Ask @ahmed01012193152:

مساحه !!

EsRaa ♍
تلخيص رمضان القادم
-- أولا الجانب المكرر الممل !
- كالعاده رامز هاهاهاها .. هيجيب صحابه يخضهم ويشتموه ويمسكوه من خدوده ويشتموه ويقولوله بطل شقاوة بقى يا واد يا خلبوص انت بقى كل مرة تعملها فينا كده واحنا مناخدش بالنا برضه ونتفاجئ الله ؟!
- كالعاده مصطفى شعبان .. معشوق النساء .. البطل الحقيقى لحريم السلطان .. أفندينا .. يعنى الراجل اللى معاه فلوس ونسوان وسلاح ومخدرات فـ كل مسلسلاته ومبيقبلش يعمل أدوار تانيه .. ومسلسله الجديد " مولانا العاشق "
- كالعاده يوسف الشريف .. الدراما ... السسبنس .. الإثارة .. التشويق .. الراجل الغامض .. اللى بيجيب فنانين يمثلوا معاه فى المسلسلات عشان يقتلهم كلهم .. يعنى الدماغ .. ومسلسله الجديد " لعبه ابليس " .. اوبا بقى !
- كالعاده .. فيفى عبده وسميه الخشاب .. ومسلسل جديد يشرشحوا لبعض فيه برضه .. ويورولنا الجانب القذر من الستات .. باسثناء فيفى هتوريلنا جوانب كتير مدلدله من أماكن مختلفه فيها . ومسلسل " يا أنا يا إنتى " !
-- ثانيا الجانب القذر
- غاده عبد الرازق .. ميلفايه مصر الأولى .. السيده الأولى فـ مصر .. المنافسه الأولى لمدام ناديه الجندى .. الست اللى الرجاله كلها رافعين جلابيتهم عليها فـ كل أدوارها ومسلسل " الكابوس " !
- علا غانم .. المثال الحى لكلمه " Horny " داخل السينما والدرما المصريه .. البنت اللى كل أدوارها بيبقى ليها عشيق حتى لو متجوزة .. هتضرب الكاتات بتاعتها وتلبس الـ push up .. ومسلسلها الجديد " مملكه يوسف المغربى " !
* مين يوسف المغربى ؟!
أكيد عشيقها يعنى مش مستاهله أهى !
- هيفاء وهبى .. احدى تعاقدات الرجل الشاخر محمد السبكى .. الست اللى جت السينما المصريه تتبهدل ويغتصبوها فـ90% من أفلامها .. من أول صاحب رجب .. مرورا بعمرو سعد وصحابه .. لحد العيال الصغيره .. ومسلسل تقريبا هيبقى كله فرهضه " مولد وصاحبه غايب "
*تحيل هيفا وفـ مولد وصاحبه غايب .. تخيل بقى اللى ممكن يحصل !!
-- ثالثا الجانب المضحك بقى
- هانى رمزى .. هيعمل سواق طياره واحنا نضحك هاهاهاهاها !
- مى كساب .. عملت تامر وشوقيه وفشل .. قالت العيب فى أحمد الفيشاوى .. وجابت " إدوارد " وهيضحكونا فى مسلسل " لما تامر ساب شوقيه " !!
- داليا البحيرى .. استكمالا للنجاح الباهر لمسلسلات الزوجات المضحكه .. داليا قررت تكتشف الجانب المضحك منها وقالت هند صبرى مش أحسن منى .. وقررت تعمل " يوميات زوجه مفروسه أوى " !!
-- طلعت زكريا .. هيضحكنا بإفيهاته المبتكره .. واستكمالا للدور الوحيد اللى نجح فيه " حاحا " .. فعمل مسلسل " عائله حاحا " !
*يخى حاحا عليكم وربنا !

