Ask @jacehollanda_:

People you may like

SPACE 🖤🥀

"مفيش حد مبيغلطش " من أهم المفاهيم اللي لازم توصل لكل واحد فينا و تكون عنصر أساسي في حواره مع ذاته .. طبعا مش عشان تبقي مبرر لتكرار للغلط إنما عشان تكون ضامن لخروج الانسان من دايرة جلد الذات و تأنيبها بشكل قهري او انتقامي !
فمأساة ، الانسان اللي بيتحصر في غلطاته القديمة ! يفضل يعيد في تفاصيلها و يوبخ نفسه أنه ازاي معلمش كذا مكان كذا ؟! يألف مبررات و تفسيرات مزيفة عشان يمحي الغلط ده عن نفسه ... يكرر المشهد في دماغه فوق المليار مرة متخيل ان يمكن في مرة يلاقي سيناريو يطلع فيه صح ! و الحقيقة إن مش مطلوب منه انه يبقي صح .. إنما المطلوب منه الأكتر من مجرد الإعتراف بالغلطات .. و هو الإمتنان ليها !
فأهم خطوة في التصالح مع الذات هي إن الانسان يكون ممتن لإخفاقاته و إخطاءه .. اه أنا غلطت ، بس شاكر للغلطة دي ! أصل الغلطة دي انا .. الغلطة دي حقيقتي .. حقيقتي اللي طلعت للنور و كشفت لي نفسها تحت الاختبار .. نقلتني لمستوي وعي أعلي .. خليتني أعرف عيب موجود فيا هشتغل عليه .. ساعدتني إني أطمح أبقي حد افضل ميعيدش الحاجة اللي ضايقته دي تاني .. بدل ما كانت تفضل في الضلمة بتكبر جوايا و تطلع في ظرف أصعب او شكل أعنف ..
فتعامل الانسان مع أخطاءه أو ماضيه عموماً مؤشر مهم في نضوجه النفسي .. يا إما يتحبس في دايره الإنكار المفرغة في مقابل وهم التعالي و الأنانيه .. أو يعدي و يتجاوز بالإعتراف و تقدير ضعفاته الانسانية في مقابل.. إدراك صورة ذاتيه أشمل و واقع أعمق.

View more

Next