هههههههههههههههه شكرا شكرا نوفل طلعتي حرتي بالروايه انا قريتها وجلست شهر احس بالضيم اتمنى من الكاتبه تستحي على نفسها وتحذف الرواية من الموقع وتطالب من اللي نشر الروايه بالمواقع حذفها بعد شي يفشل والله
هههههههه، أنا بعد ما خلصت منها رحت أدور كتاب اقرأه علشان أعوض نفسي ☺️
يا الله نووفل .. لولا الحياء من الشعب اللى جالسين حوولي كان وقفت وصفقت لك على نقدك اللى يبرد الكبد لرواية امانة لا تطلع حرارة انفاسك قصفتي كل شي نرفزني فيها بس انك نسيتي العنوان بالعادة تعلقين عليه قبل ما تبدأين بنقد المحتوى .. بس يلاه معليه :)
كتبت أول كلمتين من العنوان 😞 أهم شيء عرفتوا الرواية 👍🏼 شكرًا شكرًا 💗
توني ما خلصت 🌚😂😂 طبعًا أثناء القراءة راح تكتشفون جميع لهجات السعودية لول مره تقول هلابش مره تسذا مره جليلة حياء (هذي كويتيه عاد 😍😂) هذا غير عن الصدف البايخه اللي تصير بين البطلين، وهم متزوجين 😊، اللي تعودنا عليه صدف مبتذلة بس وهم مو متزوجين علشان أكشن يعني 😷 ولازم البنت الشريرة تلبس عباية مدري وش فيها وتغازل، أعرف ناس أشرار وخارجيًا كويسين مره 😏 والشركة حقت البطل مسحوب عليها، مدري وش هالشركة اللي مشغلها على الطيار الآلي (يا ربي أنا سامجه 😂😂😂) من جد ما يداوم ما يروح ولا يجي! لا، دايم مسنتر في البيت! ولا بعد فيه موقف للبطلة في السوق جاها رجل ومسك يدها يغازلها وهذا كـــــلــــه قدام الزوج المتخلف "انقهرت" وبكل برود جا وقال نزل يدها انت ما تسمع؟ لووول انا في موتي . وفيه موقف للجد يبي يغيض البطل قال انا بزوجك يا دانه (البطلة) لفلان، قام قال البطل لااا دانه حقتي وعصب وزعل ،،، اللهم يا ربي أنا قادمة 😂😂😂😂 غثيااااان خلاص آسفه ما عاد أتكلم عن الرواية 🌚💖
السلام عليكم ايش المشكله يا جماعه ؟؟؟ وش هالرواية الأخيس من العفن ! وش قاعد يصير في الكوكب 😂😂😂 مين الحلوه اللي قالت بتنجلطين، انا مو بس انجلطت، صابتني حالة هستيرية من الضحك!!! شيء مستحيييييل كم عمر الكاتبة؟ ١٣؟ مستحيل، أكيد أقل بعد. وتلوموني، وتقولين ليه متنرفزة، المشاهدات اكيد صكت المليون، والردود بالآلاف، ليه طيب؟ على ولا شيء، حرفيًا مهزلة، عفن، فطريات، بكتيريا ضارة روائية (لأن فيه بكتيريا نافعة 😂😭) القصة شيء سخيف، بنت فقيره مع اهلها، وعندهم عاملة بالرغم من فقرهم اللي طول الروايه وهي تعيد وتزيد فيه! وطبعًا القاتلة عفواً الكاتبة ما استحملت وقتلت العايلة كلها من بداية البارت، وعاشت المسكينه دانه عند جارهم ابو متعب، وفي يوم جت ام متعب وقالت لدانه عمك اتصل ويبي ياخذك تسكنين عنده انصدمت دانه وقعدت تبكي وضموا بعض ولما خلصوا عناق قالت ام متعب جهزتي اغراضك قالت دانه ايه جاهزه، اكيد جهزتها فكريًا لأن كيف جهزت وهي كانت ضامتها 😅!! المهم البطل ويا ليلنا من البطل، تركي عمره ٢٨ وعنده بنت عمرها ٩ سنوات، يعني حسابيًا تزوج وهو عمره ١٩! تقنيًا يقدر ينجب 🌚 هههههههه بس كيف تزوج وهو عمره ١٩؟ ربكم أعلم عمره ٢٨ وعنده شركة وهو "راب" عمل كل اللي في الرواية ، راب يعني رب العمل بس شكل الكاتبة تحسب اذا كتبتها راح تشرك بالله! تركي عمره ٢٨ (فهمنا يا نوڤل!) وزي البزارين بالضبط، تصرفات، ينبهر بالشكل، ويعاند، ولا ردود رجال، ولا تفكير رجال، سذاجة في تفاهة في غباء في جرأة كاتبة تعطينا شخصية مثل شخصيته! وما ابغى اتكلم عن الجد اللي سبحان الله عبيط بزيادة عن اللزوم، ويرتب لقاءات بين البطلين بالبجايم والنوم وحركات مالها داعي، يعني مدري لوين تبي توصل الكاتبة! الرواية "عذرًا على الكلمة" فيها أفكار جنسية كثر شعر راسي، وجرأة مالها حد، خلت شكل البطلة الدافع الوحيد اللي يخلي البطل يحبها وخذلك بعد، صديقة البطلة العزيزة متزوجه ولد عم البطلة ولا تدري انها بنت عمه. وزوجها اللي هو ابن عم البطلة تزوج في الخارج بدون علم اهله باسم العروسه ولا جنسيتها، سلامات حبيبتي الكاتبة؟ اصلاً كيف تزوجت البطلة لحالها ودك امسكها وانفضها نفض على هالتفكير المضروب على اساس ان البطل يبي يتزوج وحده متينه وشينه وسوداء (عندما تجتمع العنصرية والسطحية في الكاتبة) وجت مرة العم الشريرة وصبغت وجهها بالفحم ولبستها عشرين لبس علشان تطلع متينه وخروا لو سمحتوا انا طالعه ادور الكاتبة ابيها بكلمة راس☺️ وبنت البطل ام تسسسسع سنين، ركزوا تسع ناين ٩ 9 تتكلم مثل الشريريات في المسلسلات الكويتية، ايوه ايوه نفس اللي تخيلتوه بالضبط ☺️😞 اوجه جملة شديدة الصرامة للكاتبة لا عاد تكتبين، ولا تفتحين الوورد، ولا تمسكين قلم، انتي وامثالك، رجاءً 💖
مو انا اللي وصيتش بلجل الوعد بس اتوقع اول شي تقولينه ع البطل الغني الواو و البطلة اللي ماتجي الا نص بريطانية 😂ولازم حلو للحين ماحد حط اعتبار للشيون😛
ههههههههه هي مو مسألة شيون، لكن ما أحب النظرة السطحية في الروايات، شكل وثراء! المهم هي فكرة الرواية محد مهتم إن كانوا أغنياء لدرجة "يطلبون ملابس من مصمم" ولا جميلة وأمها فرنسية 😐! أسلوب "سندريلا" ما يعجبني، الأمير الغني الجذاب والوسيم والبنت الفقيرة المعذبة الجميلة! أوڤر والله كبرنا على هالقصص.
السلام عليكم جميعًا، أولاً أعتذر لأني تأخرت 😅 العنوان مقبول كنت اقرأ الرواية ومستمتعة بالسرد، وحوارات ممتازة إلى أن وصلت لبعض الأشياء اللي خلتني أبطل اكمل الرواية! الشيء الأول فيه شخصية في الرواية اسمها رهف، وهي بنت جدًا غنية، عندها "خال اسمه عنبر" بحد وصف الكاتبة! ليه هالعنصرية؟ ليه ما كتبت حارس شخصي؟ أو مرافق أو أو، ليه حددت لون بشرته بنعت عنصري بحت!! ايش يستفيد الشخص من لون بشرته! وكملت قراءة ولقيت شيء عنصري ثاني!! وهو في الحوار اللي في الصورة! وش فيها العاملة؟ علشان تكرم؟ جزمه ولا ايش؟؟؟ صراحةً تقززت من الرواية وكلي يقين إنها رواية تحكي عن الفشخرة ولا غير الفشخرة شيء.
