Ask @SherifArafa617:

ازاي اثق في نفسي يا دكتور؟

١- وفر اسباب الثقة (حقق انجازات حتى لو صغيرة)
٢- الحوار الذاتي الإيجابي (ذكر نفسك بهذه الانجازات دائما)
٣- درب نفسك (مارس المجال الذي تريد ان تكتسب الثقة فيه)
٤- تفاءل (الشيء الجيد سيحدث غالبا، حتى السيء سأستفيد و أتعلم منه)
٥- استقبل مؤثرات تعطيك الثقة (اصدقاء- محاضرات- كتب...الخ)
٦- استعن بالله (المشاعر الايمانية و الروحية تساعد على تحقيق الذات)

View more

برأيك ما سر انتشار فكر الالحاد اخر 5 سنوات بعالمنا العربي ؟

السبب هو عدم تطور الخطاب الديني في مجمله بشكل يواكب تطور المناهج الفكرية و أدوات التفكير النقدي او حتى البحث العلمي الحديثة.. ما أوجب ظهور مجددين في الخطاب الديني لا ينفر منهم الباحث او المفكر المثقف -كعدنان ابراهيم مثلا- لكن على استحياء بسبب كثرة الموصومين بالامية الثقافية و الكسل العقلي، الذين يزعجهم تجديد فهم النصوص الدينية و كيفية التعاطي معها (لذلك تم تكفير الأئمة الأربعة في زمانهم لأنهم أتوا بجديد على عصرهم)... تجديد الخطاب الديني مرحلة سبقنا فيها كثير من المبشرين المسيحيين في الغرب ، مثل وليم لين كريج الذي يواكب نظريات فيزياء الكم و يحيي نظريات علم الكلام الاسلامي لإثبات وجود الله ( Kalam cosmological argument) اما عندنا فيكفرون المتكلمين بل لازال يكفر طه حسين لانه اعمل أدوات البحث العلمي في مراجعة الأدبيات المرتبطة بمراجع التاريخ الديني.. باختصار: الإلحاد نتيجة طبيعية حين تتسع المدارك بينما يزداد الخطاب الديني ضيقا و تضييقا.

View more

انت ليه بتكره الإخوان؟ موقفك منهم بيخليني اعجز عن قراءة اي حرف تكتبه في كتبك... واحد يتبنى موقف منغلق تجاه فصيل في الوطن وبيكتب عن التنمية الذاتية و الانفتاح... امر لا استوعبه ابدا.. أعتقد حقا انك تخدع نفسك..

فكرة انك عاجز عن القراءة لي في التنمية الذاتية لسبب ايدولوجي, تدل على شخصنة هاتعوقك عن طلب المعرفة عموما.. اينشتاين عبقري في الفيزياء رغم انه يهودي و عمرو مصطفى ملحن جيد رغم الخلاف مع توجهاته و دكتورة نوال عمر استاذة كبيرة رغم الاختلاف حول اسقاطاتها السياسية.. لو ماتعلمتش غير من اللي متفق معاك في كل حاجة فمش هاتتعلم أي حاجة.. لأن الحكمة ضالة المؤمن و المفروض تدور على المعرفة في ذاتها مش اتباع أشخاص.
ردي ببساطة: الانفتاح و فهم الآخر خلاني ارفض اللي شايفهم اعداء الانفتاح و تقبل الآخر! لاحظ اني قلت أرفض مش أكره.. الانفتاح على الآخر لا يعني تأييده!
بعض التيارات بتحرم على اتباعها يقروا لحد خارج التيار عشان مايتلخبطش و يفضل طوع في إيديهم, في حين اني ازعم ان التفتح الذهني خلاني اقرا أدبيات الإخوان و أدبيات غيرهم من كل التيارات اللي قدرت اوصل لها و اختار في النهاية اللي يقنع عقلي و ضميري.. مش امشي ورا تيار لمجرد اني ماقريتش لغيره و مش فاهم غيره !! و ده اللي بانصح بيه دايما: القراءة لكل التيارات و تحكيم العقل و الاختلاف و المراجعة النقدية حتى عند قراءة كتبي.
لو قريت الفصل 15 في كتاب "لماذا من حولك أغبياء؟" هاتفهم موقفي: مش مطلوب أرضي كل الناس لأن المهم أرضي عقلي و ضميري.
تحياتي

