_____☂️🌦️

شربنا الحليب إللي بنكرهه ، جربنا البهدلة والضرب ، لعبنا بالشارع للمغرب وروّحنا عالبيت كلنا تراب ، بكينا بأول يوم دوام بالمدرسة ، وشرّينا محايات وضيعنا أدوات المدرسة ، ما نمنا لأنه طلع فقاعات بتجليد كتبنا ، انبسطنا لأنه بلشنا نكتب بقلم حبر ولأنه صرنا ناخد 3 كتب اجتماعيات ، جربنا الهبل والتفاهة بالأول ثانوي و عانينا بالتوجيهي ، انجنينا لأنه دخلنا سن ال18 وفكرنا حالنا كبرنا وانضحك علينا !
جربنا كل أنواع الناس بحياتنا ، النفسيات والنكدين والطيبين والعصبيين والمصلحجيين والمريضين والتافهين ، انضحك علينا لأننا قصار وطوال وناصحين ونحاف ، حبينا وما انحبينا ، وانحبينا وما حبينا
جربنا وفاة ناس قريبة منا ، ندمنا على صداقات لا تُحصى وانجرحنا من بعدها ، بكينا على أشياء تافهة زي بلوزة مريحة أمنا عملتها ممسحة ، أو شعر مش راضي يزبط على هالصبح ، و معناش مصاري نطلع ، جربنا ناكل كل اشي حتى الهوا ، سمعنا وشفنا وعشنا قصص كنا نفكرها بس بتصير بالأفلام ، صلينا وما صلينا ، ختمنا القرآن وبكينا
قرأنا كتب لقلنا بس ، حضرنا أفلام لقرفنا ،
حفظنا أغاني لحد ما زهقنا ، كذبنا على أهلنا ، وبرضو ميتين خوف على فراقهم !
صرفنا مصاري على أشياء فارطة بالهبل ، مرضنا ألف مرض وتوجعنا وحسينا إنها آخرتنا ، ضعف نظرنا وشرينا نظارة ، ضعف سمعنا وصرنا نطنش ، ووجع المعدة بسبب نكدنا !
متنا و فشلنا ألف مرة ووقفنا على رجلينا ، متنا باليوم مليون مرة ورجعنا نكافح وبعدنا بنكافح
- هاي الحياة إللي عاشها كل واحد فينا وكثير تفاصيل بنفكر إنه عشناها لحالنا بتلاقي الكل جرب وعاش وعانى مثلها وأكثر
كلنا على أرض وحدة وتحت سما وحدة وكل المشاعر النا نصيب فيها وما في حدا حياته كاملة لأنه ربنا أسماها الحياة الدنيا 💙🏃