كلمة لمريض سرطان يائس؟
الصحيح الي زمان ما بجاوب اسئلة ولا بشوفهم الاسك متغير علي نظامه، بس مش عارفة جاي ع بالي اجاوب لمجرد تخيلت عنجد سؤال مريض يائس ، بديش احكي بعرف الشعور بس وعيت من سنين على يأس ابوي ونفسيته من اول المرض كان بحاول ويقاوم وبندعمه طول ال٦ جرعات كيماوي وكان الوضع في تحسن ، بس بعد كم يوم من اخر جرعة اكتشف انه راجع انشط من قبل بكتير ومنتشر بالرئة اكتر والكبد والعظام والمثانة ،وبده يرجع ل ٦ جرعات اقوى من قبل وهو اصلا جسمه مهدود وتعبان ، المهم هاداك اليوم بالنسبالي وبالنسبة لابوي اصعب من اليوم الي عرفنا فيه المرض ومن يوم وفاته حتى ، حسيت كانه طول فترة مرضه زي الي بتسبح وبتعافر وما صدقت تصل لبر نجاة ويرجع حد يدفشك وتنزل لجوا ، روح ابوي ساكت كعادته انا واياه قاعدين قبال بعض ساكتين ودخن سيجارة وعصب علي خفيف بفشة غل ليش اعترضت عليها واول مرة قعدت اعيط قدامه ورجعنا ساكتين .. حاسة اني قاعدة بفضفض بس بالحقيقة بحكي هاليوم عشانه يوم فاصل بمرضه وكيف تعاملنا مع اليأس باخر الليل ، انا وابوي بالمناسبة علاقتنا قوية كتير ودايما بسمع مني نصايح ودعم بس هالمرة حسيت خلص فش فيها دعم الوضع كتير مفقود منه الأمل ونفدت منا كل جمل الصبر الي كنا بتقويه فيها كل الي حكتله يومها انه يخسرش صبره مش للمرض نفسه لانه بالنسبالي متقبلة يأسه، بعد كل هالطريق الي قطعه ما يخلي اليأس يفقد امله بربنا ويضيع اجر تعبه ، اذا خسر تعب الدنيا يحاول ما يخسر تعب الاخرة ، مش كلام مثاليات بس خلص ما في ايد الواحد يعمله غير انه يحاول يحافظ على أجر ربنا .. بعد ما مات ابوي اجت علي فترة بس اتذكر فترة مرضه وينحرق قلبي ع وجعه بس بعدين قرات اذا رحت تزور ميت ما تخبره باحداث الدنيا لانه ما بتهمه هلقيت فاكيد هاي الذكريات بطل الها قيمة كحزن يشغل قلبه فيها ، وانه كلها ايام ومرت المهم بشو طلع منها الواحد ، هاي الايام بتحس انها ما بتمر بس بالاخر الها نهاية بغض النظر عن النتيجة ، فوق اختبار جسدك للمرض فيه اختبار اعلى منه ، كيف قلبك وروحك طلع من هالايام يقابل ربنا حتى لو هالقلب تعبان ويائس من جسده ووضعه بس قديش بترجو من ربنا يعوضك ويكافئك ومستسلم لتدابيره وقدره اذا حسيت عنجد قديش هالدنيا فانية ..الكلمة المختصرة بعد كل برمي هههه : حافظ على أجرك :)
+ 2 💬 messages
read all