View more

ليه مدربي التنمية البشرية اللي معاهم "مفاتيح النجاح" مش كلهم ناجحين...؟

لأن مدرب الكورة مش شرط يكون لاعب كويس... و الطبيب مش شرط تكون صحته كويسة.. سلوكهم لا يشكك في علمهم.
عشان كده واحد من الحكماء زمان قال: خذوا علمي و لا تأخذوا عملي!
المدرب معاه تقنيات و معلومات بيديهالك، ممكن تطبيقها بمليون طريقة و تحقق نتايج أحسن من المدرب نفسه.
المهم تكون التقنيات دي مبنية على دراسات علمية.

View more

ازاي اثق في نفسي وانا معنديش مهارات او معرفة قوية، انا بالفعل بدات في التعلم بس ده طريق طويل، فلحد ماكون قاعدة معرفية مناسبة مش عارفة اثق في نفسي !

احمد زويل و هو بياخد نوبل، قال في كلمته بالعربي: ويل لطالب علم رضي عن نفسه. و أينشتاين قال انه مش عارف كل حاجة لكنه زي طفل بيلعب على شط العلم. إحساسك ده معناه انك صادق في البحث عن الحقيقة لان اللي حاسس انه عارف كل حاجه مجرد انسان جاهل انه جاهل. رأيي ان إحساسك ده دافع قوي عشان تبذل مجهود اكبر في التعلم و اكتساب المهارات يعني ممكن تستغله لصالحك. و كل ما تمشي في الطريق اكتر هات كتيب ثقة لأنك هاتلاقي نفسك بقيت افضل من ناس كتير مش عارفين اللي انت عارفه. خلي بالك ان حب البحث و الاجتهاد في طلب العلم، بينور القلب و يرفع من تقديرك لنفسك و قدراتك.
تحياتي،

View more

ممكن نصائح تساعد على زيادة الثقة بالنفس ؟

١- وفر اسباب الثقة (حقق انجازات حتى لو صغيرة)
٢- الحوار الذاتي الإيجابي (ذكر نفسك بهذه الانجازات دائما و أنك جدير بما تريد تحقيقه)
٣- درب نفسك (مارس المجال الذي تريد ان تكتسب الثقة فيه بشكل عملي و بالبروفات الذهنية)
٤- تفاءل (الشيء الجيد سيحدث غالبا، حتى السيء سأستفيد و أتعلم منه)
٥- استقبل مؤثرات تعطيك الثقة و الدعم النفسي (اصدقاء- محاضرات- كتب...الخ)
٦- استعن بالله (فلسفة الحياة المتماسكة و المشاعر الروحية عموما تساعد على تحقيق الثقة)

View more

سؤال غريب شوية . إيه اللى بيخلق عند البنى آدم اللهفة لتملك شىء ..ثم الفتور بعد تملكه ..وربما مع الوقت يمتلك شعور بالكراهية تجاه ما كان يتمناه سابقاً .. هل يمكن المحافظة على نفس درجة حب الإنسان للأشياء التى يتمناها حتى بعد أن تتحقق أم أنها طبيعة بشرية كما ذكر د. مصطفى محمود رحمه الله بأن النفس ملولة؟

