اكتشفت اني حالتي النفسيه بتكون كويسه جداا وانا مسحول وبناام من التعب في دقيقه ف آخر اليوم لكن اول ما بتساب كده مع نفسي اخطط و ناخد وندي مع بعض كل حاجه بتبوظ والملل والاكتئاب بيظهر !!!
واحدة من أكبر التحديات اللي بتقابلنا وبتحبطنا هي عدم التفرقة بين الأصحاب الحقيقيين وأصحاب المرحلة. الأصحاب الحقيقيين دول بتبقى العلاقة معاهم ممتدة وبيبقى الواحد مر معاهم بحاجات كتير وبصرف النظر عن مكانهم وظروفهم يقدر الواحد يتكلم معاهم بصراحة ويعتمد عليهم لما يكون مزنوق. الناس دي الواحد يقدر يعتبرها من أهله وهما كان بيعتبروك من أهلهم وإن بعدت المسافات أو انقطع الكلام لفترة. وعشان الصفات دي الأصحاب الحقيقيين قليلين جدا والإنسان المحظوظ هو اللي ربنا بيرزقه بكام واحد من النوعية دي. أما أصحاب المرحلة دول ممكن يكونوا أصحاب في الجامعة بتشوفهم كل يوم طول الجامعة لكن مع التخرج بيختفوا من حياتك. أو زمايل معاك في الشغل بتشوفهم وتقرب منهم لسنين طويلة لكن مع تركهم للشغل يتحولوا لمجرد معارف. للأسف الواحد ممكن يرتبط بأصحاب المرحلة وينسى خالص إنهم أصحاب مرحلة ويزعل جدا ويتأثر لما يمشوا وممكن ياخد منهم موقف شخصي وعاطفي عشان بعدوا وبطلوا يسألوا. لكن في الحقيقة ده الطبيعي لأنهم كانوا أصحاب مرحلة والمرحلة انتهت...