SPACE"

التفكير في احتمالية إن ممكن تكون كل الاختيارات اللي اخترناها دي مش اختياراتنا لكننا وهمنا نفسنا بكده علشان عايزين نصدق كده مرعب جدًا.. اللي مرعب أكتر هو إن الاحتمالية دي صح بنسبة كبيرة..
بحسبة بسيطة مثلًا ممكن تعرف إنك مختارتش دراستك.. الموضوع بس كان معتمد على مدرس الظروف هيأته علشان يحببك في مجال معين وتاني يكرهك في مجال تاني فبالتبعية اختارت انك تدرس اللي انت فاكر انك بتحبه وتستحمل كل عواقب الموضوع ده ومتطلباته..
مراتك دي اما عرفتها عن طريق الدراسة اللي أنت فاكر إنك بتحبها واختارتها أو عن طريق الشغل اللي اترتب على الدراسة اللي أنت فاكر انك بتحبها واختارتها أو عن طريق شوية ظروف جغرافية وتاريخية مالكش يد فيها..
أنت طلبت قهوة مظبوط علشان أنت مجربتش الزيادة أو السادة.. وشربت قهوة أساسًا لأنك مطبق بتذاكر مواد دراسية فاكر إنك بتحبها وإختارت دراستها أو مطبق في شغل اترتب على نفس الدراسة أو قضيت ليلة حلوة مع مراتك اللي فرضتها عليك الدراسة أو الشغل أو الظروف الجغرافية والتاريخية اللي حقيقي مالكش يد فيهم كلهم..
ذوقك السينمائي والموسيقي ده مش معمول ليك لوحدك.. كانوا عارفين إنك طالما أنت وغيرك حبيتوا toy story 1 اللي عدى قدامكم بالصدفة فأكيد هتحب اتنين وتلاتة وآديك مستني أربعة.. هوب بقيت تنقي الصعبانيات.. مزيكا عمر خيرت وقضية عم أحمد.. وأنت فاكره ذوقك وكله تمام..
الموضوع داخل في كل حاجة.. مفيش سبب واضح يخليك تحب اللون ده غير أنه كان سائد في محيط معيشتك وأنت صغير.. مفيش حاجة خليتك تكره الأكلة دي غير إنك مجربتهاش.. أنت بتختار القميص الكاروهات دايمًا علشان عندك زيه في البيت..