الناس كلها مش مجبره إنها تستهلك نفسها ووقتها عشان تفهمك من سكوتك ومن تعاملاتك البسيطه ، ولا حد المفروض يفضل معاك لو مش مرتاح ، ولا مطالبين إنهم يضيعوا وقت ف إنهم يزيلوا الغموض عن شخصيتك ، ولا وارد إنك تستنى إن عموم الناس العابرين هايحطوك أول أولوياتهم ، مافيش الكلام ده .. إحنا بنتدلع ع الناس القريبه مننا بس ، بنستنى إنهم يطولوا بالهم معانا شويه ، يهتموا يمكن يكتشفونا ويزيلوا الغموض عننا ، يفهمونا من غير رغي وشرح وتبرير كتير ، كده يعني .. القريبين بس اللي ممكن يكون ليك وليهم دلال على بعض ، لكن مش كل الناس اللي أنت مالكش لازمه عندهم ولا هم ف الحقيقه ليهم لازمه عندك أد ما أنت عايز تحس إنك محور إهتمام زياده م اللي حواليك ، فا بلاش تتدلع وتتعشم أوي ف عموم الناس عشان ده مش فرض عليهم ، ولا فرض عليك برده لما تكون أنت واحد من عموم الناس لحد تاني .. مش كل الناس إتخلقت عشان تتصنف نفس التصنيف أو تتعامل نفس التعامل اللي بنعامله للقله الشديده جداً المميزين ف حياتنا .. والعشم ف الناس الغلط دي high expectations منك أنت ، لكن العالم مش غدار ولا حاجه ولا متآمر عليك عادي .. فا يستحسن لو كل شخص عرف يحط نفسه ف المكان المناسب ف حياة اللي حواليه ، وعرف يحط الناس اللي حواليه ف المكان الصح عنده ، واستوعب بأريحيه فكرة إن عادي ممكن ناس تحبك وناس لأ ، وناس تسيبك عشان مارتاحتش معاك عادي زي ما أنت بتسيب حد مارتحتش معاه ، وإنه عادي برده إنك ماتكونش أهم واحد ف القعده واللي الكل عايز يعرفه ويقرب منه .. مهم جداً إنك تستوعب إنك عادي بس .