اكتر وبيشد اكتر ؟
هل وش البنت لوحده عند عدد لا بأس بيه من البنات مش كفاية انه يفتن رجال ؟ ويشدهم للنظر اليه بصورة متكررة او اطول من المعقول ؟
طب لو واحدة حفظت صورة راجل عندها فيه مشاكل علي الراجل دا من اي نوع ؟
طب لو راجل حفظ صورة بنت من الفيس عنده عالموبايل او اللاب .. فيها مشاكل من اي نوع؟
طب لو الراجل دا متجوز ..
والست دي متجوزة ..
مين هيتخاف عليه اكتر في الاحوال دي ؟
طب هل تحقير او تصغير للبنت انها اقل ولا عشان بيتخاف عليها اكتر ؟
انا مش فقيه طبعا ومش هتكلم من ناحية دينية اصلا مش انا اقول ايه صح دينيا وايه غلط
بس سيدنا محمد صلي الله عليه وسلم حذر من فتنة النساء علي الرجال محذرش من العكس
يعني فيه فرق اكيد ومعروف ومفهوم ومحسوس بيه ومنطقي
ومن دا كله بقول رايي ان يعني مفيش ضرر كبير ان واحدة محتشمة وغير متكلفة في صورتها انها تظهر دا عالفيس مثلا .. بس الافضل بلاش ..
ولو هي عارفة من نفسها انها جميلة .. وممكن حد يتفتن بيها .. اعتقد مش صح ساعتها انها تحط صورة .

View more

أنا عندي ١٧ سنة واخواتي كلهم ولاد وده مأثر عليا بالسلب وخصوصا اننا خارج مصر ، ودايما بيفضلهم عني.. فخايفة بعد كام سنة من دلوقتي افضل كارهه بابا لأن حاجات زي دي بتعلم فالذاكرة ومش بتتنسى ، خايفة لما يكون عندي اولاد ويكبروا اقعد احكيلهم عن عمايل بابا ... ادعيله ربنا يهديه

ربنا يهديه ...
ويهدينا جميعا ..
بكره هيعرف قد ايه البنت هي اللي هتحن علي باباها وهتشيله لما يكبر و يحتاج حد يرعاه !!
والولاد عادة بيطلعوا اندال نسبيا 😀 عشان ظروف حياتهم وانشغالاتهم حتي لو عندهم نية البر بالاب والام بس بردو بيبقوا اكثر انشغالا من البنات نسبيا .. الا من رحم ربي ..
طالما قادرة انك متشيليش منه وتسامحيه وتحبيه وتظهريله حنانك عليه .. اعملي دا وهو لما يحس بقربك منه هيطلعلك حبه اكيد اللي جواه بس مش عارف يطلعه ..
قربي منه اكتر بس رغم بعده عنك ..
وربنا يؤلف بينكما يا رب 👐

View more

بكره بابا حرفياعايش عشان يكسرني انتي مش هتحصلي حاجة هتدخلي معهد خدمه اجتماعية انتي مش هتتجوزي لا انا ولا امك بنطيقك انا بستعر منك وكل تلت دقايق بيقوم يضربني وضربه صعب جدا والله ده بيضرب بكل مافيه من قوة هز شخصيتي ومبقاش عندي ثقة فنفسي وكسرني مع اني متفوقه دراسيا والكل يشهد لي بالنعومة والجمال تعبت

مش عارف أقولك إيه ..
ومعرفش ليه بيعمل كدا :/
انا دايما قسوة والدي عليا ف وقت ما وانا صغير كنت ببقي مش فاهمها اطلاقا ومببقاش عارف بيعمل كدا ليه بردو ..
اي نعم مكانش بالقدر اللي بتوصفيه دا .. بس كان فيه نسبه منه ..
بس مع الوقت وخبرة التعامل مع والدي وتفهمي لشخصيته وظروفه لما كبرت واتخرجت واشتغلت ..
اتاكدت ان قسوته دي كان وراها حب !!!
معرفش ليه هو كان بيترجم الحب كدا ..
بس فيه شخصيات آباء كدا .. ميقدرش يشجع اللي تحت ايده غير لما يخوفه .. وبيبقي متخيل ان الضغط والقسوة والضرب والمعايرة هي اللي هتحفز الابن او الابنة وهتخليه شاطر ومركز و و و !!!
اكيد هو اتربي ان هي دي التربية وان دا الحل وان مفيش غير كدا ... للاسف ..
بس انتي هتعملي ايه ..
ربنا قدر ليكي ان دا والدك ..
وقدرك انك تصبري علي الاسلوب دا مفيش حل تاني :/
وصدقيني ربنا هيعوض صبرك خير .. مية في المية يقينا والله
لو سمحتيلي اني انصحك نصيحة جربتها ..
بس هي نصيحة صعبة اوي انها تتنفذ ..
انك متكرهيش باباكي .. وانك تسامحيه !!!
وانك لما يسيئ ليكي تقعدي بينك وبين نفسك وتقرري انك بردو مش هتكرهيه .. لانه ابوكي ..
اكيد بيحبك .. بس هو بيعبر غلط جدااا ..
واكيد شالك بحب وانتي صغيرة ولسة رضيعة وكان خايف عليكي !! اكيييييد
مش مهم بيعمل كدا ليه دلوقتي ومش هتفهمي دلوقتي خالص .. هتفهمي التناقض دا بعدين ..
بس لازم تحبيه وتحسسيه بحبك دا لو تقدري ارجوكي !
وتصبري وتدعيله في صلاتك ان ربنا يهديه ..
واخيرا متكرريش دا ف ولادك واختاري زوج هادي يربي اولادك بطريقة كويسة معاكي تناسبكم انتو الاتنين ويبقي فيه تغيير للافضل عن ما فات باذن الله .

