الحب دا طبيعي انه محدش بيتفق عليه لانه احساس وكل واحد بيوصفه حسب احساسه.. بس انا دايما بربط الحب بربنا.. سبحانه.. ف كذا حته ف القرآن بيقول إن الله يحب.. يعني من قبل ما يكون عندنا احساس بيه ف هو اصلا إحساس عند ربنا وبما اننا فينا نفحه من روح الله ف اكيد هنحس بحاجه جميله.. بس شعور الحب دايما بيرتبط بحد معين.. حد اقل ما يقال عليه انه بيشقلب قلبك.. بيخليك دايما مش ع بعضك لما بتشوفه بتحس انه شايف قلبك وهو بيتحرك ف كل حته.. شايف عينيك بتروح لكل الاماكن ومش ثابته وخايفه تيجي ف عينه دايركت كدهون.. بتبقي عاوز تعمل مليون حاجه ف الدقيقه تهرب وتقرب وتحضنه وتبعد وخايف ومرتبك وكل حاجه.. لما بيبقي مش موجود بتشوفه ف كل الموجودين.. روحك حرفيا بتسيبك وبتدور عليه.. ولما بيبقي موجود بتكتفي بشعورك وقتها.. اكيد مش هعرف اوصفه.. بتحب صوته وضحكته ومشيته وحركاته واسلوبه.. حاولو يعبروا عن الحب الشديد بكلمات كتير.. زي العشق والهيام والوله.. بس ما زال بالنسبالي انه ابلغ حاجه هي الحب هو الحب وبس.. انك تحب عموما بيشبع عندك كل احساس بالنواقص.. كأنك بتلاقي كل حاجه ناقصاك قدامك بس ف حد تاني.. الحب بيولد الغيره ..والغيره كل ما بتبقي عنيفه كل ما بتزيد حلاوتها.. أجمل احساس ممكن يعدي عليك ان اللي بتبحبه يكون بيحبك وبيحسسك انه كل مره حبه هو اكتر.. الحب وهم بتبقي فرحان بيه.. بتتوهم بصوته.. بشكله قدامك دايما.. مش بيسيبك حتي ف الحلم.. الحب محيط كل ما بتغرق فيه بيملاك لدرجه بيبقي محاوطك ومش عارف ولا عايز تخرج.. الحب بيلغي كل حواسك بيخليك اعمي مش ماشي ع الارض لا انت فوق فوق السحاب كمان.. دايما كلامك مع الحد اللي بتحبه بيحسسك بغباءك بس بطفوله مشاعرك اللي دايما بتزيد بساطه وعفويه.. الحب بيخليك انك لو بينك وبين الموت خطوه مش هتخطيها عشان عارف انك لما تموت مش هيكون معاك الشخص دا.. الحب يعني لما تسمع كلمه " ب ح ب ك " دي بتلغي كل وجعك وتعبك ومشاكلك.. الحب ان روحك تكون متبته ف روح حد تاني.. دايما بتحسهم منسجمين.. مختلطين.. دايبين بكميا رهيبه.. الحب انك عاوز تبقي انت وهو وبس لا ناس ولا اي حاجه تشاركك فيه.. الحب بجد انك تحتوي اللي معاك بكل عيوبه ومشاكله ونواقصه اللي هوا ايوا انا عاوزك وبس يهمنيش اي حاجه تاني.. ناس كتير بتتفلسف عشان تحط مصطلح معين بس مش بتقدر تطبقه ع حد تاني غيرها لانها بتوصف احساسها ف مرحله معينه.. محدش مر بيها.. الحب بيتشبه بحاجات كتير مع انه بردو ف الاخر مش هتلاقيله شبه.. دايما بحسه زي فرحه ام عقيم باول طفل ليها.. فرحه مغترب برجوعه لبلده.. فرحه جندي بانتصاره.. فرحه الارض العطشانه ف الصحرا وهي بتستقبل اول نقطه ميه عليها.. فرحه احساس اول مره بكلمه بحبك اللي منتظرها بقالك كتير.. الحب مش وقت.. ممكن يجي ف لحظه.. وممكن ف سنين.. الحب حاجه فوق الكلام والمعاني اصلا.. حاجه مش هتعرف توصلها غير مع حد مش انت اللي بتختاره.. حد بيختارك وتلاقي نفسك مش عارف تتصرف.. الحب بيصغر سنك بيخليك حاسس انه كل حاجه ملكك لو فرحت اللي معاك ولو بكلمه.. عيونك دايما بتلمع.. البسمه فوق روحك وقلبك قبل شفايفك.. بس كدا تقريبا مش عارفه 😊