بصراحة ابرياء حتى تثبت إدانتهم هي الوحيدة التي تستحق ان تطبع لتصبح عمل روائي ورقي جدا جدا جميلة وغير مبتذلة.كذلك تتناول مواضيع متنوعة بعيدا عن صخب الثراء الفاحش لاكتست به معظم الروايات السعودية كما انها تحمل العديد من الرسائل المبطنة انصح الجميع بقراءتها والصبر عن اللهجة في البداية ()
شكرًا لمشاركتنا رأيك ❤️ ذائقة الناس في الكتب أو الروايات تختلف مثل اختلاف ذائقتهم في الطعام، ولا مو الكل يحب البيتزا 😜😁
الروايات الخمسة ما قرأتهم لأنهم ما أعجبوني إلا روية بعض العيون حقدها في نظرها، توني بديت بها أسباب عدم قراءتي: ١/ابرياء حتى تثبت إدانتهم: اللهجة العراقية اللي أفقدتني الإندماج، ليس إنقاص في اللهجة بذاتها إنما لو كانت بالفصحى كانت بتكون أحسن. ٢/بين الأمس واليوم: مملة بشكل رهيب 😅!! يعني أول مره تمر على رواية اقرأ صفحة وأترك الجوال آخذ نفس 🌚😂 ٣/هن لباس لكم: السرد متمكن خصوصًا إنه بالفصحى، لكن ما قدرت أكملها لأني فقدت عنصر التشويق، ولكثرة المعلومات اللي ضختها بداية الرواية. الروايات مو سيئة إن شاء الله لكن ما راقت لي أبدًا، راح اقرأ بعض العيون حقدها في نظرها.
صباح الخير بتوقيتي.
عزيزتي كيف قادرة تتحملين روايات النت؟
اقصد ما يأثر على محصولك اللغوي والنحوي؟
انا اذا قرأت رواية نت وجربت اكتب بعدها، تتغير طريقتي في الكتابة وتصير سيئة، اما اذا قرأت كتاب جيّد تتحسن طريقتي، وحسب مافهمت انك قارئة كتب جيّدة وساعدتيني مره بخاطرة لي فالبيبي، ما اثّر عليك؟
طولت:(
مساء النور 💓 سؤالك حلو، وجاوبتي عليه بنفسك 😄 فعلاً تأثر، لكني لا أمارس الكتابة حاليًا، وعلى فكرة، أنا لما اقرأ رواية اقترحتوها إذا كانت سيئة على طول أوقف قراءة وأكتب نقدي، وأقول ما قدرت أكملها، وابدأ كتاب جيد علشان أعوض. أتوقع إنه تأثير بسيط، لأني إذا قرأت كتاب لشخص معين له أسلوبه في الكتابة، تلقائيًا أشعر إن أسلوبي في الكتابة يشابهه ولو بكلمة واحدة. فاللي حاب يطور من نفسه ويتقدم خطوة، لا يرجع ثلاث خطوات ورا بسبب روايات الانترنت ❤️ بالتوفيق يا نور 💋
مشاعل كاتبة روايات العشق انفى للعشق واسمتني امي قربى يالله اكثر كاتبة تنزفزني تكتب رواية وتسحب عليها وتبدا بجديدة بحجة ماجاها الهام عشان تكمل الرواية السابقه 😷💔
أحس إني فتحت عليكم موضوع حساس 😅 حاولوا تتذكرون كلمتي اللي دايم أكررها (إنهاء الرواية أمر غير هين) ويمكن فعلاً ما جاها إلهام، ايش تسوي؟ غلطها الوحيد إنها نشرت شيء غير مكتمل، مو الكل يقدر ينهي الرواية
ليه م تسجلين في المنتديات وتقولين رايك هناك عشان تشوفه الكاتبه وتحسن من نفسها
لأسباب مختلفة، أولها: إني ما أقول رأيي في رواية ما اكتملت، لأن الكاتبة في تطور. ثانيًا: هل كل الكاتبات بيقبلون رأيي بسعة صدر؟ ثالثًا: معظم الروايات عامية، مقدر أقول ببساطة لا تكتبين بالعامية! لأن من حق الكل ينشر اللي يبي في النهاية، فأحس رأيي لو قلته بيتجاهلونه . على العموم هنا مرتاحة ومبسوطة 😁💋 ومثلاً فيه كاتبات كثير شافوا صفحتي والاسئلة اللي تجيني خير برهان، والكاتبة رشا الخيالية لما ردت علي ما كنت أدري إنها الكاتبة إلا بعد ما جاوبت ثم دخلت صفحتها قلت عيب يا نوڤل كان رحبتي فيها 🌚😂 وأيضًا عذاري وملاك شرفوني وسعيدة بالكل والله💗 وصفحتي ليست المرجع الوحيد للتحسين، اللي يبي يتطور فيه مليون طريقة.
