🥺💙
بلّش الموضوع بيني وبينك بصورة، وانتهى بصورة، أو ما بعرف اذا انتهى أو لأ، بس يلي بعرفه انه ما في حكي، ما في نظرات، وما في صوت لحدا فينا، بضل دائمًا أتذكر أُغنية فيروز بس تحكي ( زعلي طوّل أنا وياك وسنين بقيت، جرّب فيهُن أنا إنساك ما قدرت نسيت )☹️ ما بعرف ليش بشوف هالأُغنية بتحكي عن يلي صار بيني وبينك.🙄
إنت مش شايف إنه زعلنا طوّل، طيب نرجع لنكون مثل أول يوم عرفنا بعض فيه؟! نرجع طبيعين، سطحيين مع بعض، ابعثلك وتبعثلي ونضحك على تفاهة كُلّ واحد فينا، ما تكون تعمّقت معي، ولا أكون تعمّقت معك، مُجرّد معارف وبس!، تيجي لنكسر قاعدة ( الزمن ما برجع )، ونرجع؟! تيجي نكون الشواذ لكُلّ القواعد؟! 🥺
اذا إنت مش متحمّل فِكرة الرجوع، لو تصفُن فيها شوي بتلاقيها حلوة، ارجع لننسى الزعل، والحِقد والمواقف السيئة، ارجع لتكون إنت يلي عرفته، وبوعدك لأرجع أنا يلي عرفته، والله الزعل مش رح يكون سبب سعادتنا، خلينا نكون إيد بإيد مُمكن؟! 💔
بروح بسمع أُغنية (Adele-Hello)، بكون سرحانة بالحكي، هو صح في مقاطع مش فاهمه معناها هههه😅، بس في مقطع راسخ بعقلي، بتغنيه Adele بس أنا بسمعه بصوتك😐، بس تحكي ( Hello from the outside At least I can say that I've tried To tell you I'm sorry for breaking your heart But it don't matter it (clearly doesn't tear you apart anymore كثير بحسّ هالحكي بنفع لإلنا، إنه خلينا نعتذر لبعض عن كسرتنا لبعض، نعتذر ونحكي لبعض ( آسف مش قاصد أكسرلك قلبك )، صدقني الزعل مهما طوّل بتصلّح، والكسِر مهما ضرّ بنجبر، والكُره يلي بينا بتعدّل، وكُلّ اشي رح ينحل بس إنت موافق؟!
بتتذكر إنت شو حكيت آخر مرّة؟! حكيتلي مثل ما حكت فيروز تمامًا ( تِذُكر آخر كلمة شو قلتلي؟ بدك ضلّي بدك فيكِ تفلّي، زعلت بوقتها، وما حللّتها، إنه إنتَ هيدا إنتَ )، ما توقعت بيوم كنت قادر على التخلّي وأنا يلي كنت بحاول أزرع فيك الإيمان بالبقاء، وكأنُّه الإشي يلي سعيت لإله، كُلّه صار ضدي، طيب أنا رح أنسى كُلّ اشي واحكيلك يلي بخطرلي:
(بطلع عبالي ارجع أنا وياك، إنتَ حناني، ارجع أنا وياك، أنا وإنتَ ملّا إنتَ)، رح ترجع؟ ولا رح تضلّ بعيد بهاذ الشكل المؤذي؟!
يلا نرجع❤️😔
View more