من مراحل نُضجك الحقيقية، إدراكك إن معظم اللي هيمروا في حياتك عابرين؛ فكرة الأبديّة اللي مشاعرك بتطلبها في كل شخص تقرب منه، صعبة إلى حد ما، وده مش معناه إنها مستحيلة، يعني هيكون معاك واحد او اتنين يكملوا معاك؟ تلاتة؟ يبقى فضل ونعمة عظيمة، وتدعي ربنا يكونوا بشر أسوياء وكده تبقى تمام أوي.. بس يعني كل اللي هتحبهم هيكملوا معاك من غير فُراق؟ فكرة رومانسية بس مستحيلة؛ القلوب بتتقلب، والنفوس بتتغير، والظروف بتعيد تشكيل كل حاجة جواك وحواليك.. ودي من مراحل النُضج اللي غالبًا بتوصلها بعد كام صدمة من اللي بيعلّموا في الروح.. بس بتبقى أعقل في التعامل مع الحياة، وأهدى في تقبُّل الفُراق، وتغيُّر الأحوال.🖤🤌🏻
في اللحظه الي هتبقي بتحاول فيها تبقي شخص كويس ومريح و سبورتر للناس وتغير رتم حياتك وطريقتك مع الناس ، هتقابل نوعين من البشر نوع اتصدم وثقته اتدمتر بما فيه الكفايه ف فاكرك بتكدب وبتدعي المثاليه وهيفضل خايف منك جدا اكتر من اي حد تاني ، ونوع تاني هتلاقيه شايف ان فرض عليك تبقي كويس معاه وتحاول تخليه كويس لان هو محور الكون وفي الغالب العلاقات دي هتفشل وتنتهي وده لمصلحتك علشان تلاقي ناس احسن ومقدره طبيعتك وانك بتحاول تبقي شخص كويس علشان كل الناس مش ناقصه والدنيا بايظه اصلا .😅🖤
الاختيار الغلط غلطتك إنت، لا هو غلط الدنيا ولا إنت حظك وحش أو قليل، إنت اللي بترضى بحاجات أقل من طموحك، وبتدي ناس أكبر بكتير وكتير من حجمهم الحقيقي، وبتقرب ناس ليك مش شبهك، كل اختيار خاطئ نتج عن تحملك لحاجات في الطبيعي مبتتحملهاش، وفضل جواك شك .