"Don't Fetishize your Own Sadness"
من أفضل الاقتباسات من مسلسل بوجاك هورسمان، لما اتقاله إنك مرشح للأوسكار، إيه اللي إنت حاسس بيه يا بوجاك! جاوب بإن مفيش أى تغيير.. سأل نفسه أنا ليه فاكر إن فيه حاجة ممكن تسعدني؟ إيه اللي بيحصلي؟ والاقتباس ده كان الرد"لا تكن مهووساً بكآبتك".
هنا بوجاك رافض خالص إنه يستحق السعادة، مش مصدق إن شخص مهووس بالكحول، شخص كئيب سيء وفوضوي، شخص غير قادر على حل مشاكله، ومتسبب في أذى لنفسه واللي حواليه يستحق السعادة.
الحقيقة إن الاستغراق في الحزن والتعاسة لفترات طويلة بيجعل الشعور به مألوف ومريح، بيخليك وقت ما يحصلك حاجة جميلة بتحس إن سعادتك ده شيء غريب، شىء غير مريح بالنسبالك ومش متعود عليه، حاسسها مش كاملة، وقت ما تكون سعيد تلاقى نفسك تلقائياً تفتكر حاجة تزعلك، بيظهر عندك هاجس داخلي بيدفعك لرفض الشعود بالسعادة والرجوع إلى ما هو مألوف بالنسبالك، الرجوع للحزن.. الأمر اللي بيخليك توصل إنك ترفض أي حاجة حلوة ممكن تحصلك من أجل الاستمتاع بالشعور المألوف، بالشعور اللي تستحقه، وبتخليك تسعى بنفسك للشعور بالتعاسة. ده هيخليك ترفض أي شيء ممكن يحوّل حياتك للأحسن، لإنك وقعت في حب حزنك.
والحقيقة الأخرى هي أن الحياة فيها ما يكفي لجعل الإنسان تعيساً لفترات، فبلاش الإنسان نفسه يكون سبب في تعاسته الأبدية بدون قصد منه، والسعي تجاهها كشىء جميل ومُحبب ورومانسي.
ولذلك أُذكّر نفسي وإياكم دائماً: "لا تقع في حب حزنك ومعاناتك".

View more