Ask @AbdallahMKamal:

كلمه توصفك

مش شايف الأمر هيكون مُختزَل شوية لو حصرته في كلمة؟ :D

View more

رواية حلوة ؟

الحرافيش - نجيب محفوظ
الجريمة والعقاب - دستويفسكي
الخلود - كونديرا
الطنطورية - رضوى عاشور
العمى - جوزيه ساراماجو
1984 - جورج أورويل

View more

هو لو حد اذاك ووجعك جدا والأيام دارت واتحط ف نفس الموقف واسوء وكل اللي عمله اترد بالحرف ... يبقا حاجة وحشة مني لو حسيت أن ده عدل ربنا ومعرفتش اتعاطف مع الوجع اللي بيحس بيه ؟ ؟ هل كده انا اتحولت لنسخة مشوهة بسبب فعل عمله حد

الموضوع بيختلف جدا باختلاف الشخصيات، يعني أقصد انت بتقول نسخة مشوهة، مشوهة من إيه؟ يعني إيه الطبيعي اللي اتشوهت عنه والطبيعي بتاعك ده زي بتاع غيرك ولا مختلف؟
أكيد العفو والصفح حاجات كويسة بس التعاطف درجة زيادة مظنش إني ممكن أجبر نفسي عليها يوما ما يعني أو أتضايق من نفسي عشان مش حاسسها، بالرغم من إني قلبي رهيف وكدا كدا هاتعاطف غالبا 😂
الفكرة بس إنك تتجاوز بحياتك ومتشغلش تفكيرك بحد وتديه من وقتك أكبر من حجمه خصوصا إنه خلاص مبقاش موجود في الوسط بتاعك يعني، وانساه.
إنما التعاطف والشفقة وما إلى ذلك درب نفسك عليها ومتوجعش دماغك لو مجتش في مرة يعني صباح الفل الناس كدا كدا بتنسى، المهم هو الحالة العامة بتاعتك وهل انت شخص متعاطف مع الناس عموما ولا لأ، متعلقش نفسك بموقف واحد وتحاول تبني عليه أحكام على نفسك.
ده اللي باعمله وده رأيي مش أكتر يعني. :D طبعا ده كله بنتكلم في حد بعيد عنك دلوقتي متعرفش تساعده وكل اللي ممكن تملكه ليه إنك تتعاطف بس.

View more

لو حد عايز يبعتلك رسالة طويلة جدا يعمل إيه

ممكن فيس أو justpaste.it بينفع برضه في الحاجات دي بتكتب وتاخد لينك الكلام وتحطه هنا :D

View more

المهم تكون سعيد

الراحة أهم :D السعادة زي الراحة زي أي شعور بيعدي ومش بيدوم بس القتال على السعادة مؤذي أكتر بكتير من السعي للراحة

View more

إنك فقدت كل ده مع نفسك وسايبه للناس! ليه معلش مين الناس عشان تديهم ده وتفقد ده مع نفسك لدرجة وصفها بالهلهلة! مين الأبقى هي ولا هما وليه أصلًا حصلك كدا! نفس الواحد هي الباقياله والناس مجرد عوابر حتى شخص وحيد تعيس زيي عارف ده! ليه وصلت لكدا؟

مش تقديم لحد على نفسي طبعا أنا أوقات باعتبر نفسي أناني أصلا :D الفكرة إني ببص لكل حاجة وأشوف محتاجة إيه يعني، فعلاقاتي مع الناس أهم شيء فيها هو السير حسب مبادئي اللي هي مصداقية وشفافية .. إلخ، لكن علاقتي مع نفسي فأنا مش محتاج أخنق على نفسي كتير والكثير من المزاولة المداراة لن يضر يعني، أقصد إني مفرغتش طاقتي في علاقاتي مع الناس فمهلهل بيني وبين نفسي لأ أنا بس مجرد بحاول أتعامل مع كل جنب بما يناسبه يعني لأن توحيد الطرق في جبهات مختلفة مش صح :D

View more

أنت دلوقتي واخد بالك كام مصيبة وكارثة قولتها في جملة واحدة ولا مواخدش!!!

