البيوت اسرار...😉
داليا صاحبتي من 5 سنين من واحنا سنة اولى جامعة ،بحياتي ما شفتها زعلانة دائما تضحك، كنت حاسدتها انها مطنشة كل شي بصير وبتضحك!
، كان الكل يستغرب من برودة اعصابها، بتذكر بسنة اولى جامعة،كنت بدور على القاعة، ومنكدة وحالتي حالة، لقيت بنت بتضحك بآخر الممر، جيت عندها وقلتلها بتعرفي عنوان القاعة مسكت الورقة وحكتلي لا ضايعة مثلك وضحكت !
انا استغربت منها، وقعدنا ندور انا وياها، فتنا على القاعة، الكل صار يضحك علينا عشان متأخرات،انا كنت بدي اعيط اطلعت عليها بتضحك ومش سائلة!
وصرت صحبة انا وياها، بسنة ثانية اكتشفنا الصبح انه علينا امتحان بمادة ثانية ما هي دليلي وانا دليلها وال2 مش مركزات انا قعدت ابكي ةهي صارت تضحك وتحكيلي ولك عادي بندرسوا هسا، وقعدنا ندرس ونجحنا فعليا ةجبنا علامات عالية
بمشروع التخرج ، قبل ما نقدمه للدكاترة خرب الموقع، وبطل يشتغل ، صرت انا متوترة وعصبت وهي لساتها بتضحك وطول الفترة وكل شي يصير معنا وهي تحكي الحمد لله ولعله خير ...
بحياتي ما شفت وحدة مبسوطة ومرتاحة بحياتها قدها، كان الكل يحسدها عهداة بالها والضحكة لي ما بتفارقها !
بيوم من الأيام شفتها بتعيط، لأول مرة بحياتها، قعدت جنبها قلتلها داليا بتعيطي !
حضنتني وقالتلي تعبت ! تعبت الناس تجرحني ، حياتي كلها مشاكل ، ابوي متوفي من 10 سنين وامي متحملة مسؤوليتنا، وضعنا المادي زفت، وعمامي ولا متدخلين وخوالي مشغولين بحالهم وبس ...
انا استغربت كل هالهموم تكون فيها ، وساكتة بس شو لي خلاها تنفجر هيك ..
قالتلي اختي الصغيرة بدها عملية قلب واحنا يدوب لاقيين ناكل والمستشفى مش متعرف عليها ، رح اخسر اختي ....
هون انا سكتت وصفنت قلت قديش كنت مفكرة حالي صاحبتها وقريبة عليها ، بس طلعت ما بعرف شي عنها ، وقديش في وجع بحياتها وهموم اكثر مني مع هيك بتضحك وقوية، يا الله جد البيوت اسرار ، والقلب اسرار كمان شو مليان قصص ما بنعرفها ويمكن شغلة زغيرة تخلي يطلع كل لي جواته .... حضنتها وقلتلها انا اسفة لأني مكنتش صاحبة حقيقية، وبعد فترة طلعت حملة اسمها ابتسم عشان تعيش يارا! وكانت تبرعات لالها ..وتمت عمليتها بنجاح !
وجد اكثر ناس بضحكو هم اكثر ناس جواتهم الم ووجع
وما في احلى من صديقة تكون مثل الاخت ومخبية همومها لتضحكك دائما
البيوت اسرار 👌👌

Liked by: Riham Tawfiq