Ask @ahmedelhalawy:

..... ✍️ ✨

رفعت البنت وشها من الكتاب فجأة وبصت له فقال لها: صباح الخير.
ضحكت وقالت له: إنت جديد هنا، مش كده؟
استغرب وقال : أيوه عرفتي إزاي؟
= عشان إحنا هنا ماعندناش صبح ولا ليل، كل واحد قاعد في الجو اللي متخيله، أنا مثلا دلوقتي قاعدة بالليل والقمر هلال وفيه نسمة هوا خفيفة، حلوة ريحة الريحان بالمناسبة.
- انبسط أكتر واكتشف إن فيه حاجات كتير حلوة هنا.
= إحنا بنقول "خيالك سعيد"، فأنا أرد عليك وأقول لك "وانت كمان". قول لي بقى، إنت جيت منين؟
- من عند شجرة العنب، واسمي.. = مش مهم اسمك، ماحدش هنا له اسم، كل واحد بيسمي التاني حسب ما هو شايفه. إنت اسمك عناب.
ضحك اوي وقال : إشمعنى؟ = عشان أسمر ودمك خفيف. قول لي يا عناب، أنا اسمي إيه؟
قال لها: امممم اسمك هوا. = ليه؟ - عشان خفيفة قوي وبتخلي الواحد يضحك وانتي بتتمرجحي ..إنتى جيتي هنا ليه؟
قالت له: عشان برّا مابقاش فيه خيال، شالوا الشجر اللي حوالين بيتنا وزرعوا نخل غريب، أبيض وطويل كأنه مقالة دمها تقيل، وماينفعش يتعمل مرجيحة. و الميس اديتني كمان في المدرسة علامة حمرا عشان كتبت عن البلوزة بتاعتها في موضوع التعبير. قالت لي إيه علاقة البلوزة بتاعتي بالربيع.
ضحك عناب اوي وهي بتقلد الميس بتاعتها،
- قلتيلها إيه؟ = لا اتخيل إنت، المفروض على فكرة مايبقاش فيه كلام بيننا، إحنا بنقدر نتخيل من نظرة العين أو طيران الشعر مع الهوا، بس أنا بتكلم معاك عشان إنت جديد.
#خيالك_سعيد

View more

Next