- شَكلك حَبيتها؟ = مش قَادر أحدد هل أنا حَبيتها فعلاً ولا هل أنا إتخَطفت! - إتخَطفت! إتخطَفت إزاي! = مِش عارف، الموضوع كان عبارة عن لَحظة، فَجأه كُل الحاجات إتبدلت لَحظة لُقاها، كُل الحاجات إتلَونِت، إتكَركِبت وإترتِبت.. - إستني عَندك بَس، هي كَركِبتك ولا رَتبِتك بالظبط عشان مَتوهش مِنك..؟! = طَبعاً رَتبتني، و .. و.. وكَركِبتني..، مِش عارف..ِ مش عارف، انت عارف لما فجأه عينيك تبتدي تَرتاح لحَد، ومتبقاش عايز تشيلها من عليه ولا تَبطل تُبصله بس خايف الناس تِلاحظ، أهو أنا ببقي كدا لما بشوفها، ببقي عايز أتملي من عينيها وأحفظها صَم بس خايف أتفضِح ويبان عليا مع إنه كان باين عليا..! عارف لما تِحس إن فيه صُوت مزيكا بتحبها إشتغلت من بعيد فجأه .. من مكان مُبهم ومش ظاهر ومَنتش عارف تلاقيه.. بيكون كُل اللي هَمك وَقتها إنك تُقف وتدندِن مع المزيكا والأغنية.. أهي هي كانت كدا بالظبط .. ظَهرت فجأه.. كان قَلبي وَقتها بيدندِن الألحان جوايا ليها.. لما ظَهرت قُدامي حَسيت إن صوت كُلثوم خَرج من بعيد فجأه.. حَسيته بينده وبيقولي بصوت عالي : يا اللي مَليت بالحُب حَياتي،، أهدي حَياتي إليك، كان صُوت كَلثوم بيوزِني أثور وأقولها : إن مَر يُوم من غير رؤياك ما يتحسبِش من عُمري، كان قَلبي بيتمني يقول : مَقدرش أصبر يُوم علي بُعده ده الصَبر عايز صَبر لوحده.. - إيه كُل دَه، ده الظاهر قَلبك رَقص وَقتها؟! = وهو اللي يَعدي من علي شَط البَحر قَلبه مَيرقُصش يا صَاحبي؟ - وهو انت عَديت من عَليه!! = أنا عَديت من عَليها، وهي أصعب بَحر، وأشد مُوج، وأدفي حَبة مَية تِلمس صَوابعك وتِبل أخر حِتة من طَرف تُوب رِجليك. - إيه يا أخي ده؟ انت عِشقتها! طَب ما تُقولها.. وتريح قَلبك الولهَان من حُبها وتفرحنا بيك. = أقولها؟! أما أنت طِلعت خايب شَبه قَلبي بصحيح، يا صَاحبي أنا قَلبي معاها دِلوقتي، من وَقتها والنَدل سَابني وراحلها وقَالي أنا مَستنيك هِناك تيجي تُقولها.. مش بقولك مِ الصُبح إني إتخطفت يُوم لُقاها يا جَدع. تَخيل بقي لما المَخطوف يعشق خَاطفه!#ابراهيم_ناصف