Mohamed Boshkash
طبقا لعلم النفس التطوري: الرغبات آلية بدائية موجودة جواك لتعطيك دافعية للبقاء و الحفاظ على النوع.. يعني بتخليك "عايز" توصل لهدف معين لأنه بيساعدك في الاستمرار في الحياة بشكل ما، و طبيعي لما تحصل عالحاجة دي، تتعلق بحاجة تانية لأن هدف البقاء نفسه مستمر.. زي ما تكون عايز تاكل دلوقتي، مش معنى كده انك لو أكلت فانت مش محتاج تاكل في المستقبل!
الموضوع بقى له معنى تاني في العصر الحديث.. إن الإنسان كائن متطور و جواه رغبة انه لازم يكون احسن طول الوقت.. عشان كده بيتقال ان السعادة هي الرحلة مش الهدف النهائي.. عشان ساعات مابيبقاش فيه هدف نهائي غير الطريق اللي بيدي معنى لحياتك.. فماتقرنش سعادتك بتملك اشياء مادية بس، لكن بفلسفة حياتك اللي تخليك سعيد و انت ماشي في طريقك و مقدر للحاجات اللي متملكها بالفعل و تفكر فيها دايما.

View more

كيف يتخلص الانسان او يقلل من تأثير التفكير العاطفى على التفكير العقلانى ؟؟

لا يمكن التخلص تماما من تأثير المشاعر لأنها جزء من عملية التفكير "العقلاني" كما أثبتت دراسات المخ و الأعصاب.. كل ما يمكن فعله هو تقليل تأثيرها.. و هناك عدة طرق يمكن استخدامها لهذا مثل : قبعات التفكير لدي بونو، التقمص العاطفي للشخص المخالف للنظر بعينه، تأمل للمشكلة منطقيا من المواقع الثلاثة (وجهة نظرك- الشخص المقابل- شخص من خارج المشكلة) ، و إعادة التفكير في نفس المشكلة و أنت في حالات شعورية مختلفة.. و الأهم من كل هذا دراسة المنطق عن طريق التعرف على "المغالطات المنطقية" على الأقل، لعدم الوقوع فيها.

View more

عايزة اقرء عن الاسلام و افهمه بعقلى بدل الحفظ اللى حشو بيه دماغنا دا..عايزة كتاب يقنع عقلى و يجاوب ع التساؤلات اللى عندى...ممكن تفيدنى اقرء ايه ولمين؟؟!

Ola Magdy
أولا: السؤال ده ممكن تسأليه لحد متخصص.. اقترح تتصلي بدار الإفتاء أو تسألي حد تعرفيه دارس في الأزهر الشريف.
ثانيا: كمسلم عادي على باب الله باحب اقرا في ديني, اقترح تقري في المذاهب و المناهج المختلفة و انتي اللي تحددي بنفسك ايه اللي قلبك و عقلك استريح له و اقتنع بيه..ماتسلميش عقلك لحد على اعتبار ان الاسلام مفيهوش كهنوت و لا احتكار للدين.. يعني اسمعي مثلا مجدد زي عدنان ابراهيم وصوفي زي الحبيب علي الجفري و سلفي زي الحويني و محمد حسان...إلخ
عموما، لو بتتكلمي عن "العقل" و "الإقناع" اقترح تقري دول مثلا و تفكري فيهم :
السنة النبوية من أهل الفقه وأهل الحديث- محمد الغزالي
مقاصد الشريعة الإسلامية- الطاهر بن عاشور
الحرية الدينية في الإسلام- عبد المتعال الصعيدي
تمهيد لتاريخ الفلسفة الإسلامية- مصطفى عبد الرازق
الإسلام وأصول الحكم- على عبد الرازق
المدرسة الإسلامية- محمد باقر الصدر
تجديد الفكر الديني في الإسلام- محمد إقبال
الإسلام دين الفطرة والحرية- عبد العزيز جاويش
الحياة الروحية في الإسلام- محمد مصطفى حلمي
المرأة والعمل- نبوية موسى
و طبعا كموسوعة ترجعي لها من حين لآخر: فقة السنة- السيد سابق
طبعا الكتب لتوجهات و موضوعات متنوعة و مختلف عليها.. لأني مش هاقول لك "اقري لفلان لأنه بيقدم الاسلام الصحيح" لأني لو قلت كده أبقى باتجرأ علي دين ربنا الواسع اللي مليان اجتهادات و مذاهب... اقري للجميع و اختاري اللي يقنع عقلك و ضميرك لأن الموضوع نسبي جدا و الناس بتختلف في مستويات فهمها.. عشان كده النبي أمر تستفتي قلبك انتي، مش قلب حد تاني.
تحياتي