View more

بابا مش بيرضى ياخدني اي مكان بسبب لبسي بسبب انه اللبس ده مكبرني - بلبس جيبات وفساتين - الموضوع تاعب نفسيتي جدًا 💔 احنا مش بنرجع مصر الا كل سنتين وبنقعد شهرين , الشهرين دول بيبقى فيهم مناسبات ف العيلة ونفسي احضر فعلًا لاني مش بشوف الحاجات دي برا ! :) انصحني نصيحة تهون على قلبي - عندي ١٦ سنة-

علي كدا لو واحدة منتقبة مثلا هتبقي كدا كئيبة وعجوزة ودقة قديمة وشكلها مش شيك .. او كدا مش هتعجب الناس .. ووالله دا مش صحيح بالمرة :/
هو بصراحة مسألة الللبس دي اذواق وبتختلف جداااا من شخص للتاني ..
والثابت ان اللبس دا بيعبر عن شخصية البني ادم فينا ..
انا بحب البس ايه .. وبحب يبان لبسي ازاي قدام الناس .. دا هيكون انعكاس شخصيتي علي لبسي ...
فالمشكلة مش هنا باباكي عايز ايه ...
المهم انتي مين .. وعايزة تباني ازاي ..
لو فارق معاكي جداا انك تلبسي علي احسن موضة عشان تبقي جميلة وهو دا مبدأ لبسك خلاص محدش هيقولك لا .. وللاسف المعظم هيشجعك جدا عشان تباني ف وسط الناس وتتابقي وكله يبصلك ..
وانا مش مع دا طبعا كرأي شخصي بحت بسبب ان المبدأ مبيحطش معيار ربنا عايز ايه من دا خالص ..
لكن لو بتلبسي واسع عشان دا مبدأك ودا اللي بيريحك ودا الللي بتحبي تباني بيه قدام الناس والاهم ان دا مناسب لدينك .. فانا رايي ان دي حاجة جميييلة جدا واياكي تتنازلي عن دا عشان مين ..
ولو علي باباكي .. سهلة خالص .. لو شافك ثابتة علي مبدأك وبتفهميه بلطف وبحب انتي بتابسي كدا ليه هيسيبك براحتك هو مهما كان بيحبك وفخور بيكي ..
دا مية مية اكيد ..
ولو شافك فخورة بنفسك ولبسك دا هو كمان مش هيطول في الكلام عن دا كتير ..
وبصراحة انا كولد بشوف بنات كتير ف مجمتعي لابسين ضيق .. مبحكمش عليهم طبعا من لبسهم ..
بس ببقي متضايق عشان عارف قد ايه دا بيضر الشباب من الولاد ..
ولما اشوف بنت لابسة هادي ببقي فرحان جدا .. وبحس ان دي فعلا من الجواهر النادرة في الزمن دا ..
ولا اعرف دي ولا اعرف دي بس اللي لبسها هادي بتعلي ف نظري جدا .. وعلي فكرة ف نظر شباب كتير جدا ملتزمين او غير ملتزمين كمان ...
كلنا كشباب عارفين الفروقات في لبس البنات بتفرق معانا ازاي معشر الشباب من الرجال ..
رايي شوفي انتي عايزة تبقي مين من جوا ومن برا وخدي قرارك وملكيش دعوة بحد !
وباباكي عامليه بكل حب ولطف وتفاهم رغم ثباتك علي موقفك :)

