كنت اعرف واحده وبنحب بعض اوي ومحصلش نصيب واتجوزت وبلوكات وخلاص بس كل فتره تدخل تكلمني نحكي يومين تلاته ومبقدرش اكسفها لاني كمان بحبها وترجع تعمل بلوك تاني تغيب بالشهور وترجع على غفله تحكيلي مشكله ويومين وتغيب تاني مش لاقي تفسير غير ان دي انانيه منها او عبط مني
لو اتكلمت تاني اعملها انت بلوك حفظا على قلبك وعشان ربنا سبحانه وتعالى وان شاء الله ربنا يعوضك خير
هو الطبيعي والعادي خطيبي كل ما نخرج لازم يودينا نقعد جمب الترب ويقولي عشان نتعظ في حياتنا ويقولي شايفة التربة والمدافن جميلة ازاي ويجيب شوية تراب ويرمهم عليه يقولي منها والينا نعود ؟ انا حسة أنة مش طبيعي
ده مؤشر نكد وده شئ مش طبيعي أبدا حاولي تتكلمي معاه واقترحي أماكن تانية وقوليله ان النبي صلى الله عليه وسلم نهى عن زيارة القبور بكثرة
متضايقة ان كل ما حد يعرف انى ٢٦ سنة يقولى متجوزتيش ازاى ويتخض للعلم انا اتخطبت لحب عمرى سنتين وفسخنابس متضايقة اوى من الموضوع دا مش عشان عاوزة اتجوز لا عشان كلامهم او الرياكشن اللى بيظهر اول ما يعرفوا سنى
سيبك من الناس الناس مش بيعجبهم حاجة أهم حاجة تاخدي وقتك وتختاري الشخص المناسب
هو لازم أقعد علي أولادي مينفعش يعني أتجوز تاني بعد وفاة زوجي خصوصا إني لسة صغيرة
لا طبعا عادي تتجوزي اي المشكلة
لو واحد زميلي قالي انه عايز يتقدم بس نرتبط فترة قبلها من غير حاجة رسمي وانا رفضت رفض قاطع عشان مضمنش يمكن بيضحك عليا وعايز يتسلى وعمال يزن ع الموضوع ده كتير انا صح واللا غلط ؟
انتي صح ومحترمة ومتربية
مهو انت لو قدامك برتقانه مقشره و وحده سليمه هتاخد ايه ؟
عادى ان واحده تبقى حلوه جدا وعيلتها كويسه ومعاها كليه وتوصل سن ٢٧ ومش بيجيلها حد مناسب؟؟
اه عادي جدا جدا
بيقولوا الي متجوزتش فاتها القطر 😂 طب والي اتجوزت؟😂
داس على وشها القطر 😂
مامتي مش راضية تخليني افسخ خطوبتي ..عشان كدا هتكون الخطوبة التانية ليا تتفسخ..هل هي عندها حق و اكمل الخطوبة و اهي جوازة و السلام!!! ولا اصمم ع موقفي ؟
صممي على موقفك لو شايفة انك مش عارفة تكملي والخطوبة هي مجرد فترة تعارف
ممكن اخد رايك في حاجه مهمه ومش هسكيب للرد والله وهقول؟
أكيد اتفضلي
عايزة أسألك عن حاجة في اكونتك ينفع؟
اه اتفضلي طبعا
لو نفسك تخش تكلم حد ظلمك واذاك وتقولة انك مش مسامحه على اللى عمله فيك وانت حاليا بقي ليك حياتك وهو كمان بقي ليه حياته بس انت مش قادر تتخطى الموضوع...اكلم ولا بلاش؟
خليكي علي مبدأك واوعي تتنازلي عشان حرام اوعي تغضبي ربنا وهنا بقي الاختبار اسمعي بودكاست الخطوبة https://youtu.be/1XpFCr3yFSY
هو غلط البنت تطلب من واحد الزواج لما تكون شيفاه اخلاق ومتدين
زي ما عملت السيده خديجه رضي الله عنها مع الرسول صلى الله عليه وسلم؟
أيوه غلط شوفي بودكاست ايه المشكلة في الخطوبه
أسمي بنتي إيه بإذن الله هولد كمان شهر.
مريم- ليلي- نور.
ليلى
حسه انك بقيتى مختفيه الفتره الى فاتت عن كل حاجه حتى السوشيال ميديا؟
دي حقيقة
واحد قريبي دبلوم تجاره متقدم وانا ف أسنان ونا بالذات والله مش بيهمني الفروقات دي ومش بحبها بس للأمانه مش عايزه اتجوز هنا عايزه اطلع من هنا،إحنا عايشين في الأرياف ونا عايزه اتزوج اي واحد بعيد عن إنه يكون فلاح علشان الواحد شاف المرار ومش عايزه افضل عايشه فيه،هو مش من حقي إني ارفضه يعني كده هبقي متكبره
حقك ترفضي طبعا
جماعه ردوا ضروري
انا مخطوبه بقالي 4 شهور حب تحكم وخطيبي غلط كتير وكنت بسامحه اكتشفت انه مراقب تيليفوني وبيسمع كل المكالمات كنت هسيبه اتأسفلي حسيته ندم اديته فرصه ورجع عمل كده تاني ودايما يقولي لو عملتي كذا هسيبك وطريقته مش حلوه قولولي اعمل ايه مش عارفه اعمل ايه بجد اسيبه ؟ ولا اديه فرصه تانيه ؟؟
بعد كل ده بتسألي 🙄؟؟؟!!!!!!!!!!
لو حد معاكي في الكلية بعتلك وعرفك أنه معجب بيكي وعايز ييجي يتقدملك وهو حد كويس ومحترم وانتي عارفاه بس مفيش علاقة شخصية بينكم واكيد طبعا هو لسه بيدرس برضه مش موظف او كده....ردك هيكون ايه ؟؟؟