View more

تقريبا كده حضرتك بتقرأ كام كتاب فى السنة ؟؟

مش عارف.. دي الكتب اللي في الشغل، بس ده غير الدراسات اللي عالانترنت طبعا
الصورة كبيرة عشان لو عايز تقرا العناوين

View more

ايه راي حضرتك في ال د. احمد خالد توفيق؟

على المستوى الإنساني شخص في غاية التواضع و دماثة الخلق.. شخصية جميلة فعلا و سعيد بمعرفته على المستوى الشخصي بالإضافة لكوني واحد من معجبيه الكثيرين طبعا. رأيي الشخصي إن جيلي اتربى على كتاباته و اسلوبه و افكاره و ده يخلي له دين في عنقي إلى الأبد.. قد اختلف معه في بعض آراؤه السياسية مؤخرا لكني متأكد تماما انه مؤمن بكل حرف بيكتبه و مخلص في حبه للبلد لأقصى حد و ده مخليني محترمه جدا.. و في النهاية لازم نتفق أننا استحالة نتفق في كل حاجة.

View more

احمق من يعتقد [.....................] ♥♥ ؟

...أنه ليس عُرضة للحماقة!

View more

حضرتك كنت اتكلمت فى كتاب لماذا من حولك اغبياء عن لغه الجسد وازاى تعرف ان اللى قدامك بيكذب مفيس علامات تانيه ؟

ممكن تعرف الابتسامة الحقيقية من الزائفة.. الابتسامة الحقيقية بتعمل تجاعيد صغيرة جنب العين اكتر من الابتسامة الزائفة.. فلو تعرف الشخص كويس ممكن تقارن و تعرف ابتسامته المرة دي حقيقية و للا لأ.. و مش سهل انها تتزيف.. اسمها العلمي duchenne smile لو حبيت تقرا تفاصيل اكتر.

View more

هو حضرتك تخصصك ايه .. ؟؟

ماجستير إدارة الأعمال تخصص إدارة الموارد البشرية... و حاليا أدرس ماجستير علم النفس الإيجابي... و في الأصل حاصل على بكالوريوس طب و جراحة الفم و الأسنان.. إلي جانب شهادات تدريبية مختلفة كتصميم البرامج التدريبية من الاتحاد الأمريكي للإدارة و غيرها
تخصصي في الكتابة هو مجال التنمية الذاتية، و حاليا مهتم بالتحديد بتطبيقات دراسات علم النفس الإيجابي و علم النفس الاجتماعي.. و هو ما أتناوله في كتابي الجديد.
و تخصصي في الرسم: فن الكاريكاتير و حاصل على جوائز دولية في هذا المجال.

View more

انت بقي مش عاجبك عقليه الناس اللى متابعه الجزيره انت اكييد بتتفرج على خميس الحديدى وعكاشه واحمد موسي صح

رؤية العالم بنظرة بدائية أحادية (يا ابيض يا اسود) شيء مثير للشفقة فعلا لا يبررها إلا صغر السن.. يعني انت لو مش عيل في إعدادي بيسأل سؤال زي ده فأنت في مشكلة حقيقية!