View more

- بصي أنا هعمل فكرة جديدة وأقدسها
- وأنا بصفتي فكرة هعمل شخص وأقدسه
- تقدسيني؟
- لأ.. أنا بدوّر على حد بيعرف ينتمي يا مدحت.. حد بيعرف ينحاز ويؤمن ويدافع.. عايزاه مجنون.. أيوة مجنون.. أقوله يلا موت في سبيلي يموت.. أنت مش كده للأسف فشوفلك فكرة تانية..
- بس أنا كنت مؤمن بيكي أربع سنين.. مشفتيش معايا يوم وحش.. فاكرة لما دافعت عنك في برنامج وائل الابراشي؟ فاكرة لما قالولي تاخد مليون جنيه وأغيرك وأنا رفضت؟
- علشان غبي.. العصر ده عصر الفلوس.. ايمانك بيا أصلًا بالفلوس.. أنا مش نزيهة يالا زي ما أنت فاكر أنا بس مصيدة.. مصيدة اتعملت للمعدمين اللي معندهمش حاجة.. أنا ثروة فاقدي الثروة.. كان ممكن تؤمن بيا وأنت معاك مليون جنيه وكنت هتبان مؤمن أكتر من اللي معاه مليون الا ميتين ألف..
- وأبيعك؟
- يا عم أنا واطية..
- أمال إيه الكلام اللي قريته عنك في الكتاب ده؟
- كلام.. مجرد كلام..
- ده أنا كنت ناوي أقدس الكاتب
- أنا جاية من عنده وبقولك ميستاهلش..
- يعني أقدس مين دلوقت؟
- نفسك.. لو هتقدس قدس نفسك..
- فكرة حلوة دي..
- تقدسها؟
- ماشي
- ولا تاخد أختها الكبيرة؟ اللي هى متقدسش حاجة..
- لأ هاخد الصغيرة وأربيها على إيدي..
- فل

View more

::-::

لو فيه حاجة بتمنى أفضل محافظ عليها في الرحلة اللي معرفش هتمشي إزاي دي هى إيماني بإن المجهول هيفضل مجهول..
إحنا كلنا عايشين على أمل وبدافع إننا منعرفش إيه اللي هيحصل بعدين.. المجهول وحش ومخيف بس فكرة إنه «مجهول» بتطرح بشكل ضمني إحتمالية إنه ممكن يكون حلو، حتى لو الإحتمالية دي قليلة وضعيفة لكنها موجودة.. اللي حياته سيئة بشوية منطق وتفكير هيعرف إن ممكن اللي جاي يكون أحسن.. حتى لو كل المقدمات والمتفاعلات دلوقت بتقول عكس كده، لكن بردو ليه لأ؟ ليه متحصلش صدفة عجيبة تغير كل ده؟ ليه ميجيش حدث صغير يغير مجرى الفيلم كله؟ مفيش حاجة تمنع!
الواقع والحياة بيدوروا بعبث جدًا.. عبث قابل لأي إحتمالية وأي تأويل.. علشان كده أنا بشوف إن اللي بيقرر ينتحر ده حد مفكرش كويس.. أو بالأحرى حد غبي.. حد قرر يختزل كل الاحتمالات والتأويلات اللي ممكن تحصل في حياته في مشكلة ولا عقبة ولا مرض ولا غيره.. قرر يسيب كل الإحتمالات اللي في الحياة ويروح لاحتمال واحد بس! والسبب الرئيسي في كده هو إنه فقد الإيمان بإن المجهول «مجهول» وتوقع وصدق إن اللي موجود دلوقت هو اللي هيدوم، وحسب معادلته وفق ظروفه الآنية واللحظية وطلع النتايج، وتجاهل إن المعادلة كلها ممكن ظروفها تتغير لو بس درجة الحرارة اتغيرت!
يارب أفضل مصدق.

View more

....

ahmed alsawi "Lucifer"
= تشارلى تشارلى Are you here ؟! .. تشارلى تشارلى can we play ؟! - مساء الخير ! = مش وقته يا عم ! - حضرتك بتعمل ايه ! = بحضر العفريت تشارلى ابن الجزمه ده .. مش عاوز يهز القلم الرصاص ! - يعنى انت بتحضر عفريت بقلم رصاص .. وكمان عاوز لما تحضره يلعب معاك .. هو وحيد إبن أختك بدين أمك ؟!! = انت اللى مين وبتعمل ايه هنا ! - أنا وائل .. وقاعد .. وإنت ؟! = أنا درويش .. وماشي ! - ماشي بنور الله ! = واللى معاه ربه ؟! - عمره فى يوم ما تاه ! = ونعم بالله ! - طيب يا درويش مبدئيا إنت فى مصر .. العفريت اللى عايش هنا وانت هتحضره بقلم رصاص ده هيبقى اسمه تشارلى ؟! = اومال ايه ؟! - هيبقى اسمه وائل عادى ! = وحضرتك اسمك ايه ! - وائل ! = قولى بقى انك العفريت وظيط ! - أيوة أنا العفريت ! = لأ طبعا ! - اشمعنى ! = لو العفريت كنت هزيت القلم الرصاص ! - يا ابنى بطل تفاهه .. أنا العفريت بجد ! = قول والله ! - هتحرق ! = طب قولى كلمه السر ! - يا هاجرنى ! = طالب مواعيدك ! - يا هاجرنى ! = وأنا روحى فى ايدك ! - يا هاجرنى ! = ياللى مودعنى ! - يا هاجرنى ! = قلبى بيوجعنى ! - لا ألف سلامه عليك ! = الله يسلمك .. طيب مش هتعمل حركات عفاريتى كده وتاخدنى وتطير بيا ونختفى ونطلع دخان أحمر وكده ؟! - لا طبعا هنعمل كل ده .. مستعد ؟! = فشخ ! - طيب إقلع هدومك عشان الجو حر فوق ! = تمام وبعدين ! - لف بقى وحط ايدك عـ ودنك عشان الصوت ! = تمام وبعدين ! * بضربه علي قفاه ويختفي * #متهزروش_مع_العفاريت_ياخوانا !! _

