زي كتير إن شاء الله هنشوف ربنا و سيدنا محمد و الأنبياء و الرسل و الصحابة و زوجات النبي و السيدة مريم مثلا يعني <3 هبطل عصبية أكيد بقى ما خلاص مفيش حاجة تعصب هاكل شوكولاته ومش هخاف من زيادة الوزن .. هطلع السلم من غير ما انهج و لا أحسبن على اللي قافل الأسانسير مش هشوف غير اللي بحبهم بقى وكدهون ودي حاجة جميله خالص و مش بعيد أنا و تريكة نبقى جيران ولا مثلا اناسبه و يجوزني اخوه ولا حاجة :D هنضم للاولتراس من غير ما حد يقولي ماينفعش علشان انتي بنت شبكة النت مش هتبقى وحشه و هشوف فيديوهات اليوتيوب بسرعه مش هيبقى في أغاني شعبي إن شاء الله يعني هعمل أسرة بقى و مش هيبقى في عميدة تخنقني ولا تقولي سيبي المقر و لا هيبقى في عم سيد .. ولا جايز الاقيه أصله مرزق والله الراجل ده :D مش هيبقى في برنامج اسمه على مسئوليتي بيقدمه أحمد موسى و لا هيبقى في برامج تستضيف مرتضى منصور مش هيبقى في شيتات و لا nursing care مش هيبقى في دكاترة و غياب يتاخد من 9 الا خمسة مش هنبقى في مصر و دي أهم حاجة :D ياااااااه .. دا احنا هنهيص والله لما نروح الجنة .. ربنا يكتبهالنا جميعا :))
الحمد لله الكلية خلتني اكتسب مناعة ضد كل التعليقات و بقيت ماشية مع الخلق كلهم بمبدأ دع القافلة تسير و كمل انت بقى أما حكاية رفض اللي بقوله فده ماعنديش مشكلة فيه خالص بالعكس بتقبل وبقتنع إن كل حد ليه دماغه بس المهم يكون اللي قصادك بيتكلم بموضوعية ومنطق وبعيد عن جو خدوهم بالصوت و فرد العضلات و الكلام ف اللي ما يخصوش ولا يحق ليه انه يتكلم عنه أصلاً
هل انت ممن يقدم التنازلات حتي تستمر الحياة .. و إلي أي حد تتنازل ؟
هو أنا ممكن اتنازل مرة بمزاجي علشان أمشي الدنيا و حط 3000 خط تحت بمزاجي دي و ممكن مرة كمان علشان الحبايب التالتة بقى هتنازل عن الشخص أو الشيء اللي مش باخد منه غير تنازلات ده و اريح دماغي
تفتكري الكلام ده بيبقى على الملا كده يا بسوم :) هقولك بينا بقى :)
بتعملوا ايه وانتو ماشيين في الشارع , ولما تحس ان الناس بتبص عليك بتعمل ايه ._.
لو ماشية لوحدي بنسى اني في الشارع و اسرح في حاجات قديمة وساعات بضحك وانا ماشية و ممكن أغني كمان واحدة جارتنا قالت لمامتي في يوم دي رحاب بتمشي تكلم نفسها في الشارع قامت امي قالتلها لا دي بتغني :D وواحد ظريف قبل كده وانا ببتسم على موقف افتكرته لقيته بيقول احنا هنفضل مبتسمين كده كتير :D بحس اني ببقى ضايعة وانا ماشية في الشارع أصلاً ملحوظة : الكلام ده كان قبل الكلية أما دلوقتي مابمشيش في الشارع أصلاً
في إبتدائي كانوا بيدرسونا قصة " مغامرات في أعماق البحار " اللي هي بتاع علاء و أماني لما كانوا بيتفرجوا على أعماق البحر و شافوا غواصات و حاجات شبه الانسان الالي شغالة لوحدها و استغربوا ازاي يحل الانسان الالي محل الانسان المهم في الاسئلة بتاع الفصل ده كان في سؤال هل الانسان الالي افضل ام الانسان البشري ؟ لما الاستاذ وجه لنا السؤال بعد تفكير سريع جداً رفعنا ايدينا وقولنا " الانسان البشري افضل من الالي لان الالي من صنع الانسان و معرض للخطأ و التلف أما الانسان البشري فهو من صنع الله الذي منحه العقل ليفكر و ينتج ويعمل بجودة افضل من الانسان الالي " ده كان معنى الاجابة اللي اتقالت ساعتها بس بيتهيالي ان الاجابة دي مش ماشية مع الانسان المصري اللي غالبا هيكون الانسان الورق افضل منه لان المصري ما بيستخدمش الميزة اللي ربنا ادهاله ولا حتى مصدق انها موجودة فيه :D