المحبة مش في الظاهر من كلامنا، والصدق مش في حماس الوعد، والبقاء مش في الحلفان، والارتياح مش بالأسباب، والوفاء مش في كلمتين قولناهم، السر في اليقين، يقين الصدق اللي مش محتاجين له حلفان، اللي بيخلينا نقول بشكل تلقائي "مصدقك من غير ما تحلف"، في الشعور اللي بيخلينا نقول "مش عارف أعبرلك عن اللي جوايا"، في العدد اللي بتزيده واحد عارف أنه دائمًا معاك في أي طريق، السر في اليقين اللي بيخلينا نراهن على حد واحنا متأكدين ان رهانا معاه دائمًا كسبان، مُلخص جملة "كنت عارف أنك مش هاتخذلني"، اليقين اللي بيخليك تتبت في حد عارف أنك مش هاتكون يوم معاه في كفة اختيار؛ مش هاتكون في مفاضلة، حد هايشوفك دائمًا الأفضل؛ ولو حتى بدون سبب واضح.
الرزق الحقيقي انك تلاقي حد ماسك في قلبك قبل ايدك وانك تلاقي اللي فاهمك وخايف علي زعلك ومتهونش علي قلبه ابدا مهما حصل بينكو ولما تلاقي اللي يحبك بالفعل قبل الكلام واللي يخليك تحب نفسك وتتغير للاحسن لاهتمامه وحبه يطمنك بإنه جنبك، ده هو الرزق الحقيقي وأعظم شعور في العالم💙
دايماً فيه حد بيحبك وأنت متعرفش! ودايماً فيه حد بيفرح ويتبسط لما يشوفك أو يشوف صورتك وأنت متعرفش، ودايماً فيه حد متابع أخبارك وأنت متعرفش، ودايماً فيه حد بيمتن لموقف حلو عملته معاه أو كلمة حلوة قولتهاله في وقت صعب وغيرت فيه كتير وأنت متعرفش، ودايماً فيه حد أثرت بأي شكل من الأشكال في حياته وأنت متعرفش، ودايماً فيه حد مستني فرصة عشان يدخل حياتك وأنت متعرفش! حياتك مش هي كل العلاقات اللي ظاهرة قدامك ولا كل الناس اللي تعرفهم وبتكلمهم دلوقتي، فيه أشخاص كتير ورا الستار قد تمنحهم الحياة وتمنحك فرصة للقرب أكثر، ومنهم من ستظل تجهل مكانتك في قلبه طوال الحياة!
"كان عقلي فين!!!؟؟؟؟؟" جملة بنقولها لنفسنا كتير اوي على قرارات واختيارات كتير خدناها غلط وندمنا عليها.. تصرفات كتير عملناها من غير تفكير ودتنا في أماكن تانية ماكناش عايزين نوصلها وعيشتنا حاجات صعبة اوي كنا بنتمنى مانعيشهاش وخلتنا نقبل بأقل بكتير من اللي نستحقه.. بس معلش.. دايما بقول لنفسي معلش ماتزعليش كل اللي كان، كان لازم يكون علشان توصلي لحاجة في الآخر! كل الاختيارات الغلط هاتوصلك لحاجة صح.. هاتفرق في طريقك مهما كانت صعبة.. هاتفوز بحاجة في الآخر.. ♥️الندم احساس صعب اوي وممكن يدمر بني آدم، اتأكد دايما ان في حكمة وحكمة جميلة ولطيفة من ربنا علشان هو اللي دلك على الاختيار ده والطريق ده حتى لو كان مش أحكم ولا أحسن حاجة. ✨🤲"سلّم أمرك لله لتصل، فأنت بين عطفه ولطفه فبلطفه يحميك مما تخاف وبعطفه فإن قدّر عليك ما تكره فسوف يرضيك."🌸💜🌸#cpd
كل بصة في الميموريز هتوريك قد ايه الدنيا دي عبيطة ومش دايمة ولا ثابتة على اي حال مهما ظهرلك عكس ده ، الناس اللي كانت مهمة مبقيتش بنفس الاهمية ويمكن مبقيتش مهمة اصلًا والذكريات الحلوة اللي عملتها يمكن تعيطك وقت ما تشوفها تاني ، الحاجات اللي كنت تدفع عمرك كله عشانها مبقيتش عايزها اصلًا ، النفوس بتتغير والمشاعر بتتغير وانت نفسك بتتغير ويمكن اللي مكانش عادي مع الوقت بقى عادي جدًا ، الاهم من ده كله انك تتعلم من كل حاجة حصلت و متاخدش اي حاجة على محمل الابدية وتكون عامل حسابك في اي وقت انها ممكن تروح سواء برضاك او غصب عنك ومهما زعلت عليها لازم تتجاوزها عشان تقدر تكمل لأن هي دي الحياة للأسف.