خلى بالك لا و إنت بتحاول تبقى خفيف ، متبقاش موجود من الأساس .. و إنت بتسمع عشان تساعد إللى بتحبهم ، ماتحكيش إنت .. و ماتاخدش نصيبك من الإهتمام ! و إنت بتتجنب الخلافات ، مايعرفوش إيه إللى بيضايقك فعلاً و يحاولوا مايعملهوش .. و ماتاخدش نصيبك من التقدير ! و إنت بتدعمهم فى مراحل حياتهم الجديدة و ظروفهم الصعبة ، ماتاخدش الدعم إللى تستحقه .. خلى بالك لا تكون إنت فى حياتهم ، لكنهم مش فى حياتك .. عاتب ، إغضب ، إعترض ، خليك طبيعى ! مش عشان تكون مُريح دايماً ، تنسى نفسك .. إرسم حدودك الخاصة عند إللى فى حياتك .. عشان تكون دايماً موجود ، عشان تكون إنت !
محاولتك للنسيان ، ده دليل إنك لسة فاكر .. و لازم تقبل إن إللى بيحصلك ، عقلك بيخزنه و مش بيروح ! لكن إللى بيروح هو تأثير الذكرايات ، إنك تشوف حد أو مكان و مفيش حاجة تتحرك من جواك .. الموضوع بيحتاج شوية وقت بس ، على ما مخك يحولها لذكريات مجردة من المشاعر .. تبقى فاكر الأحداث من غير أى تأثير ، فاكر الناس و الأماكن دى كانت بالنسبالك إيه فى وقت من الأوقات ! بيحتاج تبعد نفسك عن أى حاجة تأخر عقلك من إنه ينفصل عن مشاعرك .. صور ، كلام قديم ، رسايل ، أى حاجة ترجعك لنقطة الصفر ! ماتستناش إنك تنسى ، عشان مش هتعرف .. بس صدقنى ، هيجى وقت و ذكرياتك هتفقد أى تأثير ، هتبقى مجرد ذكريات !