View more

خالتو حالفة متكلمنيش عشان مش بسأل عنها .. وأنا ف ثانوية عامة ومش بفضى أصلًا وعندي ظروف صحية ومريت السنادي بأزمات نفسية كتير وعايشة برا مصر .. دلوقت انا نازلة بعد العيد ، أكلمها ازاي ولا ابدأ ازاي من غير م احرج نفسي مع العلم انها عنيدة جدًا ؟! :)

J
الزعل دا وراه حب ..
ومش لازم هتحرجك لو سالتي عنها ..
لو بتحبك وبتزعل من قلة سؤالك بحق
ممكن تعاتبك وتقولك كلمتين عن انك مقصرة ف حقها لما تكلميها ودا محرج ممكن بس احراج طبيعي جدا وانتي ببساطة هتعتذري عشان انا كنت متضايقة ومضغوطة جدا و و ..
ممكن تبعتيلها رسالة الاول تقوليلها انها وحشتك جدا من باب تليين قلبها ناحيتك .. وبعد كام ساعة مثلا من وصول الرسالة تكلميها حتي لو عاتبتك بحب كفيش مشكلة ..
عموما موضوع ان عندنا ظروف كتير وضغوط نغسية بتخلينا منتواصلش مع اللي بنحبهم دي مبررات لتقصيرنا .. احنا بس مش متعودين نسال بانتظام .. والود والسؤال بانتظام دي عادة مكتسبة ممكن نبنيها وتبقي حاجة عادية ف حياتنا مع الوقت ...
بفرض انها قفشت منك جدا وفعلا مش عايزة ترد ومش عايزة تكلمك وان كان دا احتمال مستبعد ..
اعملي الواجب اللي عليكي من باب صلة الرحم طالما بتحبيها ابعتيلها رسائل كل فترة بانتظام وكلميها حتي لو مردتش او خلي مامتك تكلمها وف اخر المكالة تديهالك ...
يعني .. اعملي اللي عليكي بغض النظر عن رد الفعل ومتفكريش ف "الاحراج" بتاتا مع الناس القريبين منك
خلي الكلام دا شوية مع الناس الغرباء ممكن بتبقي مقبولة اكتر ... لكن احراج بين الحبايب .. مش مطلوب يبقي موجود

View more

https://ask.fm/IslamSamyOmara/answer/141704294723 *بنت* المشكلة ف انه الامتحان ده ليسننج يعني مفيش حاجة اذاكرها عشان اقول تعبت ولا لا ، ادعيلي ارجوك مش عايزة اكون السبب ف ان اهلي ينزلوا راسهم وخصوصا ان في ناس هتشمت. 💔💔

سيبيها علي الله .. بس كدا
متفكريش في العواقب كتير لانها مش بتاعتك اصلا ...
ومش هي المطلوب منك اصلا ..
المطلوب منك التركيز والسعي وبذل الجهد وفقط !
أهلك بيحبوكي مهما كان ..
واللي هيشمت ؟
لا مبالاتك بيهم هي اكتر حاجة هتخليهم يبطلو انشغالهم بنتيجة مجهودك ..
متحطيهومش ف المعادلة اصلا !!

View more

انا ف ثانوي مش مصري وضاعت مني درجة النهارده ، والدرجة دي واقف عليها مستقبلي وحاولت اقنع المدرسة ترفعني مرضيتش ، ادعيلي ربنا يردلي الدرجة بالله ، حالتي النفسية ف الارض جدا 💔💔

عن تجربة ؛؛
النتيجة النهائية ف الدرجات مش بتبقي بمذاكرتك
بتبقي بكرم ربنا بجد ..
طالما عملت اللي عليك حاول تسيب حقك عند ربنا طالما قدام ربنا ذاكرت وعملت اللي عليك .. متقلقش ..
فعلا متقلقش خااالص .. بطريقة ما ربنا هيعوضك باذن الله ..
حاول تعوض في اللي جاي وركز فيه عشان تاخد منه علي قد ما تقدر مكسب ..
*امشي علي المعادلة دي كدا وهتستريح باذن الله :
*قلل قلقك علي قاااد ما تقدر وبدله بمجهود
*اسند باحساسك بضعفك علي ربنا اللي قادر يثبتك ويوفقك .. سبحانه وتعالي
* اللي عدي ارميه وفكر ف الخطوة الجاية وفقط ..
ان شاء الله موفق وربنا يكتبلك ما يختار وهو الخير اكيد ان شاء الله

View more

حساسه جدا لدرجة اني لو بعت فولو لحد اعرفه ع الانستجرام ومقبلوش ممكن ازعل ايام وغيره وغيره تعبت جدا ما الحل؟

