تروح تيجي تجيب و تسيب يضيع العُمر جُوّه الشيب .. توصّي الحِلم على بُكره يموت بُكره في علم الغيب .. و ما في الجيب .. تمن آخر رهان يانصيب .. تراهن ع إللي جَيّ هناك فتخسر كل حاجة معاك .. بياض الشَعر مع بُكره و جيب فاضي بيترجاك .. كفاية و سيب خِسِرت الجَيّ و الرايح فـ حاجة مالكش فيها نصيب ..#يانصيب #نبيل_عبد_الحميد
الدُنيا سباق و العُمر خيول .. و سمعت كتير من ناس بتقول .. أد ما بيطُول وقت اللفه أد ما هتعيش .. و الدُنيا رهان و أنا داخل فيها بآخر فيش .. و معايا حُصان .. و الباقي معايا من الماضي مش جايب حق الدُخان .. فأكيد لو هخسر مش هخسر أكتر مانا أصلاً خسران .. و أتاري مع سباق الدُنيا محدش كسبان .. إللي بيوصل بيكون باقي من عُمرُه مفيش .. و إللي بيتأخَّر في اللفة هو إللي يعيش ... لكن بيكَمِّل في الدُنيا من غير ولا فيش ..#الموت_للفرسان #نبيل_عبد_الحميد
بقالي كتير بحاول إني أتغيّر و أقول بُكره .. هكون أحسن من الأول و مين يِكره .. و مين محاولش .. و عدى عليا مِيت بُكره و أنا برضُه مابتغيّرش ... بفكّر بس مابقررش ... لكن دلوقتي أنا ناوي و عندي الوقت و الفِكرة ... مقرر إني هتغيّر و هبدأ .. بس من بُكره ..#يجوز_بكره #نبيل_عبد_الحميد