مش مهم شكله!! مش قادره أستوعب هي طنط اللي بتنصح بنت مقبله على ارتباط أو اختيار شريك حياتها فتقولها الجملة المشهورة (الرجل ميعبهوش شكله) أو (مش مهم شكله)!!أنا متفقه إن (الوسامة) مش أولويه وإن البنت اللي مستنيه أحمد عز وأمير كراره دي محتاجة مراجعة أو تعديل قناعات لكن (شكل الرجل وأناقته) من أهم الأولويات في اختيارك لشريك حياتك لبسه نضيف (مش براندات) بس بيعرف يلبس كويس ذوقه حلو .. جزمته والعطر (البرفيوم) بتاعه جذاب لما بتكوني ماشيه جنبه بتكوني مبسوطه وفرحانه بيه مش قرفانه من ريحة العرق أو البنطلون المقطع (الكاتنج) يكون مهتم بممارسة الرياضة مش لازم يكون مشترك في جولدز جيم يعني بس حتى بينزل يجري ع البحر يوم في الأسبوع أو حتى أضعف الإيمان بـيـ workout في البيت لأن كلنا عارفين راجل مش محافظ على صحته هتكون ثقته ضعيفة وصوته عالي في البيت ازاي ولو هتنكر ده هستغربك! وبالمناسبة في شباب بتلبس براندات بس ذوقها معفن وشباب بتجيب لبس بسيط بس ذكية وذوقها حلوالوسامة والبراند مش أولوية لكن الأناقة والاهتمام بمظهره أولوية
في ناس بتقول لو مابتعرفيش تقولي حاضر ونعم ماتتجوزيش بعيدا عن إننا مش جواميس هنقول حاضر ونعم وخلاص يعني عشان احنا مش ف الجيش ياعالم بس لو واحدة تتجوز واحد بإرادتها وهي بتحبه تقوله حاضر ليه، لما ممكن تقوله عيني مثلا
باب في جمال اللهجة السودانية: تقول له حاضر يقولك تحضر ما تغيب عاوز يقولك واحشني فيقول عاوزين نكحل عيوننا بشوفتكم (تخيل مثلا إن عينك ممكن تتكحل وتحلوّ بشوفة حـد واحشك! أنا في حياتي ما لاقيت وصف بالشكل والجمال والدلال دا)، عاوزين نبل الشوق (نروي الروح المشتاقة) تمام: يتمك عافية طيب: يطيب عملك سمح: تسمح ايامك زول كان ينادي على بنته كدة: تعالي يا الرايقة المُو مُضايقة، تعالي يا الزينة يا ضوء الرتينة، بتي السمحة لون القمحة، يا قريعة العسل :")وكلمة الريدة عندهم بمعنى الحب، اللي هو أنا عديت الحب ده أصلا دلوقت يا زول ووصلت للريد خلاص الله الله! أظن إن وقع كلمة الريدة أعمق وأكثر حميمية فتحدث أثر بالغ في النفس الريدة .. حميمة وتلقائية .. وعميقةوأحبك شَديد دي بقى في عالم موازي للجمال السرمدي.
احيانا بحس الناس اللي معندهمش انكزايتي اغبى من المعدل الطبيعي، اصل بص حواليك مش شايف ان في حاجة تقلق؟ ايه اعمى؟ مفيش حاجة بتـ trigger you تخليك تفكر في عشر سيناريوهات كارثية؟ مالك؟ منعدم الخيال؟ وجايب الاطمئنان دا منين؟ وبكام بعد التضخم؟
معنديش ف شخصيتي بربع جنيه روح أنتقاميه مع إني أقدر أفرم إللي قدامي عادي. لكن بحب أستغل طاقتي لحبي لحياتي زي ما هي كدا ، بسيب الدنيا تلف و تتصرف هي ، لأن مهما كانت قوتك إنت أضعف بكتير من إللي ربنا و الدنيا هيعملوه ، لانهم حرفياً بيفرموا إللي أستقوى و فكر نفسه فتك ، محدش بيقدر يهرب من عدالة ربنا.
بين الحلال والحرام أميل هُنا وهُنا، لي زلاتي ولي حماقاتي، لا أدعّي الكمال، منذ متى يكتمل البشر! ولكني أرجو الله أن يدلني على الطريق الصحيح ويحسن خاتمتي.