Ask @mahmouddiab469:

حديثوني عن عزيزٍ لكم ، رحم الله ذكراه.!

اول حد عزيز عليا ربنا يرحمه محسن وده بسم الله ما شاء الله اخد كفايته دعاء من الناس كلها وما زالت الناس بتدعيله وانا بادعيله من كل قلبي عشان انا بحبه ، وفاكر لما كان بيناديلي " يا ديبووو يا حبيب اخووك ❤ وانا حبيت الاسم اصلا علشان هو الي سماني كده وبقيت اخلي اي حد يناديلي ب ديبو واقوله عشان محسن الي مسميني كده .
تاني حد خالي عارف ودي كانت اول صدمة طبعا للعيلة كلها بس الحمد لله اني لحقته اخر ساعة قبل الغسل وفضلت ابوسه واحضن فيه ، الحمد لله سايب كل ذكرى حلوة عند كل الناس الي عرفته وف قلوبنا كلنا سايب كل حلو ، كان بيناديلي " حوده حبيب قلبي حبيب قلب خالو ❤ " فراقه كان صعب بطريقه ملهاش وصف والله .
اما من اسبوع ف انا فقدت اغلى واجمل واحن قلب ف حياتي كلها " جدتي " انا فاكر وهي ف اسكندرية بعد العملية الي كانت عملتها ف القلب كانت فاقت وبقت كويسة كده ف امي قالتلي كلمها بس متطولش وقولتلها حمدالله ع سلامتك يا ماما وسلامتك بالدنيا كلها قالتلي الله يسلمك يحبيبي ، اتجدعني يا ماما .. هاتجدعن بس ع كده وجات من اسكندرية وكله تمام ولسبب ما انا كنت برة البلد يومها وملحقتهاش .. ف تعبت تاني واتحولت ع عناية ف كفر الشيخ واخدت تلت ايام ورجعت تاني زي الفل وروحتلها ودخلتها الزيارة ودي كانت اخر مرة انكلم معاها ، داخل انا وابن خالي لقيتها بتقول " يادي النور يادي النور اي الحلاوة دي " قولتلها الحلاوة حلاوتك انتي احنا بقينا حلوين اهو وزي الفل عايزين نروح بئا قالتلي ان شاء الله ، هنتجدعن شوية عشان مش عايزين نطول هنا قالتلي هنتجدعن ونلعب ماتش كورة ، الله اكبر الله اكبر طب يلا واحنا مستنيينك اهو ، ان شاء الله وبوستها وبوست ايديها وضحكنا شوية وزيارتنا انتهت ، وفضلت كمان كام يوم وقالوا هنطلع من العناية ونروح ولسبب ما بردو كن برا البلد ومكنتش موجود ، ف تاني يوم لقينا خبر الوفاة جالنا ف روحنا وهي ف الغسل فضلت ابوس فيها وجالي زهوول من المنظر ازاي اخر مرة بنضحك وهنتجدعن وببوسك عشان اخر مرة هاشوفك فيها ، الموقف تفاصيله كتيرة وطويلة ، والموضوع فيه كلام كتير حلو وافعال منها تفرح الي يسمعها والله ، ربنا يرحمها وسبحان من قوانا وصبرنا ع فراقها ، ربنا يلاقينا ف بعض عن قريب يا حبيبتي واللقا نصيب ❤

View more

Next