View more

يا دكتور انا بحبك كتير والله.. وقرأت كل كتبك ولكن عندي سؤال كيف يمكن للانسان ان يكون سعيدا اذا كان فلسطيني؟ احنا كتب علينا الهم والحزن الى يوم الدين :(

و الله و أنا أحبك و أحب شعب فلسطين العظيم. السعادة ليست مجرد استمتاع ، بل هناك مفهوم علمي للسعادة هو Eudaimonic wellbeing, و الذي يتحقق حيت يكون لحياتك معنى و هدف و فلسفة متماسكة لفهمها.. إذا كنت وسط من يدعمونك نفسيا و في داخلك هدف و رسالة و معنى تعيش من أجله، فأنت -علميا- إنسان سعيد حسب هذا التقسيم. انظر للجوانب المعنوية في حياتك و قدر كل لحظة تعيشها في هذه الحياة. تذكر دائما أن هناك من هو أسوأ حالا في عالمنا هذا، فهناك من لا يجد طعاما و شرابا و مأوي كي يمتلك بالا رائقا -نسبيا- كي يكتب سؤالا على الإنترنت و يقرأ الجواب. أنت تقرأ و تكتب و تدخل الإنترنت و نلت قسطا من التعليم و الثقافة، و يكفيك فخرا أنك فلسطيني.. لاحظ أنك لم تخسر كل شيء في حياتك فلديك الكثير جدا،و كل الخيارات متاحة و قصة حياتك لازالت مستمرة، فحاول صياغتها كما تريد لها أن تكون.
ربنا كبير

View more

أستاذ شريف ، بعض الناس تعتقد أن التنمية البشرية مجرد كلام حماسي بينتهي مفعوله فور الأنتهاء من سماعه وتأثيره لحظي كذلك سمعت إنه ابراهيم الفقي كان نصاب ف ما تعليقك؟

مش هاتكلم عن حد .. هاتكلم عن نفسي:
اللي باقدمه دراسات في علم النفس الإيجابي و إدارة الموارد البشرية و الاتنين علوم أكاديمية.. بعض التقنيات تأثيرها لحظي و البعض التاني بيفتح لك الباب و انت اللي لازم تمشي فيه بنفسك.. مفيش كلام هايغيرك و يخليك ناجح.. زي ما قلت: قراءتك لكتاب عن السواقة مش هايخليك تعرف تسوق.
أعترف ان المجال فيه بعض التقنيات غير العلمية زي البرمجة اللغوية العصبية ، لكن مش بارفضها بالكامل لأنها عبارة عن كوليكشن من العلاج المعرفي السلوكي و التحليل النفسي و الجشتالت و دي مدارس في علم النفس برضه.. رغم اني قابلت مؤسسها و لي اعتراضات كتير على افكاره. ممارسة البعض لحاجات زي العلاج بمراكز الطاقة و الريكي ليس له أساس علمي لكنه بيدخل في العلاج بالإيحاء.
الخلاصة: تعبير "التنمية البشرية " ده قماشة واسعة جدا بتشمل حاجات كتير.. منها العلمي و غير العلمي و منها الحماسي و الاستراتيجي.. و أنا مسؤول في النهاية عن اللي باقدمه مش اللي بيقدمه حد تاني.. وواجبي أتطور مع الوقت و اقدم لقرائي مادة أفضل مع كل كتاب جديد، مش أقدم نفس الخطاب اللي بدأت بيه.

View more

انت ايدلوجيتك اسلامية؟ ب

الإسلام مش أيدولوجية..الإسلام دين، ممكن يؤمن بيه أشخاص من أيدولوجيات و ثقافات مختلفة و كل واحد يفهمه بطريقة غير التاني.. ده مايخليش أي حد منهم "اكثر إسلاما" من التاني.. يعني ماينفعش يتقال مثلا ان اللي بيتبع الفهم الحرفي لظاهر النص بدون تأويل أو تجديد أو اتباع لفقه المقاصد أو مراعاة للعصر، هو اللي "ايدولوجيته إسلامية" و التانيين لأ!
الإسلام رأسمالي و لا اشتراكي؟ الإجابة هي: لا ده و لا ده .. الإسلام دين.. لكن الرأسماليين هايقولوا انه دين رأسمالي عشان كثير من الصحابة كانوا تجار و كان فيه أحرار و عبيد و اقتصاد سوق.. بينما الاشتراكيين هايقولوا ان الاسلام دين اشتراكي عشان المؤاخاة بين المهاجرين و الانصار و فرض الزكاة و العدالة الاجتماعية..
أنا مسلم.. و ده لا يعني ألغي مرجعياتي الثقافية و الفكرية لكن استخدمها في فهم الدين

