أنا حزينة يا نوران..
مقهورة على نفسي من قعدتي وقلة همتي جدًا، خايفه جدًا أفقد صاحبتي الأخيرة هنا بعد ما فقدت 5 قبلها..
وكلهم عندهم لامُبالاه ولا كأننا قعدنا مع بعض فوق السنة ونص، انا وصاحبتي الأخيرة دي بنبكي على الأطلال فعليًا بس كل واحدة لوحدها، بنصبّر بعض وانه عادي يعني فاكس وكله بشع..
أنا تعبت
حاسة اني اصغر من اني اديكي جواب مريح، لكني متفهمة جدا الالم اللي بتمري بيه..لو بتدوري علي تهوين فحاولي تنظري للصورة الكبيرة، ايه حقيقة الدنيا، ايه دورك فيها، طيب هل ممكن استفيد باللي انا فيه دلوقتي؟ مثلا يمكن ربنا بيربيني اني اكون اقل اعتمادية علي الناس؟ وهكذا.. لو بتدوري علي حلول عملية ففي حاجتين ممكن اقولهم، الاولى ان الناس اللي اتغربوا لاول مرة وكان ليهم اصدقاء قدامى وحياة مستقرة وفقدوها اغلبهم مزعزع جدا، منهم اللي لسه بيتعامل مع الوضع ده علي امه مؤقت وهيرجعوا لحياتهم الطبيعية وبالتالي مش حابين يكونوا علاقات جديدة تربطهم هنا لما يقدروا يرجعوا، ومنهم اللي فاهم بس لسه خايف من توطيد العلاقات لانه اتلسع من الفراق، ومنهم اللي مش عارف يستبدل اصدقائه القدامى او دايما بيقارن بيهم وهي مقارنة غير عادلة بس بتخليه دايما سايب مسافة كويسة لمعارفه هنا.. في امثلة تانية بس عموما الناس دي تعبانة فعلا وتكوين صداقات معاهم محتاج جهد، حاولي ماتلوميش عليهم وحاولي تفهمي ايه مخاوفهم بالظبط وتطمنيهم..الحاجة التانية، اعملي لنفسك خطة لسنتين ع الاقل مثلا، و طلعي منها مشاريع اصغر، وابني صداقات محورها المشاريع دي.. الفكرة انه من ناحية همتك هتعلى وهتبداي تحسي بالمعنى في حياتك حتى لو ملكيش حد جنبك، من ناحية تانية لما تبني صداقة حول مشروع هيبقي بيجمعكم شئ ايجابي، بحس ان معنى الحب في الله بييجي من كدة ان اجتماعنا يكون مثمر وعلي طاعة، ومنها علاقتكم هتبقي صداقة صحية فعلا الاصل انكم بتشجعوا بعض تبقوا احسن مش بس تنكروا الواقع..عارفة ان كل الرغي ده يبدو بعيد اوي عن مساحة المشاعر اللي ملياكي، لكن صدقيني لما تغيري في افكارك وتحركك هتلاقي مشاعرك السلبية تبدلتملحوظة اخيرة: اكتر حاجة لما بدات اتعلمها هوّنت عليا الدنيا بما فيها هي العلوم الشرعية
اقرا كتير، حتي لو مابتحبش القراية اغصب نفسك، استغل المواصلات اعمل حاجة جديدة ترقق قلبك لان الاحداث بتشوه قلوبنا خليك في حاجة الناس اللي حواليك خصوصا اللي قصرت معاهم فترة الدراسة اعمل حاجة تخليك تتعمق اكتر في مجالك