_🍷_

∆ Âłî Möhämëď ∆
- هي نصيحة ، أو ممكن ماتعبروهاش نصيحة .. إعتبروها خلاصة تجربة .
في مننا ناس كتير مرتبطين أو كانوا مرتبطين في اللي باع و في اللي إتباع ، في اللي ماكملوش عشان سوء تفاهم ، في اللي بيحبوا بعض بس خلاص اقتنعوا إنهم ماينفعوش يبقوا لبعض ، في اللي سابوا بعضهم عشان الدنيا كانت ضد إنهم يتجمعوا ... في الوحيد ، في المكتئب ، في المبسوط ، و في العادي .
كلهم أو عشان أقرب المسافات هقول كلنا إتجمعنا ف إننا عندنا كلام و نفسنا نقوله .. في كلام عايزين نقوله لنفسنا ، و في كلام عايزين نقوله لناس ، و في كلام عايزين نطلعه و خلاص عشان خانقنا ، في فضفضه ، في شخبطه ، في كلام ملوش معني و لا مترتب ؛ اللي هو ملخبط كده ، في حاجات كتير جوانا .. أحيانا بنقدر نطلع الكلام ده لناس معينه و أحيانا ما بنقدرش ف بنطلعه هنا ف بوست ف تويته ف استات ف صوره .. بس بنطلعه و إحنا مستنيين لايك من حد معين أو كومنت أو حد يدخل الشات و يكلمك ف اللي كتبته ، ساعات بتصيب و يحصل كده و ساعات بتخيب و مابيحصلش اللي انت مستنيه ف بتتعب اكتر ... مقدمه طويله و احتمال تكون ممله بس انا عايز اوصل ل ايه ؟ ... "الورق" ايه الورق و ايه حكايته ؟
الورق هو أكتر حاجه هتكتم أسرارك ، الحاجه الوحيده اللي هترمي فيها كل اللي واجعك و خنقتك و هتحس براحه ، هتكتب و انت عارف انك مش هتستني رد او تعليق او لايك من حد ف هتكتب للكتابه بس ف هتلاقي نفسك بترتاح نسبيا مع الوقت ، إكتب غني إضحك عيط ارسم شخبط ، أيا كان اللي جواك طلعه ف الورق .. أختار لون لحالتك و انت مبسوط و اكتب بيه و لون لحالتك و أنت زعلان و لون و انت عادي .. أكتب وجعك اكتب حزنك اكتب فشلك اكتب أنها وحشتك اكتب انك لسه بتحبها اكتب انهم باعوك اكتب اللي فرحك ، إكتب كل حاجه كل حاجه ممكن تيجي علي بالك دلوقتي اكتبها ، لو حالتك النفسيه بتعبر عنها رسمه ارسم ، حاسس انك عايز تشخبط بس ؛ شخبط و عيش .. اعمل اي حاجه تعبر عن اللي جواك ، لو حد مجرب الكلام و السرحان مع البحر هيقول طب ما انا اقول للبحر كالعاده و خلاص .. هقوله براحتك زي ما أنت بس البحر انت هترمي كلام و هترتاح بس ممكن لو حبيت تسترجع الكلام ده ماتعرفش لكن الورق موجود .. بس الشرط الوحيد لكل اللي قولته أن مفيش اي حد غيرك مهما كان يشوف الورق ده مهما كان و أيا كان عشان الكلام اللي ف الورق ده كل اللي ف عقلك و انت مخبيه ف ماينفعش حد غيرك يشوفه و لو في احتمال او شك أن حد غيرك يشوفه ماتكتبش احسن .. و هييجي يوم بعد سنه او اتنين او أيا كانت المده هتلاقي نفسك بتقلب ف ورقك و تفتكر و تقول يااااه و هتضحك ضحكه خفيفه و علي حسب لو الحال اتغير هيبقي ملوش لازمه ساعتها الاحتفاظ بيه ف هتخلص من جزء معين من الورق و أنسب طريقه انك تحرقه .. اكتبوا ، الكتابه حلوه ، هتحسوا براحه مع الوقت ده غير إنها بتنمي مهارة الكتابه عندك و ده هتلاحظه مع الوقت ف تطور اسلوبك و انت بتكتب .. بعتذر للبنات اكتشفت دلوقتي اني كتبت كل كلامي بصيغة المذكر ف سامحوني و الكلام طبعا عام للكل .
اكتبوا .. ليلتكم سعيده 💙🌸