سؤال للصبايا تعرضتوا للتحرش من قبل؟؟ وشو عملتوا او كيف واجهتو الموقف؟؟
التحرش موجود بكل مكان.. حتى بسوق العمل. مرة زميل عمل قال لي بالصريح المطلق: ليش عيونك هلقد حلوين؟ سبته ومشيت ولا كأنه حكى مع إنه كان في عداد صديق بيننا شغل مشترك وكان يفضي لي في أوقات الفراغ عن حبيبته الي برا البلد ومش عارف يوصل لها. ومرة صاحب شركة رحت قابلته والمفروض أمسك شغل معاه باليوم التالي قضاها حكي ع الماسنجر قبلها بليلة بكلام طالع نازل وقال جملة بالصريح: أنا لما بدي اشي بوصله مهما كلفني الأمر.. مع إنه كان متزوج وكان صاحب مكانة مرموقة وكان على علاقة وثيقة بابن عمي.. أتساءل من أين جاءته الجرأة؟ يعني لو كنت قدمت فيه شكوى أو ع الأقل ورجيت المحادثة لابن عمي والي هو زوج أختي بالوقت نفسه كان عنجد تبهدل. لكن قمت عطلت حسابي الفيسبوك وصرت ألف من شارع ثاني بعيد عن الشركة حتى ما أصادفه ولو من بعيد.. لأن الشركة كانت قريبة من بيتنا. وقطعت عليه كل سبل التواصل حتى بدون ما أحكي لأهلي عن سبب تفويتي لهيك فرصة عمل. لا مين شاف ولا مين دري. باختصار الشباب مندفعين وتفكيرهم محدود كتير لما يتعلق الأمر بالأنثى ما بتقدري تلاحقيهم.
