إقتباس طويل 😴:

رؤى || تراجيـديا
شيخ أنا مش بس زعلان !
أنا قسما بالله بدي أفقع..
بدي أنجن..
شيخ انا تعبت والله تعبت..
وحاس عندي حكي رح أموت لو ما حكيته..
===
كان بتوجع وهو بحكي..
بتوجع -حرفيا-..
لا الشيخ ولا إحنا كنا فاهمين ماله..
وكمل كلامه:
==
إنتو راضيين عن شو بصير بالدنيا؟
شو بصير بالشارع..؟
يعني الوضع عادي بالنسبة إلكم؟
جد فهموني؟
ليكون أنا بشوف غلط..
معقول انا كثير سلبي وما بنظر إلا للجانب الفارغ من الكأس !
.
.
خلونا نسيبنا من الكأس الفارغ والمليان
الهي ينكسر هالكأس ونخلص منه..
خلونا ننزل عالشارع ونشوف...
كإنه الناس نسيت إنه في آخره..؟
استنتوا استنوا ما تحكولي ما تعمم..
مش بعمم قاعد..
بس في ناس هيك..
إن شاء الله كانوا بس عشرة !
هالعشرة بستنوا منا نحكي معهم..
بستنوا منا نذكرهم ونعينهم وناخد بايدهم..
مش بس نستحضرهم لما نتذكر نعمة الهداية اللي ربنا منّ علينا فيها..
ولا نستعرض فيهم معرفتنا عالمنابر والدروس إنه الناس فجرت وكفرت !
لازم ننزل عالشارع نحكي معهم..
زي ما كان يعمل الرسول أول الدعوة..
يا الله كيف كان شعوره وهو بدو يغيّر عالم ؟
عالم عمّ فيه الفساد والظلم والجشع والكبر والرذيلة..
كيف ما استسلم وهو بقاسي كل أنواع الألم والعذاب والإعراض والجحود..؟
.
.
شيخ مش هو قدوتنا..
مش لازم نكون زيه..
والله والله في كثير بنات لو ما لحقناهم رح يضيعوا..
في شباب ممكن يلحدوا لو ما حد جاوبهم على تساؤلاتهم !
في كثير ناس تركوا الصلاة عشان ذنب معين مش قادرين يتخلصوا منه..
تخيلوا إنهم ما بعرفوا إنه ما دخل يكون عندهم ذنب يعني يتركوا الصلاة..
في بلاوي ناس ما بتعرف إنه ربنا رحيم ورح يغفر إلهم كل اشي..
وإنه ما بصير يقنطوا وييأسوا من رحمته..
في ناس كثير بتستنى كلمة وحدة حتى نحيي الأمل في قلوبهم من جديد..
وعفكرة في ناس ما بعرفوا إنه الظلم والكبر والجشع والطمع والحقد والغيبة والنميمة أشياء عند ربنا اكبر من ذنوب بنفكر حالنا لو تخلصنا منها يعني ضمنا الجنة..؟
في كل إشي..
بس مين إلهم ؟ مين ؟
.
.
آه آه رح تحكولي كل واحد ربنا اعطاه عقل يفكر فيه..
وفي قرآن وسنة وبالتالي هالناس ربنا أقام عليهم الحجة..
بس مش كمان القرآن والسنة أقاموا علينا الحجة حتى نحكي معهم ونساعدهم..؟
مش ممكن يكون الإمتحان تبعنا كيف نساعدهم وننقذهم..

The answer hasn’t got any rewards yet.