View more

لـما يجول بخاطرك __🌻💛

نْـونّ
أنا نسيت الطريق.. كنت فاكره دايمًا.. عارف أنا رايح فين وجاي منين.. كنت بشوف الخطر من على بعد أميال.. وكنت بستخلص ريحة أي فخ من غير ما أعرف يعني إيه فخ.. كنت بحسبها من غير حسابات وبخطي الخطوة وأنا ناسي قبلها كان فيه إيه أو فاكر هتوديني لفين.. عمري ما خططت حاجة.. أنا بحب أسيبها للبحر..
بخاف من فوق.. الحقيقة ان كلنا بنخاف من فوق.. وبردو معرفش ليه.. جينا لقينا كتاب في المحار الاسود المتحجر اللي ماشي دايمًا معانا.. الكتاب بيقول ان فوق وحش.. فوق مخيف.. فوق مفيش بعده تحت تاني.. فوق مش بس احنا بعده هننسى.. احنا كمان هنموت.. والأسطورة بتقول ان الطعم دايمًا أكلة حلوة.. ريحة مش هنقدر نقاومها.. حاجة من الجنة.. حاجة مشفنهاش قبل كده.. سمكة من نوع تاني أو من نوعنا بس حلوة.. الطعم هو أي حاجة حلوة..
اختارنا نبعد عن كل الحاجات الحلوة.. بنشوفها نفتكر صحابنا اللي مش فاكرين أساميهم وأهالينا اللي منعرفهمش.. بنفتكر أي حد راح ورا حاجة علشان حلوة ومرجعش..
النهارده أنا شفت حاجة حلوة.. كان نفسي أجري عليها، بس افتكرت الأسطورة.. لأ.. صحيح.. أنا.. أنا مبفتكرش.. أنا ناسي دايمًا.. عارف ان دي الحرية المطلقة.. الحرية مش اني أسيب نفسي للبحر.. الحرية إني أنسى إني في بحر.. أو أنا مين.. وعايز إيه.. وبدافع عن إيه.. وثوابتي دي ليه.. وتفضيلاتي.. وآرائي.. وحبي لفتافيت العيش بريحة التوم.. أو حتى رغبتي في دفا ساعة الشمس ما بتكون حاضرة.. الحرية هي إني أنسى.. أنسى ده كله..
الحاجة الحلوة بتندهلي.. أنا نسيت الأسطورة.. جريت عليها بس لقيتني مش بجري وفيه حاجة مسكاني وموقفة حركتي.. كنت ثابت مكاني.. يأست بس لقيتها هي اللي بتتحرك ناحيتي.. معرفش ليه، ونسيت أسأل..
أنا عرفت.. أنا طعم.. أنا هتاكل بالحاجة الحلوة.. أنا هبقى أسطورة جديدة.. بس هينسوني.. دول شوية سمك.