هو المثال بسيط وموضوعه سهل لو حد بينك وبينه عشم جامد والموضوع فارق معاكي ممكن تكلميه شخصيا ف رسالة تقوليله انه يقبل الفولو يمكن مخدش باله
لكن لو حد مفيش عشم ومفيش معرفة قوية الموضوع مش هيفرق اوي قبوله من رفضه وحتي الموضوع مش مستاهل كلام فيه معاه او حتي مع نفسك من باب اولي ..
بالنسبة للي ورا المثال
الحساسية الزايدة من خلال تجربتي .. اعتقد سببها ..
يا اما واحد عنده مشاكل كتير
يا اما واحد حبه لنفسه وتقديره لنفسه ضعيف شوية
يا اما واحد خبرته التعاملاتية .. مع الناس قليلة وما احتكش بناس كتير
او مزيج ما بينهم ..
الاولي سهلة ركزي ف حل المشاكل نفسيتك هتهدي
التالتة سهلة بردو هتيجي مع الوقت متشغليش نفسك اوي بيها عاجلا ام اجلا هتحتكي بالناس وهتتعاملي مع صنوف كتير ؛ المهم بس ف النقطة دي انك لو حاسة انك شخصية انطوائية انك ما تقفليش علي نفسك بزيادة وانك تتقبلي الاحراج والغلط وقلة المثالية ف التعامل مع الناس وانك تطلعي من منطقة الراحة ف قعدتك لوحدك بالتدريج .. وتزودي تفاعلك مع الناس بالتدريج ..
بالنسبة للسبب التاني وهو قلة التقدير الذاتي من طرق علاجاته حسب معرفتي
*انك تجيبي ورقة وقلم وتكتبي لستة بكل الحاجات اللي بتحبي تعمليها واللي لما بتعمليها بتخليكي مبسوطة واعملي حاجة منهم يوميا
* انك لما تحسي بقلة الثقة بالنفس قومي اعملي اي حاجة ايييي حاجة حتي لو كنستي حتة مالبيت وقلتي لوالدتك انك عملتي دا هتحسي بالانجاز ووالدتك هتدعيلك وقيسي علي دا اييييي حاجة لو بسيطة بس تحسسك " انك عملتي حاجة"
دا بيزود تقديرك لنفسك
جداا ف ساعتها
*هاتي ورقة تانية واكتبي فيها "انا بحب بنفسي وبقدر نفسي زي ما كدا بمميزاتي وعيوبي "
وحسي الكلام دا اوي و غمضي عينك وقولي لنفسك انا بحبك فعلا بجد جدااا بكل حاجة فيكي وانا راضية بدا
اكتبيها عشرين مرة يوميا لمدة اسبوعين او تلات اسابيع
او علي الاقل كل ما تضايقي او كل ما تفتكري لو مش هتلتزمي
تمرين ممكن يكون بسيط و غريب ومضحك لكنه فعلا فعال وانا جربته يوما ما
الفكرة اننا فعلا بنقتنع باللي بنكرره كتير سواء كلام او مشاعر او افكار او حتي كلام حد بيقولهولنا لو اتكرر كتير علي فترات منتظمة هنصدقه بالفعل !!
ودي حاجة سحرية حتي لو مش مصدقين في الاول بالكلام دا 100 في المية لكن مع الالتزام اعتقادك بيتغير
*في حل سحري يحل التلات اسباب دول سوا :
انزلي ف عمل خيري ومارسي انشطته بانتظام حسب وقتك او حتي نشاط مدرسي او طلابي لو ف مدرسة او جامعة هتفرق جدااا ف شخصيتك ..

View more

one person can change everything! agree , disagree and why?

الله سبحانه وتعالي هو مسبب الأسباب ...
لو عايز يشقلبلك حياتك للاحسن .. للاسوأ ..
عن طريق شخص في حياتك ... موقف يحصلك ..
مشكلة ... رسالة ما ... نصيحة ما ...
او بالهداية والالهام حتي من غير اي سبب كدا !!!
مؤمن ان اي حاجة من دول ممكن يكونوا سبب طبعا للتغيير المتكامل ..
بس بارادة ربنا سبحانه وتعالي ..
وطبعا المفروض يكون فيه استعداد من الشخص اللي هيتغير دا لان دا من القوانين اللي لو ربنا اراد انه يغير حد من غيرها فهو القادر ..
لكن القاعدة هي "حتي يغيروا ما بأنفسهم "
الخلاصة في ضوء ما سبق :
Am with :)

View more

ايه سبب وجع عروق الايدي او عروق الكف؟

لا أعلم
الرجاء سؤال دكتور أوعية أو دكتور باطنة علي الاقل
الحالة دي ممكن يكون سببها ولا حاجة او سببها نفسي او ضعف عام بسبب انيميا او اي التهاب عام او التهابات في الاوعية اصلا .. فالأفضل طبيب متخصص :)

View more

Next