Ask @Rahma_Remo:

كيف مات هوا؟

القصة ..
خوي شاكر ولد أمي وبوي ،عمره 19 سنة جوه مليح و شهلولي وطيب يوثق ف الناس كلها ،،
مرة تعارك مع جماعة صحابه و اقربائهم و صارت مشكلة و بعدين فاتت ، بعدها بأيام جو صحابه للحوش ف الليل الساعة 12 طلعلهم قالوله هيا تمشي معانا نحلو المشكلة ونتفاهمو ونهدرزو ع البحر قاللهم لااا توا ليل خلوها مرة تانية ،، أصرو عليه الا تركب معانا تو وصاحبه خبط ع صدره وقاله ع ضمانتي مايصير شي يا شاكر عاد صاحبك اني عيب !!
..
ركب معاهم شاكر ومشو بيه للبحر وهنا بدت الخونة ، هم خمسة اولاد تفاهمو مع بعض وخططو و داروله كمين ، لما وصلو بيه للبحر دارو تليفون للباقيين قالوللهم جبنا شاكر تعالو وجيبو السلاح ، جو الباقي و جابو السلاح وتلاقو عليه لدرجة انه يحسابهم يبصرو !
قعدو يضربو فيه وهو يقاوم فيهم خمسة عليه متلاقيين لما معش قدرهم هرب ضربوه ف رجليه لين طاح جوه و فرغو فيه "سبعة رصاصات" ف كتافه و جنبه و بطنه و رجليه (الرصاص مجرثم) ،و لما يتوجع ويعيط يضربو فيه بالأخمص متع الكلاشن و يحطو ف القزة متع البحر ع وجهه !!
و خدو تليفونه وهربو
لين جي واحد ع البحر لقاه ينزف قاله ارفعني نشوف امي بس بنموت ، سعفه للمستشفى و هم اتصلو بولاد عمي من تليفون شاكر وقاللوهم شوفو ولد عمكم وين ،، فزعو صغار عمي و خوي ومشوله ف المستشفى و لقوه قريب يموت لكن شاء الله انه فاق وشاف أمي و خوي وحكالهم اللي صار وسماهم بالواحد ،،قالها يا أمي اني شاكر الباهي شفتي شن دارو فيا :(( ،، ولأن الرصاص فيه جرثومة قعد يتعذب أيام و تسمم الدم والخلايا
و بعدها ربي خدي أمانته وإنا الى ربك الرجعى !
و هذا خوي شاكر الباهي و هذه الصحبة وقتنا هذا و هذه ليبيا و السلاح و هذه الدنيا ياسادة غدرو بيه و قتلوه ،،
.
..
{ومن يقتل مؤمناً متعمداً فجزآؤه جهنم خالداً فيها وغضب الله عليه ولعنه وأعدرلهرعذاباً عظبماً}.

View more

وخيتي ربي يرحمه ويغفر له خووك ومتخافيش فيه رب كبير حيأخدله حقه بإذن الله .وحسبي الله ونعم الوكيل :(

HaGeR ツ
و نِعم بالله ،، وما ربّك بظلاّمٍ للعبيد
ان شالله و باذن الله و مش ح يرتاح فؤادي لين يهدرو دمهم زيما هدرو دم شاكر :')) حسبي الله ونعم الوكيل

View more

لكْ ، تحَدثّ .. سَأصغِي لِجمالِ مَآ تَكتُبْ ..❤!

#ولي_مع _الحنين_حكآيةة ♡
خليت مكانك ومن يملاه 💔
فقدت ضحكتك العالية و غناك اللي بابا يهزب فيك عليهم ديما،فقدت هبالك و حكايات لي تحكيلي فيهم ،بعدك مافي حد ضحكني و بصر عليا، ،من مزال بيخش لداري و ينوضني من سريري ويرقد فيه،من بيرفعني من ايدي للكوجينا ويقولي جعان وراس رحمة لما اديري ماناكل، من بيهزبني ع اللبس و يعاركني، من بيكلمني ع الوتساب ويبعتلي صور تضحك ،ولا من بيرفعني لصحباتي،خليت مكانك يا شاكر 💔 قتلوك وحرموني منك،حرموني من ضحكتك الهبلة وحركاتك 💔 حرموني من طلتك الصبح عليا لما تجي تسألني مليحة الطرحة ولا! مليح شعري هكي ولا"! حرموني من ميعادنا لما نتذكرو ايام الطفولة ونضحكو ع عمايلنا زمان ،استحشتك واستحشت هزوتك وتعليقك ،ماقعدلي شي يا شاكر غير صوراك ، آخر مرة قبل لياخدوك كلمتك ع الوتساب وقتلك وينك معش شفتك يا معفن ،قتلي قاعد ف الحوش ،نحساب بنديرو عكسة و نهدرزو ،لكن كان آخر كلام بينا ،،
اخخي الدنيا من بعدك يا شاكر 💔
.
#رحمة الله الواسعة عليك يا طيب.