View more

~🧡🍁

يمكن الوقعات اللي وقعتها مؤخرًا تكون وقعات تافهة لو حد تاني هو اللي وقعها.. ويمكن التجارب المعقدة اللي دخلت فيها مؤخرًا متكونش مُعقدة ولا حاجة وتكون بسيطة بالنسبة لواحد بيبص من قدام أو سبقني في الرحلة شوية..
بس اللي متأكد منه إن اللي مريت بيه الفترة الأخيرة وما زلت بعاني تبعاته كان صعب عليّا أنا.. بمقاييسي وشخصيتي اللي بعتبرها محدودة التجارب والخبرة.. واللي متأكد منه كمان إني بقوم.. زي ما حصل كتير قبل كده.. الحياة كده.. علشان نحس بطعم القومة لازم نقع وعلشان نستمتع بالقومة لازم الوقعة تكون جامدة.. جامدة بالنسبة لك..
أنا بقوم كل مرة وأنا شايف حاجة جديدة.. زاوية مكنتش مكتشفها قبل كده أقدر أبص منها للحياة.. شغف بحاجة جديدة.. وجهة نظر جديدة.. هدم وجهة نظر قديمة حتى.. المهم إني مبكونش الشخص اللي كنت عليه قبل الوقعة، وفي الغالب الشخص ده بيكون أحسن، أو خلينا نقول أنشف..
علشان كده لما ده بيحصل بقدر أحس بطعم حاجات أنا مكنتش واخد بالي منها.. حاجات كانت مستخبية ومستنياني أكتشفها.. ومهما كانت الحاجات دي تافهة وبديهيّة وصغيرة فأنا بعرف أنبسط بيها كويس.. يمكن بعوض الضربة للحياة! معرفش.. بس اللي أعرفه إني بعد كل وقعة بقوم وأنا جعان انبساط فبعرف أقبل أي حاجة وبعرف أستفيد منها أقصى استفادة ممكنة.. بالظبط زي ما روبن ويليامز قال في الفيلم..
"You will have bad times, but they will always wake you up to the stuff you weren't paying attention to"
خضم الأحداث وتعقيد الحبكة بينسيني ده كله.. ده طبيعي.. بنسى كتير إني هقوم، وبصدق الوقعة وبآمن بيها.. رغم كل التجارب السابقة.. بس بردو بنسى، ومتهيألي لغاية ما أموت أنا هفضل أحاول منساش إني بعرف أقوم وبردو هنسى.. لكن اللي ممكن أقدر عليه هو إني أتبسط في الوقت اللي مش ناسي فيه.. أتبسط بأي حاجة قدامي ومتاحة علشان أنا هنا للسبب ده.. وأعتقد كلنا..
أتمنى منساش إني هنا علشان أتبسط، حتى لو نسيت إني بعرف أقوم بعد كل وقعة.. وحتى لو نسيت أنا بقوم إزاي..
مش عارف بعدين هفضل مقتنع بالكلام ده ولا هغيّره والشخص اللي كتبه طريقة تفكيره هتختلف ولا لأ.. بس آديني وثقته علشان أبقى أعرف.

View more

نظرتك للصداقة الإلكترونية 🙇🏻؟

مبحبش تكوين العلاقات الإنسانية يكون عامل زي شرب الميه كده.. وهو بقى كده للأسف.. الثورة التكنولوچية عملت عملية بَلَستَكة لحاجات كتير.. منها العلاقات اللي بقت هي كمان بلاستيك..
أنا قديم.. مبعرفش أسمي حد صاحبي بصورتين جمعونا ونزلناهم على انستجرام، أو بشوية كومنتات وشاتات متبادلة.. مبعرفش أعتبر حد زميلي علشان اشتغلت معاه يومين.. مبعرفش أعتبر حد موجود في دايرة معارفي لمجرد اننا اتكلمنا مرتين ولا تلاتة..
الموضوع بالنسبة لي عامل زي الـ levels كده اللي لازم نعديها سوا.. كل ليفيل يُستحسن يطوّل وياخد وقته ونتهرس فيه شوية.. ندخل دايرة أوسع فأضيق فأضيق فأضيق ونعدي على كل الفلاتر اللي بعدها نقدر نسمي وجودنا في حياة بعض الاسم اللي عايزينه يكون، أو حتى منسميش.. المهم إننا نبعد عن فلاتر الانستجرام اللي بعدها هتبقى أخويا اللي مجابتوش أمي دي..

View more

وحشتني 💔

انا عارف انه جماعي يا انون بس هجاوبك
‏لما بسأل نفسي سؤال هوا انا قصرت؟ بلاقي ان انا من الناس الي عدت حاجات كتير ومواقف كان لازم آخد فيها موقف عديت علشان المركب تمشي مكنتش من الناس الي بتتلكك عشان تبعد كنت بحاول دايماً ابقي موجود حتي لو علي حساب نفسي علشان كده انا مقصرتش خالص بالعكس انا اتقصر ف حقي ..."