لأ فين مش واخد بالي بتتكلم عن إيه بالظبط :'D

View more

يمكن لازم تبتدي تبطل تداري عن نفسك عشان متفقدوش مصداقيتكم سوا؟

مش عارف مبقيتش بدّي كلمة مصداقية حجم كبير في علاقتي مع نفسي :D
أنا شخص مُهلهَل مليش كلمة بيني وبين نفسي بس مخلي البراءة والشفافية والمصداقية لعلاقتي مع الناس :D

View more

انت ليه غامض على طول او مش غامض .. اقصد قافل على نفسك شويه يعنى صحابك ممكن ما يعرفوش انت فين ولا بتعمل ايه الايام دى اهتماماتك ايه مش قصدى تفاصيل حياتك اوى لكن الحد اللى مسموح لاى صديق يعرفه عن صديقه مثلا وفى الكليه مش بشوفك غير مرات قليله ؟

حقيقي مش عارف بالظبط :D هو أنا عندي مشكلة في المحافظة على علاقات الصداقة فعلا مببذلش مجهود لتعميقها، سواء بقصد أو بدون يعني، كنت بقدم راحة البال عن إني يكون ليا صديق دائم أستحمل اختلافاتنا مثلا وهكذا، وده غلط طبعا وحاليا بحاول أدرس إزاي هغير ده في أي ناس هتعرف عليهم بعد كده لأن حاليا كل صداقاتي بردت ومعدش ينفع تتعمق، أو هكذا أظن يعني :D
وبالنسبة للكلية هتشوفني كتير ليه أنا بروح السكاشن بس يعني فليه متوقع تشوفني كتير :D

View more

في حاجات أبسط من فلسفات العالم كلها للأسف زي ما الأطفال بيقرروا يعيطوا بدون سبب منطقي في جزء مننا أظن ما زال بيشعر لمجرد الشعور البيور وليحترق سقراط بسلام إن لم تعجبه بساطتنا 😂

ودي لازم تتواجه بمهارات مزاولة النفس ومشاعرها أنا بقيت أستاذ في مزاولة مشاعري وتجاوزها :'D أي نعم حاليا بقيت باشعر بزحمة المشاعر من كتر ما بداريها عن نفسي بس الموضوع متهون شوية أظن عن لو كنت بركز مع نفسي :D

View more

جايز كنت بحاول أهرب من سؤالك عشان وجعني بصراحته وفشلت 😂

منا أخدت بالي :D هو الموضوع هيفرق كتير لو كان حزن بس أو حزن وقلق، وعموما أنا بدأت أتعود إني أمشّي لحظات ذروة المشاعر بدون أي تدخل وهي بتروح لوحدها فده حل لمن لا حل له يعني :D

View more

يللا تصبح على خير :D

وانت من أهله :D
لازم تقتنع إن هذا الوقت سيمضي :D

View more

الآسك اتعمل عشان نروح لأكونتات الناس نسألهم فإزاي وصلنا إني أنا اللي بيتم سؤالي؟ 😂

وهو فيه حد يدخل على حد يقول له هذا الوقت سيمضي يعني :'D أنا بحاول أفهم شعورك أكتر يعني بس كنوع من المشاركة الوجدانية :'D

View more

وحيد

طيب هو حيث كده فالوقت هيمضي فعلا :D ده مسبب حزن بس ولا قلق كمان إنك هتفضل وحيد؟ ولا التفكير ده مبيجيلكش؟

View more

واحتمال حد عاوز يقولها لنفسه بس مهما يقولها مبيقتنعش فبيحاول عن طريق إنه يقولهالك