View more

تعرفي أنا خويا … كان عريس بعد عرسه بــ 14 يوم كلموه ناس قالوله أصحابك مُصابين ومافيش من يسعفهم مشالهم هو خذاهم للمستشفى و هو طالع انضرب و توفى .. أصحابه عاشوا و هو مات ! اللهمّ لا اعتراض على قضائك … ربي يصبرك أنا حاسة بيك و ان شاء الله ربي ياخذ الحق من القَتلة عاجلاً غير آجل … الله يرحم خيّيك :(

لا حول ولا قوة الا بالله 😔😔 اللهم لا اعتراض ،، حراام قاعد عريس 😔تووجع والله هلبا ان شالله ربي يرحمه و يغفرله و يسكنه الجنة ،
آمين يارب بارك الله فيك، ربي يحفظلك ❤ باقي عيلتك و تكون هذه آخر مصيبة
.

View more

لا حول ولا قوة الا بالله الله يرحمه ويغفرله يا وخيتي نشهد بالله ما فيش اصعب منه الفراق وبذات ولو بالظلم ربي يصبرك انتي وعويلتك وكل ناسه واحبابه عليه ربي ينور قبره ويرحمه ويغفرله وبجعله من الثوابين الصالحين وحسبي الله ونعم الوكيل في كل قاتل حسبي الله ونعم الوكيل عظم الله أجركم يا وخيتي 😞

Nashama ✨
بارك الله فيك وشكر الله سعيكم وااااعرة هلبا مش شوي ، حسبنا الله ونعم الوكيل !

View more

مساآحةة ..❤!

#ولي_مع _الحنين_حكآيةة ♡
.
خوي شاكر اللي تربيت نا واياه مع بعض و لعبنا و تعاركنا مع بعض شاكر اللي تعودت يضحكني و يبصر معاي ديما و ينكت و شهلولي ،، شاكر اللي نتصل بيه نتسهوك و يهزبني ولما يروح يجي يضحك و يهدرزلي ،،
شاكر خوي الضحكة متفارقش وجهه
شاكر خوي لا يمشي لجبهة ولا عمره قتل حد
آخر الوقت داروله كمين و غدرو بيه وقتلوه بدم بارد !
شاكر خلاص عند ربي معش بيرجعلي ولا عاد بنشوفه معش بيضحكني ولا بيتسهوك عليا ،، شاكر دفنوه تحت التراب !
شاكر خوي قتلووه !

View more

قريت قصة خوك وبصدفة ، لكن بكتني بجد ، حسبي الله ونعمه الوكيل فيهم ربي ينتقم منهم و ان شاءالله عقابهم يكون ف الدنيا وفس الاخره يارب ، والله يرحم خوك ويغفرله ويدخله فسيح جناته ، ويصبركم يصبر مامتك يارب وعظم الله اجركم ، ونهاية الحزن ان شاءالله

جـوري بن صريتي
ونعم بالله حسيباً شكر الله سعيكم ، ان شالله يارب بارك الله فيك

View more

عظم الله اجركم وخيتي ربي يرحمه ويغفرله ويوسع عليه ويجعل مثواه الجنه ويجعل قبره روضه من رياض الجنة ياارب، اللهم اغفرله وبشره بالفردوس الأعلى ❤ 😔 وربي يصبركم

Maraam
شكر الله سعيكم ، آمين يارب و نعم الدعاء ربي يبارك فيك و يحميك ان شالله

View more

Next