يعني مدري وش أقول، قريت صفحتين وما فهمت ولا حرف، أول شيء قلت يمكن أنا دايخه 😂! وصحصحت شوي ورفعت ضوء الشاشة علشان أفهم لكن ما فهمت شيء!!!! اخطاء املائية وقلت أعديها، لكن الجمل مو مفهومة، كلمات مركبة فوق بعض بدون معنى! يعني ما شاء الله كتبت بالفصحى وهذا شيء مذهل، لكن ترتيب الجمل والسطور غير مفهوم والله، ومن بداية الرواية مدري وش صار ناس تتهاوش واسماء غريبة: فينوس شملان عذبي وش فيه يا جماعة الخير 😧😅؟؟
نوفل اذا خلصتي رواية اللى يبينا بتكتبين نقد تابع للنقد للى قبل او بتكتفين باللى قرأتيه ؟ ( ادري حومت كبدك بأقتراحي و اسئلتي عنه بس ما عليه تحمليني ) شكرا
حاليًا عندي خمس روايات اقرأهم، رواية اللي يبينا مو من ضمنهم، ليس تقليل من شأنها لكن ما أحب أضيع وقتي في رواية سيئة أنا أعرف محتواها! أعتذر منك والله 💗
لما تقولي عن روايه فيها اخطاء املائيه كلامك يجي فيه غلط املائي بعد ههههههه ادري يمكن بالغلط لكن من كلامك حسيتك تدققين لكن عندك اخطاء
ترا ملاحظه وساكته 😂 ما أدقق كثير ورا اللي أكتبه، وأنا إنسانة سريعة في كل شيء في كلامي+كتابتي دايم اللي يتكلم معي يقول أحسك منفعله شفيك هدي 😧😅 لكن أخطائي تسقط سهوًا، يعني ممكن كلمة وخطأ مطبعي وليس املائي 😁
شكرًا لك 💓 أمامي خمس روايات اقترحتوها، راح اقرأهم حبة حبة واللي أخلصها بابدأ فيها ١- هن لباس لكم ٢- وشايات المؤرقين ٣- بين الأمس واليوم ٤- بعض العيون حقدها في نظرها ٥- أبرياء حتى تثبت إدانتهم وصفحات الروايات كثيرة جدًا فخليكم صبورين معي 💋 وأتمنى محد يقترح إلى أن أخلص على الأقل ثنتين ولا ثلاث 😅 واللي عنده رأي بخصوص وحده من هالروايات يكتبه، تسعدني قراءة آراءكم
صدقت لما قلت انك تشوفين الرواية بنظرة ما اشووفه .. ماني جايه اعاتبك على نقدك لرواية اللى يبينا بالعكس تقبلته بصدر رحب .. بس بسألك عن شي ما فهمت لما قلتي انه فيه تفاصيل غريبة وكان الاحداث فعلا صارت للبطلة .. يعني تشوفين هالشي زاد سوء الرواية او شي كويس.. ميز الرواية عن غيرها ؟؟
أنا ما أمنع أي شخص من إنه يقول رأيه الشخصي، بالعكس اتقبله وأحب اقرأ الآراء مهما كانت. التفاصيل الغريبة هي لما ذكرت في بداية الرواية، "ابوي عصب لما شافني طالعه فيها" ، "ابوي بغى يذبحني لما شاف السعر". ذكرت أحداث بشكل سريع لا تفيد ولا تزيد الحبكة ولا القصة بأي شيء! قلت غريبة لأني توقعت إني لما أكمل قراءة راح أربط بين اللي ذكرته وشيء ثاني، لكن اكتشفت إنها مجرد جمل عابرة! كأنها سالفة في حساب قصصي في الانستقرام. وطبعًا ما ميّز الرواية، التفاصيل تملل القارئ إذا لم تكتب بطريقة مبدعة.