View more

لو كلنا نخلقنا بنفس الصفات ما كان الرسول حكا جئت لأكمل مكارم الأخلاق.. يعني انا اللي عم احكيك اعتبر كمان متلي متل باقي الناس بنفس صفاتن .. معلش لو انت شايف انك متلك متل هالناس وانو صفاتك متلن فهاد شي بيعنيك الك ما بيعني الناس اللي مناح اللي مالا ذنب ينحكى عليها الحكي اللي انت بتقولو :)

انا مقلتش حاجه وحشه عن الناس اصلا انا بتكلم عن نفسي بس كل واحد من الناس حر فحياته

View more

Space ..

m a r w a
بعدما عاش الإنسان ألاف الأعوام لا يعرف ماهية الشئ الذي يخفق في صدره ولا يجد له اسمًا.. انتبه إلى أنه من الممكن تسمية الأشياء، فاخترع اختراع ما أسماه الطب، وعليه وجد الإنسان اسمًا ووصفًا لذلك الشئ الغامض الذي يتخذ من صدره مستقرًّا له وأسماه القلب.. لم يعد الأمر غامضًا بعد ذلك اليوم.. وصار كل شئ واضحًا.. القلب مسؤول عن ضخ الدماء في بقية أعضاء الجسم وبتوقفه سينتهي كل شئ.
تحيلني قصة اكتشاف الإنسان لقلبه إلى فكرة اكتشاف الواحد منَّا للآخرين بشكلٍ عام..
فعند قدوم أحدهم ودخوله دوائر حيواتنا، يصبح كل ما نجتهد في إتمامه هو اكتشاف ذلك الشخص وتبديد ذلك الغموض الذي يحيطه، وتكوين صورة واضحة عنه لا تتأثر بحجم الـ Zoom In.. لا تتأثر مهما اقتربنا.. صورة لا تتغير ملامحها مهما تباينت المسافات الفاصلة بينها وبيننا.. صورة كليَّة تفصيليَّة تصلح لأن تكون مرجعًا وكتالوجًا عن صاحبها صالحين لمختلف الأزمان والعهود.. وعند هذه النقطة تحديدًا ربما نستطيع التسمية والترتيب ومعرفة إلى أي مكان ينبغي أن تنتمي الصورة وصاحبها.. ربما نستطيع فهم الكيفية التي ستسير بها الأمور معه.. فلا يعد يدهشنا وجوده، حتى لو كان قابعًا داخل صدرونا ومتسببًا في ضوضاء تعكر صفونا تمامًا كضوضاء القلب.

View more

مساحة لعقلك🌸🖋

وجود حد في العالم ده حزين أو مكتئب أو عنده مشاكل أو غيره من الحاجات الوحشة دي، بطريقةٍ ما بيمُثل وصمة عار على جبين كل واحد عايش في العالم ده.. والحكم ده مش حاد ولا سبهللي.. لأ ده حقيقي جدًا..
بالتجربة والقياس نقدر نقول إن هنا فيه كل حاجة وعكسها، وده اللي ممشينا لغاية دلوقت بشكل متوازن وعاقل حتى لو بدى غير كده أحيانًا.. الكون نفسه كله كده قايم على باللانس عجيب، والتأمل فيه للحظات هيصيبنا بالدهشة.. ولو نزلنا بالمنظور شوية وبصينا على الحاجات اللي حوالينا هنلاقي نفس الباللانس موجود على حاجات أصغر فأصغر.. فيه الخير وفيه الشر مثلًا.. فيه الراجل وفيه الست.. فيه الأوقات الحلوة والأوقات الوحشة.. باختصار قصاد كل حاجة حاجة بتحقق التوازن علشان الاتنين يكونوا موجودين.. ده كلام ثابت خلاص..
وبنفس المنهج أنا بعتبر إن مفيش مساعدة مش موجودة ولا فيه حلول مش معروفة.. وجود حد محتاج لمساعدة ما في هذا العالم معناه إن فيه حد عنده المساعدة دي ويقدر يقدمها ومعملش كده.. وجود كذا حد بيعانوا من مشكلة ما معناه إن فيه كذا حد في ايديهم يحلوا مشاكل الناس دي ومعملوش كده.. وجود مجموعة كبيرة من الناس بتعاني من اكتئاب معناه إن فيه مجموعة كبيرة من الناس تعرف تفرح الناس دي ومعملوش كده..
وعليه فأول جملة في كلامي غلط.. وجود ناس حزينة ومحتاجة لمساعدات وخلافه مش وصمة عار على جبينا ولا حاجة.. وصمة العار الحقيقية بتتمثل في اللي بيطرحه وجود الناس دي بشكل ضمني.. وهو إن فيه بيننا شوية بشر قرروا ميساعدوش وميهتموش وعاشوا لنفسهم.. وجود دول بيننا هو اللطّة الحقيقية اللي مش هنعرف نتخلص منها.

