السلام عليكم لماذا ندعوا النصارى بالنصارى وليس بالمسيحيين ؟

وعليكم السلام ورحمة الله وبركاته
أنا بستخدم المصطلحين من غير حرج
ساعات بقول عليهم "نصارى" ودينهم "النصرانية"
وساعات بقول عليهم "مسيحيين" ودينهم "المسيحية"
بالنسبة لي:
مرادف "نصارى" هي "مسيحيين"
ومرادف "نصرانية" هي "المسيحية"
في بعض الناس بتعترض على استخدام كلمة "مسيحي" معاهم لسببين
الأول: بيعتقد إنك لما تقول عنه إنه "مسيحي" ده إعطاء شرف له لا يستحقه
الثاني: بيعتقد إن تسميتهم من ناحية شرعية هي "نصارى" كما قال الله في القرآن
بالنسبة للسبب الأول
مسيحي معناه ببساطة - وده من ناحية تاريخية
الذي اعترف أن "عيسى" أو "يسوع" هو "المسيح"!
أو ببساطة أكثر: أي شخص من أتباع المسيح عليه السلام
بغض النظر عن عقيدته في المسيح عليه السلام!
لأن أحنا معندناش من ناحية شرعية
إن "المسيحي" هو صاحب العقيدة الصحيحة في المسيح عليه السلام!
وبعدين برضه من ناحية تاريخية
تسمية "مسيحي" لأتباع المسيح عليه السلام كانت شتيمة ليهم!
لأن معظم أتباع المسيح عليه السلام كانوا من الفقراء العوام غير المتعلمين
فكان يتقال مثلا: انت عايزني أبقى "مسيحي"؟!
بمعنى: انت عايزني أبقى من الفقراء العوام غير المتعلمين الغوغاء؟!
بالنسبة للسبب الثاني
تسميتهم بـ "النصارى" مش تسمية شرعية إلهية
يعني مش زي تسميتنا أحنا بـ "المسلمين" مثلا
الله عز وجل يقول في كتابه الكريم:
هو سماكم "المسلمين" من قبل وفي هذا [الحج : 78]
لكن بالنسبة لاسم "النصارى"
فلا يوجد من الوحي ما يدل على أنه من الله
ومن خلال التأمل في الآيات القرآنية
نجد أن ذكر اسم "النصارى" في القرآن
من قبيل ذكر اسم "فرقة" بمسماها المعروف عند العرب
زي ما ربنا ذكر في كتابه الكريم: اليهود والمجوس والصابئة
فهل نستطيع أن نقول إن اسمهم الشرعي "المجوس" مثلا؟! بالطبع لا
الله عز وجل استخدم الأسماء التي كانت معروفة حينذاك عند العرب
وكون إن الطائفة أو الفرقة ديه كان ليها أكثر من اسم, فلا حرج من استخدام الاسمين
الله عز وجل يقول:
ومن الذين قالوا إنا نصارى [المائدة : 14]
فيها إشارة إلى أنهم هم الذين أطلقوا على أنفسهم هذا الاسم
علماء المسلمين قالوا إن أصل اسم "نصارى" يرجع لسبب من اثنين
الأول: قول الله عز وجل: نحن أنصار الله آمنا بالله واشهد بأنا مسلمون [آل عمران : 52]
الثاني: لأنهم أتباع عيسى "الناصري" الذي عاش في مدينة اسمها "الناصرة"
والسبب الثاني مقبول بالفعل عند علماء المسيحيين
فهم يعترفون أن المسيح كان يدعى بـ "الناصري" وأتباعه بـ "الناصريين" أو "النصارى"
لكن الآن, بشكل عام, المسيحي أصبح رافضا لتسميته باسم "نصراني"
لا لشيء إلا عشان القرآن الكريم استخدم اسم "نصارى", وهو بيعاند مع المسلمين وخلاص!
في النهاية بقول إن الحكمة هي الحاكمة في استخدام المسمى المناسب
يعني لو هينفر من استخدام اسم "نصراني" لا حرج إنك تقول له "مسيحي"
لكن لو هو عاند وقال: مفيش حاجة اسمها "نصارى", وإن ده اختراع قرآني مثلا
لا حرج في إنك ترد عليه, وتبين جهله, وتجيبله النصوص الكتابية والتفاسير المسيحية
برضه لو إنت في وسط إسلامي متعود على اسم "نصارى" مفيش داعي تستخدم اسم تاني
تقدر تراجع الملفات التالية
لمُطالعة اقتباسات عن "مسيحي" و "نصارى"
الأديان ستَّة: واحد للرَّحمن وخمسة للشيطان http://wp.me/PmupG-Uv
تاريخ المسيحية والعهد الجديد http://wp.me/smupG-karmooz
هل نصارى أم مسيحيين؟ رداً على القمص بسيط
http://eld3wah.net/html/m03az/nsara.htm
للمزيد من الأسئلة والأجوبة http://wp.me/PmupG-Ew
شكراً على سؤالك, ولا تنسني من صالح دعائك