View more

ضروري يكون الانسان اجتماعي ؟

رغم ان الموضوع متعلق بسمات الشخصية، إلا إن الإجابة للأسف هي: آه. لأن كون الانسان اجتماعي مفيد له مهنيا و نفسيا...
فلو انت انطوائي : ممكن تختلي بنفسك بعد ما تقابل الناس عشان تشحن بطاريتك من حين لآخر، لأن الموضوع مفيد بشكل كبير جدا.
لو قررت انك تبعد عن الناس تماما، ده هايكون مريح بالنسبة لك على المدى القصير، لكن عالمدى البعيد هاتفقد فرص للدعم الاجتماعي و تكوين شبكة علاقات مفيدة في الحياة العملية لفتح ابواب فرص جديدة و ده ممكن يأثر في تقدمك المهني.
الدراسات النفسية بتقول ان السعادة مرتبطة بكون الانسان عنده علاقات اجتماعية قوية في حياته.. لو افتكرت اللحظات الجميلة في حياتك، هاتكتشف ان معظمها كانت مع ناس أو مع شخص ما شاركك فرحتك أو أسعدك، حتى لو كنت انطوائي.

View more

ايه رايك فى ممارسة الجنس قبل الزواج في اوروبا ؟!

هو نفس رأيي في ممارسته في غير أوروبا !

View more

استاذ شريف بعد اذن حضرتك استفسار بسيط ، أنا في كلية اداب قسم علم نفس وكنت حابة اني اكون دكتورة نفسية "أكلينكي" ومعلوماتي عن خريج اداب انه بيكون فقط اخصائي نفسي وانه المفروض ادرس طب 7 سنين عشان اقدر اكون دكتورة وأفتح عيادة وكدا بصراحة انا تايهة ومش عارفة بعد ما اخلص اداب اعمل ايه؟

الدكتور النفسي بيكون خريج كلية الطب.. انتي هاتتخرجي اخصائية نفسية psychologist مش psychiatrist و ممكن تتخصصي في علم النفس الاكلينيكي لو حابة المجال ده.. يعني هاتتعاملي مع المريض و تعملي له التقييم النفسي و تساعديه بالعلاج المعرفي السلوكي مثلا, من غير ماتدي له أدوية لأن دي شغلة الدكتور.. ممكن لما تتخرجي تشتغلي في مستشفى نفسي أو مع دكتور في عيادة. لكن ماعنديش فكرة ينفع تفتحي مكتب استشارات نفسية و لا لأ.. مش عارف النظام في مصر ماشي ازاي بس في امريكا مثلا ممكن محلل نفسي أو معالج بالجيشتالت يفتح مكتب استشارات نفسية بس مايكتبش أدوية طبعا
تحياتي,

View more

هو فعلا قانون الجذب ..ان كلما زاد احتياجى لشئ معين بتزيد احتماليه عدم حصولى على الشئ دا ..و العكس ؟ وليه بقى لانى مش قادره اقتنع ؟

مفيش حاجة اسمها كده.. كل ما هنالك ان التخيل الايجابي و البروفة العقلية MENTAL SIMULATION بيزيدوا من ثقة الانسان و قدرته على انجاز المهام المطلوبة.. و ده ذكرته ببعض التفصيل في كتابي (أن تكون نفسك) و شرحت التجارب النفسية لشيلي تيلور في الموضوع.