View more

ضع شيئا لطيفا ...🌼

Hend
متهيألي المشكلة الحقيقية في التعقد.. التعقد مش التعقيد لأن خلاص الموضوع خرج عن ادارة الانسان وتحكمه في مجريات الأمور والدنيا مبقيتش Manual زي زمان، وبقت تخضع لشوية مصفوفات محدش عارف مين حطها وحطها امتى وماشية مع نفسها.. بتزيد تعقيد مع نفسها.. بتزيد صعوبة مع نفسها.. بتزيد بواخة مع نفسها..
زمان كان ممكن تهرب منهم برفع سماعة التليفون علشان يديهم مشغول.. الدنيا بقت سهلة شوية واخترعنا التليفون أبو شاشة وعرفنا مين اللي بيتصل علشان نعرف نرد ولا لأ.. شوية وبقى لازم تقفل التليفون أبو نغمات مجسمة وكان فيه كمان أوبشن لذيذ اسمه «أصله كان معمول صامت» أو لو أنت مش فارقة معاك ممكن تكلسن - تكلسن مش تكنسل - ..الدنيا كبرت وبقى لازم تقفل التليفون الصيني وتعمل Deactivate للفيسبوك.. وبعدين بقى لازم للفيسبوك وللماسنجر.. انستجرام.. واتس آب..
ألبوم عمرو دياب كان على شريط لونه باهت والكلام ممسوح من عليه بيتحط في كاسيت بسماعة بقى بسماعتين وبعدين سماعتين كبار وبعدين ووكمان.. الكاسيت بقى DVD ولازم الاسطوانة متكونش باهتة علشان تشتغل عليه.. هوب الألبوم بقى على النت.. أماكن معينة ع النت.. هوب شركات معينة بس اللي من حقها توزعه..
معاك فلوس اشتري.. معاك فلوس كتير تعالى أنت نفسك اكتب أغنية لعمرو دياب.. معاك فلوس كتير ورز وبترول تعالى اكتب 3 أغاني..
الحاجات عمالة بتفقد طعمها الحقيقي علشان بقى لازم تتاخد على طبق معين وتتاكل بمعلقة معينة وبطريقة معينة.. والمرعب إن الموضوع بيزيد تعقد من غير أي تدخل خارجي.. كل حاجة بقى لازمها كتالوج علشان تتعمل ومفيش شنطة هتشيل كل الكتالوجات دي!

View more

_-'-_

الذكاء الاصطناعي !!!
من ضمن الحجات اللي وصلت ليها التكنولوجيا وتعبر حاجه تافهه بالنسبه للي بيفكرو يعملوه لسه او يوصلو ليه
هتكلم معاكوا عن او موقع وممكن تستخدموه فايه
الموقع هو [www.eter9.com] ، ومع ان الموقع لسة في مرحلة التجربة الا انه خلاص هيكتمل فالايام القليله الي جايه
الموقع ده بيعمل ايه؟
الموقع قايم على الذكاء الإصطناعى، بتعمل حساب عليه ، و الذكاء الإصطناعى بيعمل إستنساخ رقمى منك نظيرك الرقمى بيراقب نشاطاتك على مواقع التواصل الإجتماعى ، و مع الوقت نظيرك ده بيتعلم إزاى يكون نسخة طبق الأصل منك،
بيعرف البوستات إللى بتهتم إنك تنشرها ، و إللى بتهتم إنك تقراها ، و إيه هى إهتماماتك العامة ، و إيه البوستات اللى بتحب تشيرها او تعمل لها لايك، و الاهم طريقة ردودك على الكومنتات عندك أو على أى بوست عام وكل ده من غير ما يطلب منك إدخال أى حاجة من البيانات دى،
طب ليه بيعمل كدة ؟
الهدف إن الموقع بيتيح لمستخدميه حياة مستمرة بعد غيابهم أو موتهم، وقتها نظيرك الرقمى هيفضل ينشر بوستات شبيهة لبوستاتك، و هيعمل لايك على نفس نوعية البوستات إللى كانت بتعجبك، و هيرد على التعليقات عندك بنفس أسلوبك، و هيقوم بنفس نشاطاتك على السوشيال ميديا كأنك موجود بالظبط، يعني لو انت مت مثلا الناس اللي عندك عالاكونت مش هيعرفو انك مت ولا هيحسو بدا

View more

Next