الموضوع أصلاً بقا فكرة وقت وانا واقف باستنى النهايات ماعرفش ان كنت هاموت دلوقت ولا انا هافضل عايش لساعات الموت بقا واقف ف الشارع وبيقعد جنبك ف الاتوبيس ويعدي معاك وانت معدي وينام وياك جوه سريرك الموت بقى اقرب ليك منك الموت بقى شاغل تفجيركقبل ماتنزل وتسيب بيتك قول اسف لامك واحضنها واحلف لحبيبتك كل نهار ان انت ماينفعش تخونها وان صاحبك شتمك ع القهوة اياك تزعل وامشي مسامح م الممكن واحد فيكوا يموت وتكون اخر ذكري امبارح وامشي بتضحك علشان لو مُت من التفجير يلقوا ف جسمك حاجة بتضحك واياك تقلق الموت هيجيلك هيجيلك لو حتى ف بيتك متغطّي الفكرة تكون رافع راسك مش ميت وكمان بتوطي !وانا وانت مسيرنا يجيلنا الدور يندهنا الموت جوه الكشوفات فان كان حظنا نحضر تفجير خلينا نكون أطيب اموات .