دايما بشوف بالأفلام كيف البطلة بتروح بتتخبى للبطل ورا الباب و بس يدخل هو عالغرفة ، تطلعلو من ورا الباب ع أساس تنقزو و تعملو مقلب و يروح هو يمسكها و يحملها و يصير يلف فيها و يصيرو يضحكو و التصوير بطيء و مبسوطين و طايرين و قلوب الحب طالعة من عنيهم ، و بعدين يرميها عالتخت و من كتر ما تختهم ريش و ناعم هي تغطس جواتو و تختفي بين المخدات .. أنا يعني شو ناقصني ؟ هي عندي زوج ، و هيني أنا بعمل حالي زيها هاي البطلة شو بتفرق عني ؟ رحت أول اشي ، طلت قميصو الأبيض من خزانتو ، و لبستو زي ما بالأفلام ، عشان قال أبين كيوت و إني لابسة اشي واسع و هيك و رحت رفعت شعراتي كعكة ، و ساعة و أنا احط حباسات و بكل و أبلو مي ، لحد ما مسكت الكعكة ، لإني صرلي زمان مو مشطتو فماسك مع بعضو زي مكانس القش تاعون زمان .. المهم كان زوجي منسدح و غافي عالكنباي بالصالون ، رحت انا الكيوت الناعمة ، اجيت من بعيد و نطيت ع طرف الكنباي الي هو نايم عليها ، كان كل قصدي بس اخلي ينقز و هيك ، بس بالغلط لما نطيت أخطأت التصويب و وقعت كلي ع راسو ! و بعدين قلبت عالأرض بين الكنباي و #الطربيزة ، الله رحمني ما انكسرت رقبتو للزلمة ! طبعا هو من الضربة الي اجتو قام زي المجنون ! أنا رحت صرت أستجمع قوتي زي الي بطلع من جورة و شردت منو عالغرفة ، هو قام و ركض وراي ، أنا كل فكري إنو احنا حاليا قاعدين بنعمل زي الأفلام ، و هو لاحقني يكمل المزحة معي .. و أنا بركض زي العاهة عالغرفة خبط اصبع رجلي الصغير بحفة طاولة رحت من الوجع شقلبت عالأرض و صرت أرقص زومبا عالشقلوب ، اجا هو تعرقل فيني و وقع برضو ، و اجا صباحو بزاوية الباب أنا لسا قال مفكرة حالي كيوت و نغشة و قمت أكمل ركض و بضحك زي الي معها حالة خاصة ، المهم خلص وصلت غرفة النوم و فش مجال اهرب ! اجا زوجي زي الثور الهايج و عنيه حمر و بشد ع سنانو ! حملني و رماني عالتخت ، من حم الرمية خبط راسي بخشبة التخت صرت اولول و من كتر ما فرشة تختنا و الخشبة واحد ، صابني تهتك مفاصل ، تجعلكت كل ملامح جسمي بعدين نزل فيني شلويت و كفوف عالتصوير السريع ، هون استوعبت انا انها هاي قتلة مو مزح و وناسة و ريش 😂 بعدين الله يحميه انتبه اني لابسة قميصو ! لما شافني لابستو انجن بزيادة لإنو لسا هسا جايبو من الكوى و بدو يلبسو باجتماع بكرا بالشغل ، راح نزل فيني بوكسات و مسكني من كعكتي و مسح فيني الغرفة لحد ما طلعت الكعكة بإيدو ! و صفا راسي زي فوهة البركان و بس بعدين هدي و راح يحضر اخبار و محكاش معي إلا بعد ما بلشت رقبتو تتحسن و بلش يقدر يحركها بعد كم شهر .. مذكرات بنت منكوسة