ŠtåTuŠ💙
في مرحلة الواحد ممكن يوصلها بتكون أصعب م الوجع والحزن بكتير .. المرحلة دي غالبا بتكون بعد صدمة حصلتلك ..حبيب ربنا مكتبلكوش تكملوا سوا ايا كانت الطريقة اللي بعدتوا بيها .. واحده كنتي شايفاها اقرب صاحبه ليكي واكتشفتي انها مكنتش تستاهل تكون موجوده في حياتك من الاساس .. اهل بدل ما يكونوا سندك بيكسروكي .. وحاجات تانية كتير لو عيشتها هتكون صدمة بالنسبالك .. صدمة هتدخلك ف دوامة حزن ووجع وعياط لشهور وممكن لسنين .. واول ما تخرج من الدوامة دي هتلاقي نفسك بقيت واحد تاني .. واحد روحه مطفية ومشاعره مستهلكة بمعني الكلمة .. لا بتحزن اوي ولا بتفرح اوي وكل حاجة بتبقي بالنسبالك عادي .. وبعد ما كنتي ممكن تعيطي بسبب اغنية أو فيلم الدنيا ممكن تتقلب وعينك متنزلش دمعة واحدة .. هتحسي ان مفيش حد او حاجة ف الدنيا فارقة معاكي .. مش هتبقي عايز تقربي من حد تاني ودايما بتهربي من الناس اللي بتحاول تقربلك وحتي اللي كانوا قريبين لو بعدوا عنك مش هتتاثري.. هتبقي متوقعه اي حاجة من اي حد .. وحتي تفكيرك قبل النوم هتنسيه! اكنك واخده حقنة بنج لمشاعرك وتفكيرك .. ورغم كل ده هتهزري وتألشي وتضحكي قصاد الناس عادي جدا ومش هيبان عليكي اي حاجة .. واللي ميعرفش اللي مريتي بيه هيفهم من تصرفاتك انك تنكه او بارده او تافهه .. بس لو عرفك كويس هيعرف ان القصة اكبر من كده بكتير! عشان كده لو لسة قادره تتوجعي وتعيطي وتحزني.. احمدي ربنا .. لان الحزن والعياط والوجع اهون بكتير من اللي الناس دي عايشينه!