ما راح اتكلم عن العنوان بسوي نفسي ما قريته 😊 أنا ما قرأتها كلها وأعتذر من اللي اقترحتها لكن الرواية سيئة بشكل ثلاثي الأبعاد، أول شيء السرذ حسيت كأني اقرأ قصة في سوالف هيون 😂! ايوا ايوا تذكرون هالسوالف نفس نوعية الرواية حتى استغربت من التفاصيل الغريبة وكأنها فعلاً حصلت للكاتبة ووثقتها في الرواية! أول حدث إن الكاتبة قتلت العائلة، ولو لاحظتوا أغلب الروايات لازم البطلة أو البطل يجي يتيم، ماله أم وأب! ليه طيب تقتلون الناس اللي حولهم! صراحةً لما شفت إن عائلتها ماتت قلت اللحين تنتقل لبيت قريبها وزوجته أو بنته بتكرهها وتصير حقودة عليها، وفعلاً هذا اللي قريته، البنت ما تحب البطلة وتغار منها كالعادة لأنها خلابة وجميلة ومذهلة ✨ واو والبطلة طيبة وحنونة وما تبي مشاكل ولا تكرهه أحد، اوڤر والله، دايم هذه القصص! ليه البطلة ما تكون إنسانة بكل بساطة، فيها خير وشر، لما أحد يكرهها بتكرهه لأن لكل فعل ردة فعل مساوية له بالمقدار (نوڤل بنت نيوتن) لول وبعدين حبت خطيب بنت عمها من اول نظرة وهو حبها من أول نظرة بعد وصار يجي عند شباك المطبخ يطلطل عليها ويتغزل فيها 😂😂 والله شيء عبيط! الغريب والغبي إنهم حبوا بعض كذا كذذذا بدون سبب يا ناس! المهم لما دخل خالهم في السالفه اللي كرهته أيضًا بدون سبب عرفت أو تنبأت 🌚 إنها بتحبه وتتزوجه -هذا مجرد تنبؤ يعني بكملها وبشوف إذا صح ولا خطأ- على العموم رواية سيئة بكل المقاييس، لا سرد ولا حوارات ولا نص ولا عنوان عبيط ولا شيء، سفر من عشره 😂💋
لا للأسف، دائمًا أكرر جملة إني إنسانة ملولة فلحد يتوقع مني إني اصبر على عشر حلقات ولا ثلاثين حلقة علشان أعرف النهاية 😅! حتى الرواية لما اقرأها وابدأ احس ببوادر الملل اقرأ النهاية وأرجع أكملها بحماس ☺️ شيء غريب أدري.
يا ليت اذا خلصتي قراءة الرواية اللى اقتراحته لك تكتبين نقدك و تقييمه له لان متحمسه اشوفه مررا ؛0
قبل كم يوم تدفقوا متابعين جُدد 😅 أنا سعيدة فيهم الحمدلله، بس علشان محد يزعل أو يظن إني اتجاهل اقتراحه، ارجعوا للاسئلة اللي جاوبتها والاقتراحات بتشوفون مو كلها اقرأها، وأسبابي كتبتها قبل، فأي اقتراح أنا راح اقرأ الرواية بناء على طلبكم لكن احتمال ما اقرأها كاملة، أو ما أكتب نقد عنها أبدًا. أنا عيدي يمتد لأسبوع إلى أسبوعين فخليكم صبورين معي 😁 وشكرًا للجميع 💓
يا حلوك 😍 ما أدري لهاللحين، خلونا نعيد وننبسط، وعلى طاري العيد كل عام وأنتوا بخير جميعًا 💋💓 كان ودي أعايدكم بعد صلاة العيد أحياء لسنة نبينا عليه أفضل الصلاة وأتم التسليم، لكن خفت أنشغل أو انسى 😅
انا واقعة بغرام رواية اللى يبينا عيت النفس تبيه و اللى نبيه عيا البخت لا يجيبه وكنت قبل م اعرفك انه ما فيه رواية احسن منها متكامله بكل شي بغض النظر عن انها عامية :) وحبها اعرف رايك فيها لان نظرتك للرواية اللى قدامك تختلف عن نظرتي
مرحبا، حسيت من كلامك وكأنك عارفه عيوبها ولكن اعجبتك لسبب في نفسك 😅