مش كُل حاجة وحشاك ينفع تروح لها؛ في حاجات مُعينة لازم تفضل وحشاك من بعيد لبعيد لكن إيّاك تقرّب منها خطوة، أحيانًا الحنين بيكون مؤذي لصاحبه.. ووقتها العشم بيكون واخدك إنّك تحاول تقرب وتسأل فبتتفاجئ برد فعل يوجع كرامتك ويكسرك، وإنتَ أصلًا في غنى عن كُل دا لإنّك يادوب بدأت تتعافى وتفوق يبقى لازم تكمّل تماسُك ولازم تقاوم لغاية ما تتجاوز المرحلة دي، لكن لو حنْيت مش هينوبك غير وجع قلبك على الفاضي وهتلاقي نفسك بترجع لنقطة الصفر تاني.. فبلاش.
ما تعاتبش اللي مش عارف قيمتك، ولا تطلب من حد يعاملك إزاي، قيمتك أكبر بكتير من إنك تتسول الاهتمام وتشحت مشاعر اللي قُدّامك، كُل واحد عارف هو بيعمل إيه كويس وعشان كدا اللي يقدرك قدّره واللي يتجاهلك اعتبره شفاف ومش موجود، وبعدين ما ينفعش تلوم قليل الأصل على قِلة أصله لإن اللي اتعوّد على الرخيص مُستحيل يعرف يصون الغالي.