خلى نيتك لله فى اى شئ تعمله واخلص نيتك لله تماما .. اسال نفسك فى اى عمل او اى كلمة حتى لو بتعمل لايك على الفيس شوف لدرجة ايه ربنا هيرضى عن ده ولا لاء ... اسال نفسك دوما انت صح ولا غلط وصصح نفسك وجدد توبتك يوميا ... اجعل ليك مع ربنا عبادة خاصة قراءة قران صفحة يوميا او استغفار ... اقعد مع نفسك يوميا قبل ما تنام وحاسبها هى عملت ايه النهادرة صح وعملت ايه غلط وتوب واستغفر من ده .... اقعد مع نفسك واكتب كل عيوبك وصلحها .. اختار لنفسك هدف فى الحياة انك تعمله ومفيش هدف اسمى من انك تنشر دين ربنا وتحمله اما للناس واما حتى على نفسك انت وتطبقه على نفسك انت
كنت سألت حد ازاي أقوي كتابتي في اللغه العربيه لاني بعيدها عنها سنين فرشحلي ان اقراء لمحمود صادق الرافعي و أتفرج على فيديوهات لتميم البرغوثي على اليوتيوب .... في حاجه تانيه حضرتك تنصحني أقرءها ؟
اقراى المتنبى كمان والرافعى طبعا زى ما قالك وتقريبا انا عرفت مين اللى قالك الرافعى وفاروق جويدة واقراى قران طبعا ده المصدر الاول عندى
بتفهم في تفسير الاحلام؟
احيانا لكن نصيحة قارن بين حياتك ومفردات الحلم ممكن تقدر تفسره بسهولة بدون ما تحكى لجد
إحذر أن تكون جسرا يعبر به الناس إلى الجنة ويهوي هو في النار نصيحة بعد ملاحظة أن أغلب من يتابعنك فتيات وهي نصيحة والله أخشى عليك الفتنة وما هي من أي شخص ببعيد
وده اول سبب لرغبتى فى اغلاق الصفحة ان الموضوع متبادل ممكن اقع انا فى فتنة لكن الحمد لله انا ربنا يثبتى ... او انى اكون فتنة لاحد وده اللى تقريبا حدث للاسف :(
ليه دايما بتقول انك خايف تعمل حاجه تضيع نصحك لينا قدم اخير اصﻻ انت مش هتعملها. وعلى فكره مهما عملت الناس هتفضل تدعيلك باى حاجه استفادتها منك ....مظنش انه حب الناس يخوف بالعكس ودى وجهه نظر
يخوف لانه مسئولية كبيرة جدا
اول مره اشوف حد مرتاح اوى فى الغربه ومش عاوز يرجع والصراحه استغربت اووووووووى لما الشخص ده هو حضرتك ليه مش عاوز ترجع ؟؟لو ينفع تقول سبب ولو مش ينفع ميش مشكله :)
السبب انى مبحبش مصر من وانا طفل عاوز اطلع منها باى شكل وانا مش مش عاوز ارجع لاء ارجع عادى لكن استقر فيها الايام دى لاء ممكن كمان كام سنة لكن الوقتى لا اتمنى ذلك
والله حضرتك كان نفسى ادخل كليه معينه ودخلتها وتعبت فى ثانويه عامه عشان ادخلها وبعد مادخلت بقى مش ليا اى هدف تانى بذاكر وانجح بس مش نفسى اكون معيده او كده يعنى بس نفسى اكون من عمار اﻻرض واعمل حاجه تنفع كل الناس وحاسه باحباط شدييييييييد. عشان مش ليا اى اهداف ...على فكره انا صحبه سؤال اللى مش ليه هدف
السؤال محتاج تركيز شوية فماجل الرد عليه وكويس انك بعتى سؤال تانى بنفس الصيغة تقريبا فعلشان اكون مركز واقدر افيدك هاجل الرد شوية ممكن :) ؟
شكرا جدا جدا وربنا يكرمك وفي نجاح دايما ان شاء الله
ربنا يكرمك جزاك الله خيرا
لو ناوي خير ...بجد هي النية اهم حاجة بس انا بحاول اكتب لان دي الطريقة الوحيدة اللي ممكن استحمل المدة دي وعلي فكرة مفيش تواصل بيني وبينها اصلا دلوقتي لاني برة مصر وراجع علي حسب مدة مفينة
طيب ربنا يرزقك بالخير ويجمع بينك وبين ما تتمنى ان شاء الله ويعصمك من الخطأ بس انا رايي انك تستحمل وتكتب لنفسك دى فكرة كويس وربنا يقويك
هو مش لمجهول بردو
يبقى نصيحة متطولش فى الكلام وقول المفيد ومتزودش واتقى الله فيهم وفى نفسك لو ناوى على خير