View more

بالنسبة للكاركتير اكيد انت متااابع الي بيرسمه مصطفي حسيـن ... احب اعرف رايــك ؟

مش متابع قوي لكن مختلف مع بعض الرسوم اللي شفتها.. لكن رأيي إنه فنان تشكيلي كبير و رسام كاريكاتير يومي من قبل ما أنا أتولد أساسا.. فمش عايز أمحي تاريخه الطويل لمجرد انه بيعمل كده دلوقتي.. نفس رأيي في وديع الصافي لما أعلن بعض أفكاره السياسية التي أختلف معها، ده لا يلغي عندي تاريخه الفني المهم.. ممكن أقول: مش عاجبني بعض أعماله و افكاره مؤخرا، لكن مش هوّ نفسه كظاهرة فنية.. تامر حسني صوته حلو رغم اني مختلف معاه.. عمرو مصطفى ملحن حلو رغم افكاره.. مختلف مع الاخوان لكن باقرا لسيد سابق و القرضاوي و طارق السويدان.. عارف ان رأيي قد يكون صادم للبعض لكنه رأيي على كل حال

View more

عايز كتاب عن لغة الجسد يكون أسلوبه سهل

المرجع الأكيد في لغة الجسد- الان و باربرا بيز
لغة الجسد و التأثير- خالد المسيهيج

View more

ما هي نظرتك لهذا العالم 🔭..!

سؤال عميق. في الحقيقة أصبحت الإجابة مركبة. حاليا أستخدم عدة مواقف ابستمولوجية في نفس الوقت، حسب الموضوع الذي أتعامل معه. فهناك معايير ذاتية تحكم نظرتي لبعض الموضوعات، و معايير موضوعية صارمة تحكم نظرتي لموضوعات أخرى، و أحاول ألا أخلط بين الاثنين كما يفعل معظم الناس. فمثلا، موقفي الابستمولوجي -حاليا- تجاه بعض الموضوعات العلمية التي أدرسها أو أكتب عنها، هي "ما بعد الوضعية postpositivism" أي أنني أعتقد أن الإنسان يمكنه أن يمتلك الأدوات التي تؤهله ليقترب من فهم "الحقيقة المجردة" لكن في النهاية لابد للباب أن يكون مواربا و ألا يكون اليقين مطلقا في الاستنتاج، لأن أدوات البحث تتطور و يمكن فهم الحقيقة بشكل أفضل مستقبلا، فعلى الانسان -في المجال العلمي الأكاديمي- ألا يكون دوجمائيا و أن يتقبل دوما أن تتغير نظرتنا للحقيقة حين تظهر أدلة جديدة. و أحيانا أميل في التعامل مع بعض الموضوعات للنسبية relativism. على المستوى الشخصي تتنوع نظرتي للمسائل فأحيانا تكون الحقيقة ذاتية غير موضوعية مرتبطة بالحدس و المشاعر -كالعلاقات الشخصية مثلا- و أحيانا أتعامل من منطلق أن بعض الحقائق تتبلور بفلسفة ال social deconstructionism اي ان الحقيقة احيانا ما تكون "ما اتفق عليه الناس انه حقيقة" حتي و لو كان خطأ بشكل موضوعي. و هذه النظرة يمكن تبنيها لفهم التغيرات و الصراعات السياسية التي تمر بها المنطقة العربية، يجب فهم "الحقيقة" كما تراها القطعان البشرية المختلفة حتى و إن كانت باطلة موضوعيا، لمحاولة فهم ما يحدث. انفر و أحاول تجنب الدوجمائية التي اعتبرها ملاذ ضعاف العقول، و أتمنى أن أكون قد نجحت في ذلك في معظم جوانب تفكيري.

View more

Next
  • 98
    Posts
  • 698
    Likes

About Sherif Arafa:

Cartoonist & Self-development author