وحزين ولا قلقان ولا زهقان؟

View more

هذا الوقت سيمضي

عجيبة قدرة الواحد في إنه يحيّد أي رسايل يقابلها :D يعني أنا دلوقتي بقول احتمال تكون ده سؤال لناس كتير وباتفكر في الجملة دي وإزاي هي أكيد مينفعش تتوجه لي لأني دلوقتي مش فرحان ومش زعلان ولكن قلقان بس فلأ أنا مش عايز الوقت يمضي غير لما أكون عارف أنا هاعمل ايه :D
ويتش إز إنفاليد أرجيومنت يعني لأنها ممكن تكون جملة تشجيعية برضه عادي :D

View more

تمام ..تسلم يا محترم

الله يكرمك وييسر لك

View more

عبدالله ..في كورس طويل شوية ف الزقازيق جرافيك وديزاين .. عاوز أبدأ من الصفر هو هيكلفني شوية محتاج رأيك بقى هيفيد ولا ممكن أتقن الموضوع لوحدي ؟ الكورس ف المجرة

الموضوع ده انت اللي تحدده أقصد شخصيتك لو انت من النوع الكسلان روح عشان تلاقي حاجة تلزمك ولو مبتحبش جو الكورسات خليك ع النت في البيت.
أكيد هتستفيد طبعا لو رحت، أنا لسه باصص عليه مغطي مواضيع كتيرة بالفعل فأكيد هيفيدك، وبرضه تقدر تتقن لوحدك بس هتعوز مجهود وإلزام لنفسك زيادة شوية، والتواجد في الكورسات دي بيفيد برضه من زمايلك وجو الورك شوبس أكتر من اللي بيشرح، ده اللي باسمعه يعني أنا عمري ما جربت لأني كسلان جدا ومبعرفش أقعد مدة طويلة قدام حد أسمع منه فأي حاجة باتعلمها لوحدي :D
فهي شخصيات يعني فلو عايز تريح دماغك روح ولو الفلوس مزنقة تقدر تتعلم الحاجات دي لوحدك بس هتطول عشان مش ملزم وهتتعلم من حتت مختلفة، والكورس ده مغطي حاجات ممكن متحتاجهاش خالص وحاجات ممكن متاخدش منك وقت بعد كده لو احتاجت تعرفها، وفي كلٍّ خير يعني.

View more

ربنا يسعدك ويحفظك

آمين يا رب وإياكم
شكرا جزيلا والله ربنا يكرمك :D

View more

ايه آخر معلومة جديدة عرفتها وحاسس أنها قيمة فعلا ؟

احنا في آخر اليوم فأنا حقيقي مش قادر أفتكر 😂 أول ما أفتكر هعيد الإجابة تاني 😃

View more

أشياء زى ايه مثلا ؟

أغلب الحاجات يعني بقت بتتعمل من غير رغبة قوية فيها يعني مفيش تأثير قوي من حب أو رغبة يشدني لأي حاجة باعملها، أشياء زي كل حاجة تقريبا 😃 أنا متقبل الفترة دي ومتسامح معاها بس هي طولت بس

View more

اكتر حاجة مفتقدها؟

شغفي بالأشياء ممكن 😃

View more

أولا انت مش لوحدك الإجازة دى فعلا ضايعة غ الولا حاجة وده إحساس سخيف جدا والاسخف فكرة أن الدراسة قربت 😣

آه فعلا الواحد ملحقش يحط أي خطط فالدنيا هي اللي بتحركه للأسف، الدراسة السنة الجاية عندي مش خنقة أوي بس برضه الأجازة مؤذية وهي بتجري كدا

View more

ليه حزين وجدا كمان ؟ ؟

حزين كانت بمعنى مبعملش حاجة خايب يعني 😂 فيه جزء حزن آه بس ده مكنش قصدي عليه 😃 معرفتش أظبط نفسي في اول الأجازة فمستسلم بس وبحاول أقوم براحة 😂

View more

مقضي الإجازة ازاى؟

حزين جدا الفترة دي بس بانزل جيم وباقرأ وباقي الأمور نايمة :D

View more

Next