علشان ايه بالظبط علشان سببين الاول ممكن رسايل معينة انا استفدتها من حياتي ممكن تقول عبارة عن تدوينها وتوصيل معناها والسبب الاكبر اكيد علشانها زي ماقلتلك بس تقدر تقول بردو رساالة للانسانة اللي مكتوبالي ان شاء الله وهكذا يعني
يعنى انت بتكتب لمجهول ؟؟ مسالة الكتابة وتبسيطها سهلة اكتب من اللى قلبك على طول بدون تكلف جرب اعمل كده مش لازم وزن او سجع او لغة متقنة اكتب بس وخلص كل المحتوى وبعدين ارجع اقراه تانى بتمعن ودقق فيه هتلاقى كلمات ممكن تتغير لمعانى افضل وتنسيق هنا وجملة هنا ممكن تتشال وهكذا دى ابسط طريقة لتحسين اسلوب كتاباتك وفى نفس الوقت لا تؤثر على الاسترسال فى الكتابة بالنسبة لك وعلشان متصعبهاش على نفسك وانت بتكتب
حاليا بحاول اكتب حاجة تقدر تقول بكتبها لواحدة هسيبها لمدة سنتين وارجعلها تاني ان شاء الله هي عبارة عن كتابة اكنها قدامي وبكلمها بس فيه عفبات بتقابلني في الكتابة علشان مش متقن ازاي احاول ابسط الافكار علشان انا بتعب فيها جدا ومهتم بيها جدا
وجايلى انا :) ... فهمنى الاول معلش قبل ما انصحك فى حاجة زى الحاجة دى هتكتبها علشان ايه بالضبط ؟ لان لو اللى فى بالى مفيش احسن من الكلام بصراحة عن قدر الله وتوفيقه وبس
طيب حضرتك لما هتبطل نت احنا هنعمل ايه
:) بطلوه زيي جربوا كده حياتكم هتبقى افضل من غيره
فرحان بالنجاح اللﻻ حققته وحب الناس ليك وﻻ ﻻ ؟؟؟
اى نجاح ؟ انا محاولتش اسعى لشئ او انى انجح الا فقط فى توصيل رسالة للناس . حب الناس نعمة الحمد لله من ربنا وفضل لكن خايف منه بسبب نظرة الناس المبالغة فى انا مش طامع فى شهرة ولا ببحث عنها ولا بحط صورتى ولا الاكونت بتاعى فى الصفحة بالعكس انا بفكر كتير اقفل الصفحة وارجع زى ما كنت لان الناس شايفين عنى صورة مبالغ فيها وممكن فى يوم الصورة دى تتهز قدامهم يتهد كل اللى عملته واى نصح لى استفادوا بيه ممكن يروح للاسف فمسئولية كبيرة جدا حب الناس دى وكمان الانتظار اللى بحسه منه واللى بيطلبوه منى انى اقدم لهم جديد صعب جدا ممكن ييجى وقت مقدرش فيه اقدم حاجة
هتيجى مصر قريب وتستقر فيها.
لاء استقرار فى مصر مش عاوز لكن غالبا ممكن ارجع بس مش بمزاجى لكن هحاول بقدر الامكان انى مقعدش فى مصر
هو دخول النت حاجه سيئه ؟!
بالنسبة لى مضاره اكثر من نفعه ورغبة حقيقة من فترة طويلة انى ابطله وان شاء الله هيكون بالاضافة ان الحياة من غيره راحة بال اكثر مما تتخيلوا جربوها بس :)
انتوا عالم فاضية بصراحة ياريت تلاقوا حاجة تنفعكم تتعلموها لان عن وقت قريب للاسف هتعانوا من انهيار شديد فى كل شئ لان الاموال لن تبقى طويلا لكم ودائرة الحضارة لاينجو منها احد وتذكروا اين كنتم منذ 50 عام فقط !
حضرتك مش بتكتب شعر كتير لى انا قرات ليك شعر عامى وفصحى جميل جدا ومتقن بصراحة ماشاء الله لكن مش بتكتب كده لييييييييييييييييه ؟
انا لا اعتبر نفسى شاعر يمكن الموهبة فى وهى فعلا فى من وانا فى ابتدائى وكنت بكتب حاجات صغيرة وقتها لكن مكملتش وهقولك حاجة انا عمرى اللى فات مخطرش على بالى انى ابقى كاتب يعنى كتاباتى كانت لى انا او كانت دعوية بالدرجة الاولى وخاصة فى مجال مقارنة الاديان فعلى حسب الحال ممكن اكتب وبقالى فترة بفكر بجدية انى اجود نفسى فى الشعر واكتب اكثر ... ربنا يسهل
chinnese food or italian ?
