ركبت باص عالواقف وحسيت في شب بده يقوم ويحكيلي تعال اقعد عموو
الحمد لله اللي لطف وخفف ، صرت بعمر اللي بده يتطمن علي يسالني اخدت ادويتي ولا لسا
الطبيعة الخضرا بتستفزني من الصبح اطلعلها ، وانا هالفترة سهل استفزازي
ما في حدا بالدنيا ما بتمرق قدامه فرصة ، بس بدك تتعلم كيف تستعد وتتكيف لتوخدها ..
حصرت الاغلاط اللي كانت سبب اني ما تقدمت أسرع ، والناتج كان
وجوب السكوت بأوقات حكيت فيها
وجوب العقل بأوقات تعاطفت فيها
وجوب السؤال بأوقات تسرعت فيها
ضل اتعب عشخصيتك وقويها عراحتك ، لحد ما ييجي حدا يكركبك ويرجعك من نقطة البداية ، هيك انت بتحبه ..
بعد انقطاع الاتصال لفترة طويلة مع واحد من صحابي المتجوزين ، بتحس انه قفص الزواج يحده من الشمال مثلث برمودا ، ومن الجنوب سور الصين ، بحكيلي انا متجوز عن حب ، بس بطلت أحس بنفس اللهفة والسعادة اللي كنت احس فيها ، حكيتله مش بتخاف وبتغار عليها ؟ لا سمح الله لو صار معها شر رح ييجيك نوم وجوع وهداوة بال ؟ حتى لو الوعي عندك تعود عالشخص ، بس شدة الموقف رح يخلي روحك من جوا تكذب وعيك وتثبتلك انك متعلق فيها ، بس اللي بصير معنا كبشر طبيعي جدا ، (( الاعتياد ))
انا كصهيب وعشقي للفيراري ، لو بيوم صحلي املكها ، انا متأكد رح اقعد شهور انام فيها واحتمال اشتريلها شامبو مخصوص ، بس بعد فترة رح يصير الموضوع اعتيادي للعين ، زي لما تشتري تلفون جديد او لبسة جديدة ، والاعتياد بنقل الانسان من مرحلة اللهفة لمرحلة الرضا ، يعني اعتيادك على الشخص اللي بتحبه لا يعني نقصان مقدار درجة الحب ، بس بعني تغير اسلوب تعبيرك عنه ، اكيد ما رح تعبر عنه في الاربعينات من عمرك زي عشريناتك ، بس رح يتحول من شكل لشكل جديد ، المهم رح تكون راضي فيه وسعادتك رح تلازم وجودهView more
بتوصل لمرحلة البكا فيها بكون اقل من اللي انت فيه ، ولا الدمعة طالعة منك ، بس بتنعكس عروحك ، وبتتحول هاي الدمعة على صورة عدم رغبة بالاكل و الكلام والنوم والمشاركة ،، ونبضك بكون ثقيل ، بس زي العملية التجميلية بتخللها معاناة لتطلع بصورة أحسن ونظرك أقوى
اذا كنت ناجح وشخصيتك حلوة وروحك نقية وشفت نفور وفشل علاقات ، ظاهرة طبيعية الها أسباب غريزية فلا تستغرب ..
- انت بتحسسهم وبتذكرهم بفشلهم ، وجودك معهم رح يحطهم تحت المقارنة ، حتى لو كان أكثر الناس حبا الك اذا فشل رح تصيبه غصة وبضطر يقاوم نفسه ، ولو ما بينلك
- طبعك وجوك ما بشبههم
لو طلعت من الدنيا بشخص واحد يحب يشوفك أحسن الناس فهاد نعمة 🌱
لما نحكي عن عيوب الشخص اللي بتحبه بدك تتذكر نوعين ..
النوع الاول عيوب ما بزبط تكمل بوجودها وهي على صور
-- نقيض اخلاق التعامل الرئيسية ( الكذب والبخل والتكبر والخيانة والنفاق ... )
-- طباع رئيسية ( العناد على حساب العلاقة ،
المزاجية المستمرة اللي رح تخليك تحت رحمة ظرفه ، العصبية الدائمة اللي رح تبني حواجز يفترض ما تكون موجودة ، النكدية والسوداوية المفرطة )
-- بعض السلوكيات الرئيسية واللي هي مؤشر مهم على اكتفائه فيك ، وعدم وجودها يفترض يخليك تنسحب ( عدم الاهتمام والمبادرة ، الغموض ، الغياب الطويل والمتكرر ، البرود واللاكتراث ، عدم التقدير واهمال قيمتك وميزاتك عن غيرك)
-- الفجوة العقلية ( شخص تفكيره سطحي وبدون مبدأ ولا واعي وفارغ دون اهداف )
كل حدا اعتبر انه هاي العيوب يفترض تتحملها مع اللي بتحبه ، عانى بنهاية مؤلمة ، لا هو كسب العلاقة ولا حتى نفسه ، وهات بعدها اقنعه انه اللي كان معك ما تغير ، هو انكشف عطبيعته او انت كنت معمي وبتتجاهل الدلالات ..View more