italian
نفسى اﻻقى لنفسى هدف كان عندى هدف وحققته الحمد لله دلوقتى مفيش ايه الحل ؟؟؟؟؟
انت اللى تقدر تحدد احلامك وطموحاتك من تانى وتعيد اكتشاف نفسك الاحلام والاهداف مش بتخلص عند الانسان طول حياته يمكن هى خافية عنك الوقتى لو تحب تحكيلى باستضافة عن نفسك وحياتك ممكن اساعدك ان شاء الله
الكتاب هينزل امتى ان شاء الله وهينزل فييييييييين :)
هينزل على الانترنت هو مش كتاب اوى اعتبروه زى تذكرة كده تنفعك وانت ماشى فى اى وقت
قراءة القران وتدبره .. تقوى الله فى القلب وخشيته .. إعلامها أنها مهما زادت فى القدر والمكانة فهناك من هم افضل منها فى الدنيا وعند الله وان الناس درجات بعضهم فوق بعض فلا حاجة للتنطع والغرور ... كثرة ذكر الله ورجاء المغفرة منه ... انكار الذات ... النظر فى احوال الدنيا والتامل فى ما تملك من نعم قد حرم غيرها منها .
هو الواحد لو حس انه غريب عن اللى حواليه ده غلط وهل معناه انه ربنا مش بيحبه عشان قال انى اذا احببت فﻻن ناديت فى السماء انى احب فﻻن فاحبوه يعنى المفروض الناس كون بتحبك وﻻ ايه عشان انا توهت 0ه
على حسب انت بتعمل ايه وسط الناس وعلى حسب طبيعة حياتك وحسب اللى بتعمله ومخليك حاسس بكده او على حسب السبب اللى مخلى الناس تبعد عنك
لو الواحد معندووش أصحاب او خسر معظمهم وهو وحيد جدا ده يبقى انسان مش طبيعي ولا سوي مش كده ؟
يراجع نفسه ويراجع تصرفاته وافعاله ويحاول يشوفها من وجهة نظر محايدة ومن وجهة نظرهم لان اجماع الناس كده احيانا بيبقى فيه حاجة غلط عند الشخص ... بس لو بعدوا عنك علشان انت بتعمل حاجة صح كانك بتلتزم مثلا فدى مشكلة فيهم هما
متهيألى محدش هيفهم قصدك ايه اصلا الا انا
طيب تقصد ايه بفكك من دا موضوع ؟ لان باين انك مفهمتش اجابتى على السؤال الاول
طيب ما تسالنى وجها لوجه اصلكم كده عارفينى ياشباب شخصيا كمان :) ... هى مكانتش صدمة انا كنت متوقع وعارف ودى كانت من حوالى اسبوعين تقريبا او اكثر
عقبالي يارب ^^ الواحد بس بيبقى عايز يعملهم امتحان كشف الكذب لان معدش في ثقه في البنات اليومين دول حتى المنتقبات :(
عقبالك فى ايه بالضبط انا مش فاهم اى حاجة ؟؟؟ لو قصدك على السؤال بتاع عروستك عندى فده حد انا اعرفه تقريبا بيهزر معايا انما هو فيه حاجة فى الكلام تقول انى خلاص هخطب او هتجوز ادعيلى بس احقق اللى انا عاوزه
Mabrok :))))))))))))))))))))))) .. sob7an Allah!
مبروك على ايه ؟؟
عيد ميلاد حضرتك امتى ؟
7- 9 إن شاء الله
مين العروسة ؟ و لامين انا ؟
انتوا الاثنين :)
ربنا يسهللك يا سيدى و عروستك عندى
بجد طيب كويس ... مين بقى ؟
مش هنفرح بيك بئا ؟
باين انك تعرفنى ... دعواتك معايا
لو حضيت بفرصة كتابة كتاب. فحول ماذا ستكون الكتابة؟
انا بالفعل عملت واحد الوقتى عبارة عن خواطر سريعة وهمسات لاصلاح النفوس والحث على علو الهمة والارادة والقرب من ربنا لكن انا فى دماغى خطة انى اعمل كتاب بشكل مبسط ازاى الواحد يكون مسلم وايه اللى المفروض يعرفه من الدين
وبعدها حسيت انه حضرتك اضايقت وكنت حابه اوضح لك انى ذكرت اسمك مش اخدته كده Elder Flower لو تتذكر حضرتك انا
طبعا عارف حضرتك من المتابعين اللى بعتز بيهم فى الصفحة وخاصة الاسم مميز جدا وبالنسبة للبوست انا مش عارف اى بوست لكن محصلش حاجة من دى خالص :)